ភ្នំពេញៈ សន្ធានការីពាណិជ្ជកម្មថ្មីចំនួន ១៦ រូបត្រូវបានទទួលស្គាល់ដោយស្ថាប័នអន្តរជាតិផ្នែកសន្ធានកម្ម និងដោះស្រាយវិវាទពាណិជ្ជកម្មក្រៅតុលាការមជ្ឈមណ្ឌលដោះស្រាយវិវាទប្រកបដោយប្រសិទ្ធភាព (CEDR) បន្ទាប់ពីកម្មវិធីបណ្តុះបណ្តាល និងត្រៀមខ្លួនជាស្រេចក្នុងការផ្តល់សេវាសន្ធានកម្មចំពោះអាជីវកម្មដែលមានវិវាទ។
យោងតាមការប្រកាសរបស់សាជីវកម្មហិរញ្ញវត្ថុអន្តរជាតិ (IFC) កាលពីថ្ងៃពុធ ជាតតិយជនអព្យាក្រឹត និងឯករាជ្យ ដែលជាសន្ធានការីប្រើបច្ចេកទេសជាច្រើនក្នុងការដឹកនាំដំណើរការពិភាក្សា ទីបំផុតជួយភាគីអាជីវកម្មឱ្យឈានដល់ដំណោះស្រាយដែលមានការព្រមព្រៀងគ្នាធ្វើឱ្យពួកគេកាត់បន្ថយនីតិវិធីតុលាការដ៏វែង និងត្រូវចំណាយច្រើន។
«ដើម្បីជួយធ្វើឱ្យប្រសើរឡើងនូវបរិយាកាសវិនិយោគរបស់កម្ពុជាទន្ទឹមនឹងការជួយទ្រទ្រង់ឱ្យធុរកិច្ចនានា ស្ទុះងើបឡើងវិញពីផលប៉ះពាល់នៃជំងឺកូវីដ ១៩ និងបន្តការបង្កើតការងារ IFC និងមជ្ឈមណ្ឌលជាតិផ្នែកមជ្ឈត្តការពាណិជ្ជកម្ម (NCAC) កំពុងជំរុញសន្ធានកម្ម ដើម្បីដោះស្រាយវិវាទអាជីវកម្ម និងកសាងទំនុកចិត្តរបស់វិនិយោគិនលើវិវាទពាណិជ្ជកម្ម»។ នេះបើយោងតាម IFC។
IFC បានបន្តថា ដោយសារបញ្ហាប្រឈមផ្នែកសេដ្ឋកិច្ចនៃការរីករាលដាលជំងឺកូវីដ ១៩ ដូចជាទីផ្សារផ្សេងទៀតដែរអាជីវកម្មកម្ពុជាជួបការលំបាកជាពិសេស សហគ្រាសធុនតូច និងមធ្យម (SME) ក្នុងការរក្សាប្រតិបត្តិការ។ ស្ថិតក្នុងបរិការណ៍នេះអត្ថិភាពនៃការដោះស្រាយវិវាទតាមបែបផ្សេងទៀតដែលអាចបត់បែនបានក្រៅប្រព័ន្ធតុលាការ ដូចជា សន្ធានកម្មពាណិជ្ជកម្មជាដើម។
លោក Asad Yaqub តំណាង IFC ប្រចាំកម្ពុជាបានឱ្យដឹងថា នៅ IFC បទពិសោធរបស់យើងបង្ហាញថាក្នុងអំឡុងពេលមានវិបត្តិ យន្តការសន្ធានកម្មពាណិជ្ជកម្មដ៏រឹងមាំមានសារៈសំខាន់ណាស់ក្នុងការជំរុញការដោះស្រាយវិវាទពាណិជ្ជកម្ម ឬវិវាទដែលជាប់ពាក់ព័ន្ធនឹងបំណុលកាន់តែលឿនជាងមុន។
លោក Asad បានថ្លែងថា៖ «ខណ:ពេលសេដ្ឋកិច្ច កម្ពុជាស្ទុះងើបឡើងវិញពីការរីករាលដាលជំងឺកូវីដ ១៩ និងបន្តរីកចម្រើន ជម្រើសដោះស្រាយវិវាទក្រៅតុលាការប្រកបដោយប្រសិទ្ធភាពនឹងផ្តល់ឱ្យវិស័យឯកជននូវទំនុកចិត្តបន្ថែមទៀតក្នុងការចូលរួមក្នុងប្រតិបត្តិការធុរកិច្ចនានាដែលលើកទឹកចិត្តការវិនិយោគ និងជំរុញកំណើនសេដ្ឋកិច្ចក្នុងប្រទេស»។
លោក ប៊ុន យូឌី ប្រធានមជ្ឈមណ្ឌលមជ្ឈត្តកម្មពាណិជ្ជកម្មជាតិបានឱ្យដឹងថា ទោះបីជាសន្ធានកម្ម បែបប្រពៃណីដែលមានតាំងពីយូរយារណាស់មកហើយនៅក្នុងសង្គមកម្ពុជាក៏ដោយ សន្ធានកម្មពាណិជ្ជកម្មដែលមានរចនាសម្ព័ន្ធគឺជាគំនិតថ្មីមួយ សម្រាប់សហគមន៍ធុរកិច្ចនៅទីនេះ។
លោកលើកឡើងថា៖ «ខ្ញុំជឿជាក់ថាយន្តការដោះស្រាយវិវាទជំនួសដែលត្រូវបានពង្រឹងរួមជាមួយនឹងសន្ធានការី ដែលមានសមត្ថភាពនឹងលើកទឹកចិត្តឱ្យអាជីវកម្មកាន់តែច្រើននៅក្នុងប្រទេសនេះទទួលយកការសន្ធានកម្មពាណិជ្ជកម្ម ដែលជាមធ្យោបាយមួយ ដើម្បីជួយដោះស្រាយវិវាទរបស់ពួកគេឱ្យបានឆាប់រហ័ស សន្សំសំចៃ និងមានប្រសិទ្ធភាព។ ការទទួលស្គាល់ជាអន្តរជាតិដល់សិក្ខាកាមទាំង ១៦ នាក់ គឺជាព្រឹត្តិការណ៍ដ៏គួរឱ្យកត់សម្គាល់មួយ»។
កំណត់ត្រា បានពីសភាពាណិជ្ជកម្មអន្តរជាតិ (ICC) បង្ហាញថា ដំណើរការសន្ធានកម្មជាមធ្យមមានរយៈពេល ៤ ខែគិតចាប់ពីថ្ងៃដែលសំណើសម្រាប់សន្ធានកម្មត្រូវបានដាក់រហូតដល់ចុងបញ្ចប់នៃដំណើរការ។ យ៉ាងណាក៏ដោយ ការប្រជុំជាក់ស្តែងជាមួយនឹងសន្ធានការីមានរយៈពេលតែ ១ ទៅ ២ ថ្ងៃប៉ុណ្ណោះ។
បើយោងទៅតាមលោកស្រី ចម និមល រដ្ឋលេខាធិការក្រសួងពាណិជ្ជកម្ម បានឱ្យដឹងនៅក្នុងសិក្ខាសាលាមួយកាលពីខែសីហា ឆ្នាំ ២០២១ ថា វិនិយោគិនមួយចំនួនបានដាក់ពាក្យបណ្តឹងចំនួន ២៧ ទាក់ទងនឹងវិវាទពាណិជ្ជកម្មទាំងនេះទៅកាន់មជ្ឈមណ្ឌលមជ្ឈត្តកម្មពាណិជ្ជកម្មជាតិ (NCAC)៕ LA