ភ្នំពេញៈ ក្រុមហ៊ុនអាកាសចរណ៍ Bangkok Airways បានចាត់ទុក កម្ពុជាគឺជាគោលដៅហោះហើរមួយក្នុងចំណោមគោលដៅដែលបានកំណត់ជាច្រើនផ្សេងទៀត ខណៈដែលក្រុមហ៊ុនបានដាក់ផែនការក្នុងការដឹកអ្នកដំណើរឱ្យសម្រេចបានចំនួន ២,៦ លាននាក់, ប្រតិបត្តិការជើងហោះហើរឱ្យបានចំនួន ៣៤ ០០០ ជើងសំដៅធ្វើយ៉ាងណាទទួលបានប្រាក់ចំណូលប្រហែល ៨,១៧៥ ពាន់លានបាតសម្រាប់ឆ្នាំ ២០២២ នេះ ។
នៅក្នុងសន្និសីទសារព័ត៌មានកាលពីថ្ងៃទី ១០ ខែមីនា ឆ្នាំ ២០២២ លោក Puttipong Prasarttong-Osoth ប្រធានក្រុមហ៊ុនអាកាសចរណ៍នេះបានថ្លែងថា តាមពិតចំនួនអ្នកដំណើររបស់ក្រុមហ៊ុន Bangkok Airways បានធ្លាក់ចុះយ៉ាងខ្លាំងក្នុងអំឡុងខែឧសភា ដល់ខែសីហា ឆ្នាំ ២០២១ ដោយសារតែការផ្ទុះឡើងវីរុសបំប្លែងថ្មី Delta។
ទន្ទឹមនឹងនេះសម្រាប់ផ្លូវហោះហើរ ក្រុមប្រទេស CLMV (កម្ពុជា ឡាវ មីយ៉ាន់ម៉ា និងវៀតណាម) ក្រុមហ៊ុនអាកាសចរណ៍បានចាប់ផ្ដើមដំណើរការឡើងវិញនូវសេវាកម្មពីទីក្រុងបាងកក-ភ្នំពេញ (កម្ពុជា) កាលពីខែធ្នូ ឆ្នាំ ២០២១ ខណៈដែលសម្រាប់ឆ្នាំ ២០២១ ក្រុមហ៊ុនរកប្រាក់ចំណូលពីការហោះហើរទៅប្រទេសទាំងនេះបានប្រហែល ២ ភាគរយក្នុងចំណោមប្រាក់ចំណូលអ្នកដំណើរសរុប។
លោកថ្លែងថា៖ «នៅឆ្នាំ ២០២២ យើងព្យាករថា វិស័យអាកាសចរណ៍ត្រូវបានរំពឹងថានឹងស្ទុះងើបឡើងវិញប្រហែល ៤០ ភាគរយ ដោយសារតែការកើនឡើងនៃអត្រាការចាក់វ៉ាក់សាំង ក៏ដូចជា ការកាត់បន្ថយការរឹតបន្តឹងការធ្វើដំណើរ និងការបន្ធូរបន្ថយវិធានការបង្ការជំងឺកូវីដ ១៩ នៅក្នុងប្រទេសថៃ។ យើងគ្រោងនឹងចាប់ផ្ដើមដំណើរជើងហោះហើរក្នុងស្រុក និងអន្តរជាតិទៅកាន់ទិសដៅដ៏ពេញនិយមមួយចំនួនរបស់យើងឡើងវិញ រួមទាំងទីក្រុងបាងកក-កោះក្រាប៊ី (ដោយចាប់ផ្តើមចាប់ពីថ្ងៃទី ២៧ ខែមីនា ឆ្នាំ ២០២២) ជើងហោះហើរកោះសាមុយ-ឈៀងម៉ៃ ជើងហោះហើរកោះសាមុយ-ទីក្រុងហុងកុង និងទីក្រុងបាងកក-សៀមរាបក្នុងត្រីមាសទី ៣។ ទោះជាយ៉ាងណាក៏ដោយ ការចាប់ផ្ដើមដំណើរការជើងហោះហើរទាំងនេះឡើងវិញនឹងអាស្រ័យលើតម្រូវការធ្វើដំណើរ ការរឹតបន្តឹងការធ្វើដំណើរក្នុងប្រទេសនីមួយៗ និងវិធានការ បង្ការជំងឺកូវីដ ១៩ ដែលប្រហែល ជាមិនត្រូវបានបន្ធូរបន្ថយនៅពេលចាប់ផ្តើមប្រតិបត្តិការឡើងវិញតាមដែលបានគ្រោងទុកនោះទេ»។
លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិក (PATA) ប្រចាំប្រទេសកម្ពុជាបានប្រាប់ភ្នំពេញប៉ុស្តិ៍នាពេលថ្មីៗនេះថា ការកើនឡើងជើងហោះហើរអន្តរជាតិបង្ហាញថា មានទំនុកចិត្តខ្លាំងក្នុងចំណោមវិនិយោគិន និងភ្ញៀវទេសចរទាក់ទងនឹងការធ្វើដំណើរមកកាន់កម្ពុជា។ លោកបានបន្តថា ទោះបីជាមិនទាន់មានភាពស្ថិតស្ថេរក្នុងកម្រិតមួយដ៏ល្អបំផុតក៏ដោយ ក៏វាគឺជាការចាប់ផ្តើមប្រកបដោយជោគជ័យមួយសម្រាប់ប្រទេសក្នុងការកសាងទំនាក់ទំនងពាណិជ្ជកម្ម និងការវិនិយោគពិភពលោកឡើងវិញ។
លោកបានថ្លែងថា៖ «ដោយសារតែពីវិបត្តិជំងឺកូវីដ ១៩ មិនទាន់ចប់ ខ្ញុំយល់ថា ភ្ញៀវទេសចរជាច្រើនមិនហ៊ានវិនិយោគនៅក្រៅប្រទេសនោះទេ ព្រោះការបិទខ្ទប់ទីក្រុងអាចធ្វើទៅបានគ្រប់ពេលវេលា។ ទោះជាយ៉ាងណាក៏ដោយ ការចាប់ផ្ដើមដំណើរការជើងហោះហើរឡើងវិញនឹងល្អសម្រាប់ការវិនិយោគ និងពាណិជ្ជកម្ម»។
កាលវិភាគជើងហោះហើរនៅព្រលានយន្តហោះអន្តរជាតិទាំងបីរបស់កម្ពុជា បានបង្ហាញថា នៅចុងខែមករាមានក្រុមហ៊ុនអាកាសចរណ៍ក្នុងស្រុក និងអន្តរជាតិប្រមាណ ១០ បានប្រតិបត្តិការនៅកម្ពុជា ដោយក្រុមហ៊ុនមួយចំនួនធ្វើប្រតិបត្តិការជើងហោះហើរពី ៣ ទៅ ៤ ដងក្នុង ១ សប្តាហ៍ ដែលជាប្រេកង់មួយ ដែលលោក ស៊ិន ចាន់សេរីវុត្ថា អ្នកនាំពាក្យ រដ្ឋលេខាធិការដ្ឋានអាកាសចរស៊ីវិលចង្អុលបង្ហាញថា ជាសញ្ញាល្អមួយសម្រាប់វិស័យអាកាសចរណ៍កម្ពុជានឹងត្រឡប់ទៅរកភាពប្រក្រតីឡើងវិញនៅពេលដ៏ខ្លីខាងមុខ។
កាលពីដើមខែមីនា ក្រុមហ៊ុនអាកាសចរណ៍តម្លៃទាបចំនួន ២ របស់ប្រទេសថៃបានប្រកាសជើងហោះហើរមកកាន់ប្រទេសកម្ពុជាក្នុងគោលបំណងជំរុញទេសចរណ៍ទ្វេភាគី បន្ទាប់ពីវិបត្តិជំងឺកូវីដ ១៩ ដោយក្រុមហ៊ុនមួយក្នុងចំណោមក្រុមហ៊ុនទាំង ២ នេះទើបដំណើរការជើងហោះហើរថ្មីជាមួយប្រទេសកម្ពុជា។ នេះបើយោងតាមក្រសួងទេសចរណ៍ និងតំណាងសមាគមភ្នាក់ងារទេសចរណ៍កម្ពុជា៕ LA