.jpg)
រថយន្តដឹកទំនិញពីឃ្លាំងស្តុកទៅកាន់កំពង់ផែ។ ហេង ជីវ័ន
ភ្នំពេញៈ តម្លៃភ័ស្តុភារកម្ម ឬការដឹកជញ្ជូននៅប្រទេសកម្ពុជាមិនទាន់កើនឡើងនោះទេ ទោះបីតម្លៃប្រេងឥន្ធនៈក្នុងប្រទេស និងពិភពលោកបានកើនឡើងដ៏ឆាប់រហ័សដែលបណ្តាលមកពីវិបត្តិនៃសង្គ្រាមរវាងប្រទេសរុស្ស៊ី និងប្រទេសអ៊ុយក្រែន ក៏ដោយ។ នេះបើយោងទៅតាមប្រធានសមាគមភ័ស្តុភារកម្មកម្ពុជា។ លោក ស៊ិន ចន្ធី ប្រធានសមាគមភ័ស្តុភារកម្មកម្ពុជាបានប្រាប់ភ្នំពេញប៉ុស្តិ៍នៅថ្ងៃទី ១៤ ខែមីនាថា បើគិតត្រឹមថ្ងៃទី ១៤ ខែមីនាវិស័យភ័ស្តុភារកម្មកម្ពុជាបានទទួលរងផលប៉ះពាល់ចំនួន ២ គឺការរីករាលដាលនៃជំងឺកូវីដ ១៩ ដែលបានធ្វើឱ្យសកម្មភាពនៃការដឹកជញ្ជូនធ្លាក់ចុះ និងបញ្ហានៃការកើនឡើងតម្លៃប្រេងឥន្ធនៈនាពេលថ្មីៗនេះ។
លោកបន្តថា ក្រៅពីជួបបញ្ហាដែលបណ្តាលមកពីជំងឺកូវីដ ១៩ វិស័យភ័ស្តុភារកម្មកម្ពុជា ក៏កំពុងជួបបញ្ហាប្រឈមទៅលើតម្លៃកប៉ាល់ ដែលកើនខ្ពស់ខ្លាំង ជាពិសេសការដឹកជញ្ជូនឆ្លងទ្វីប ដូចជា ទៅប្រទេសនៅសហគមន៍អឺរ៉ុប និងអាមេរិក។ លោកបន្ថែមទៀតថា មួយវិញទៀតវិស័យនេះក៏កំពុងជួបបញ្ហាកង្វះទូកុងតឺន័រផ្ទុកទំនិញ ព្រោះនៅប្រទេសដែលមានកំពង់ផែមួយចំនួនបានកកស្ទះកុងតឺន័រ និងមានការយឺតយ៉ាវនៅក្នុងការបញ្ជូនសម្បកកុងតឺន័រមកប្រើប្រាស់នៅទូទាំងពិភពលោករួមទាំងប្រទេសកម្ពុជា និងក្នុងតំបន់អាស៊ីទាំងមូល មានការខ្វះខាតទូកុងតឺន័រច្រើន។
បើតាម លោក ចន្ធី ក្នុងឆ្នាំ ២០២២ នេះ ជាពិសេសនៅចុងខែកុម្ភៈ និងដើមខែមីនា នេះវិស័យភ័ស្តុភារកម្មកម្ពុជាបានជួយបញ្ហាប្រឈមមួយទៀត គឺបញ្ហាប្រេងឥន្ធនៈឡើងថ្លៃ ដែលបង្កឡើងដោយសង្គ្រាមរវាងប្រទេសរុស្ស៊ី និងអ៊ុយក្រែន។ ការកើនឡើងតម្លៃប្រេងឥន្ធនៈកំពុងធ្វើឱ្យអ្នកធ្វើការខាងភ័ស្តុភារ និងការដឹកជញ្ជូនពិចារណាថា នឹងមានការឡើងថ្លៃបន្តិចបន្តួចទៀត ដើម្បីឱ្យរួចថ្លៃដើម ប៉ុន្តែគិតត្រឹមថ្ងៃទី ១៤ ខែមីនានេះ មិនទាន់ឡើងថ្លៃតាមប្រេងឥន្ធនៈនៅឡើយទេ។
លោកថ្លែងថា៖ «យើងចេះតែមានការអនុគ្រោះរវាងអ្នកប្រើប្រាស់ និងអ្នករកស៊ី ប៉ុន្តែឥឡូវពី ១ ថ្ងៃទៅ ១ ថ្ងៃប្រេងសាំងមិនថយចុះសោះ។ អ៊ីចឹងមិនដឹងថា ពេលណាមួយនៅពេលខ្លីខាងមុខនេះអាចនឹងមានឡើងបន្តិច ដើម្បីបង្គ្រប់នូវការចំណាយ និងដើម្បីឱ្យរួចថ្លៃដើម បើមិនដូច្នោះទេ អ្នកដឹកជញ្ជូននឹងខាតព្រោះសាំងឡើងថ្លៃ»។
