.jpg)
សិក្ខាសាលាអន្តរក្រសួងដើម្បីគាំទ្រដល់ការអភិវឌ្ឍគោលនយោបាយឆ្ពោះទៅការប្រើយានយន្តអគ្គិសនីនៅកម្ពុជា។ រូបថត សហការី
ភ្នំពេញៈ ស្របពេលនិន្នាការនៃការប្រើប្រាស់រថយន្តអគ្គិសនីលើសកលលោកកំពុងកើនឡើង ក្រសួងសាធារណការ និងដឹកជញ្ជូន បានរៀបចំសិក្ខាសាលាអន្តរក្រសួងមួយដើម្បីគាំទ្រដល់ការអភិវឌ្ឍគោលនយោបាយឆ្ពោះទៅរកការប្រើប្រាស់យានយន្តអគ្គិសនីប្រកបដោយប្រសិទ្ធភាពនៅក្នុងប្រទេសកម្ពុជា។
សិក្ខាសាលាអន្តរក្រសួងនេះបានធ្វើឡើងកាលពីថ្ងៃទី ១១ ខែ មីនា ឆ្នាំ ២០២២ ក្នុងគោលបំណងគាំទ្រដល់ការអភិវឌ្ឍគោលនយោបាយឆ្ពោះទៅរកការប្រើប្រាស់យានយន្តអគ្គិសនីប្រកបដោយប្រសិទ្ធភាពនៅកម្ពុជា ដែលរៀបចំដោយអង្គការ Energylab ក្រោមកិច្ចសហការជាមួយនឹងក្រសួងសាធារណការ និងដឹកជញ្ជូន។
សិក្ខាសាលានេះ មានការចូលរួមពីតំណាងអគ្គនាយកដ្ឋានគយ និងរដ្ឋាករកម្ពុជា អគ្គិសនីកម្ពុជា និងក្រសួង ស្ថាប័នពាក់ព័ន្ធ ព្រមទាំងតំណាងឱ្យគម្រោង GIZ/SMMR និងសម្ព័ន្ធការប្រែប្រួលអាកាសធាតុកម្ពុជា។
ក្នុងសិក្ខាសាលានេះ ក្រសួងសាធារណការបានរៀបចំឱ្យមានការធ្វើបទបង្ហាញមួយចំនួនដោយផ្ដោតសំខាន់ទៅលើការរៀបចំផែនការយុទ្ធសាស្ត្រ និងវិធានការផ្សេងៗ ដើម្បីជំរុញការប្រើប្រាស់យានយន្តអគ្គិសនីនៅកម្ពុជាឱ្យច្រើនបំផុតតាមដែលអាចធ្វើទៅបាន ដើម្បីជួយកាត់បន្ថយការបំពុលបរិស្ថាន និងឧស្ម័នផ្ទះកញ្ចក់។
ក្រសួងបានឱ្យដឹងថា យោងតាមយុទ្ធសាស្ត្រអភិវឌ្ឍន៍រយៈពេលវែងប្រកបដោយអព្យាក្រឹតកាបូន កម្ពុជាប្ដេជ្ញាជំរុញការប្រើរថយន្តអគ្គិសនី និងរថយន្តក្រុងក្នុងទីក្រុងឱ្យបាន ៤០ ភាគរយ និងទោចក្រយានយន្តឱ្យបាន ៧០ ភាគរយនៅត្រឹមឆ្នាំ ២០៥០។
លោក វ៉ាស៊ឹម សុរិយា អ្នកនាំពាក្យក្រសួងសាធារណការ និងដឹកជញ្ជូន ប្រាប់ ភ្នំពេញ ប៉ុស្តិ៍ នៅថ្ងៃទី ១៣ ខែមីនាថា ក្រសួងកំពុងប្រឹងប្រែងតាមរយៈការរៀបចំសិក្ខាសាលា និងកិច្ចសហការជាមួយដៃគូអភិវឌ្ឍន៍ ដើម្បីជំរុញឱ្យមានការប្រើប្រាស់រថយន្តអគ្គិសនីនៅកម្ពុជា ដោយក្នុងនោះក្រសួងបានស្នើសុំទៅធនាគារពិភពលោក (WB) ធនាគារអភិវឌ្ឍន៍អាស៊ី (ADB) និងដៃគូដទៃទៀតឱ្យជួយកសាងស្ថានីយសាករថយន្តនៅតាមរាជធានី-ខេត្ត។