លោក ម៉ែន សុភក្តិ ប្រធានក្រុមហ៊ុនវិនិយោគ សុភក្តិនីកា ដែលដាំដុះ និងនាំចេញកៅស៊ូបាននិយាយថា លោកមិនទាន់ទទួលសេចក្តីជូនដំណឹងណាមួយពីការកើនឡើងតម្លៃដឹកជញ្ជូនទំនិញពីកម្ពុជាទៅទីផ្សារក្រៅប្រទេសទេ ខណៈត្រឹមថ្ងៃទី ១៤ ខែមីនា គឺតម្លៃនៅថេរដដែល ទោះតម្លៃប្រេងឥន្ធនៈលើសកលលោកបានហក់ឡើងខ្ពស់។
លោកថ្លែងថា៖ «ទោះជាយ៉ាងណា សម្រាប់ការដឹកជញ្ជូនទំនិញនៅក្នុងស្រុកទៅកាន់ព្រំដែនភាគច្រើនគឺក្រុមហ៊ុនមានរថយន្តខ្លួនឯង ដែលបច្ចុប្បន្នក្រុមហ៊ុនចំណាយខ្ពស់ព្រោះថ្លៃប្រេងឥន្ធនៈបានហក់ឡើងខ្ពស់ជាបន្តបន្ទាប់។ ជារួម តម្លៃឡូជីស្ទិកគឺមិនមានការប្រែប្រួលនោះទេ»។
លោក គី សេរីវឌ្ឍន៍ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជាយល់ឃើញថា វិស័យដឹកជញ្ជូនរបស់កម្ពុជា មិនគួរឡើងថ្លៃទេ ព្រោះតម្លៃនៃការដឹកជញ្ជូននៅក្នុងប្រទេសកម្ពុជា វាខ្ពស់ជាងប្រទេសក្នុងតំបន់អាស៊ាន និងប្រទេសជិតខាងរួចស្រេចទៅហើយ។
លោកបន្តថា មួយវិញទៀតក្រុមហ៊ុនដឹកជញ្ជូន និងក្រុមហ៊ុនប្រេងឥន្ធនៈនៅកម្ពុជា ក៏គួរតែរួមចំណែកក្នុងការកាត់បន្ថយប្រាក់ចំណេញរបស់ខ្លួនខ្លះថែមទៀត ដើម្បីទប់តម្លៃប្រេងឥន្ធនៈកុំឱ្យឡើងលឿន និងដើម្បីរួមចំណែកជួយប្រជាពលរដ្ឋដែលកំពុងទទួលរងនូវផលប៉ះពាល់ពីបញ្ហានេះ។
លោកថ្លែងថា៖ «ក្នុងវិបត្តិនេះ គ្មាននរណាអាចជួយបាន ប៉ុន្តែក្រុមហ៊ុនប្រេងនៅតែទទួលផលចំណេញខ្ពស់នៅឡើយក្នុងការនាំចូលប្រេង។ ជាមួយគ្នានេះក្រុមហ៊ុនដឹកជញ្ជូនក៏នៅមានផលចំណេញខ្ពស់ និងនៅមានក្រុមហ៊ុនប្រេងមួយចំនួនទៀត ដោយមានការបង់ពន្ធតិចតួច និងគេចពន្ធច្រើន ដែលធ្វើឱ្យពួកគេទទួលបានប្រាក់ចំណេញខ្ពស់»។
តម្លៃអតិបរមាប្រេងឥន្ធនៈលក់រាយនៅតាមស្ថានីយទាំងអស់ សម្រាប់អនុវត្តចាប់ពីថ្ងៃទី ១ ដល់ថ្ងៃទី ១៥ ខែមីនា ឆ្នាំ ២០២២ ដែលចេញដោយក្រសួងពាណិជ្ជកម្ម គឺប្រេងសាំងធម្មតាមានតម្លៃ ៤ ៨០០ រៀលក្នុង ១ លីត្រ និង ៤ ៥០០ រៀលក្នុង ១ លីត្រសម្រាប់ប្រេងម៉ាស៊ូត៕ LA