លោកបន្តថា ជាមួយគ្នានេះក្រសួងក៏ស្នើឱ្យហ៊ុនឯកជននាំចូលរថយន្តអគ្គិសនីយកមកប្រើក្នុងស្រុក តាមរយៈកិច្ចសម្រួលជាមួយស្ថាប័នគយ និងក្រសួងសេដ្ឋកិច្ច ដើម្បីលើកទឹកចិត្ត។ ជាមួយគ្នានេះក៏មានកិច្ចសហការជាមួយអគ្គិសនីកម្ពុជា ដើម្បីបំពេញសេចក្តីត្រូវការនៃការប្រើប្រាស់អគ្គិសនីនៅតាមស្ថានីយនានា។
បើតាម លោក សុរិយា ក្រៅពីនេះនៅតាមស្ថានីយប្រេងឥន្ធនៈខ្លះក៏បានស្ម័គ្រចិត្តក្នុងការកសាងស្ថានីយសាកផងដែរ។ ជាមួយគ្នានេះក្រសួងក៏បានសង់ស្ថានីយ ១០ កន្លែងរួចហើយនៅតាមខេត្តគោលដៅ ដើម្បីដំណើរការសាកល្បងនៅពេលខាងមុខ។
លោកនិយាយថា៖ «ជាទូទៅរថយន្តអគ្គិសនីមិនមែនជាគំនិតផ្តួចផ្តើមឱ្យមានការប្រើប្រាស់សម្រាប់តែនៅស្រុកយើងទេ ស្រុកគេក៏ប្រើដែរ ដោយសារតែធនធានធម្មជាតិជាពិសេស «ប្រេង»អស់នៅពេលក្រោយទៀត អ៊ីចឹងយើងត្រូវរកថាមពលផ្សេងដែលអាចជំនួសវាបាន។ ថាមពលដែលយើងអាចប្រើប្រាស់បាន គឺថាមពលអគ្គិសនី»។
លោក គី សេរីវឌ្ឍន៍ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជាបាននិយាយថា ពាក់ព័ន្ធនឹងការខិតខំរបស់ក្រសួងសាធារណការ គឺផ្តោតលើកត្តាសំខាន់ៗចំនួន ៣ រួមមាន កាត់បន្ថយការបំពុលបរិស្ថានដើម្បីឱ្យការរស់នៅរបស់មនុស្សមាននិរន្តរភាព, ការកាត់បន្ថយធនធានធម្មជាតិដែលធ្វើឱ្យការចំណាយសម្រាប់ការរស់នៅមានការកើនឡើង, និងកំណត់បរិមាណនៃការផ្គត់ផ្គង់តាមរយៈការដំឡើងតម្លៃ និងបញ្ចុះថ្លៃតាមតែអំពើចិត្ត។ ដូច្នេះគេត្រូវរកវិធីជំនួសដោយប្រើប្រាស់ធនធានធម្មជាតិទាំងនោះ និងការជំរុញឱ្យមានការកើនឡើងនូវប្រាក់ចំណូលរបស់ប្រជាពលរដ្ឋ តាមរយៈការកាត់បន្ថយការចំណាយទៅលើការធ្វើដំណើរ និងសល់ប្រាក់ដែលបានពីចំណូលក្លាយទៅជាប្រាក់សន្សំ ដើម្បីវិនិយោគទៅថ្ងៃមុខទៀត និងដើម្បីរួមចំណែកប្រើប្រាស់ទំនិញផ្សេងៗជំរុញឱ្យសេដ្ឋកិច្ចមានកំណើនតាមរយៈការកើនឡើងនៃការប្រើប្រាស់ទំនិញផ្សេងដោយកាត់បន្ថយការចំណាយទៅលើថ្លៃប្រេង៕ LA
