ភ្នំពេញៈ សមាគមធុរកិច្ចបង្កើតថ្មីអ៊ីនធឺណិតកម្ពុជា (CISA) និងសមាគមហិរញ្ញវត្ថុ និងបច្ចេកវិទ្យាកម្ពុជា (CAFT) បានចុះអនុស្សរណៈយោគយល់គ្នា (MoU) ដើម្បីលើកកម្ពស់វិជ្ជាជីវៈនិងបណ្ដុះបណ្ដាលធនធានមនុស្ស និងធុរជនក្នុងវិស័យនេះកាន់តែច្រើនបន្ថែមទៀត ដើម្បីដើរស្របរបត់សេដ្ឋកិច្ចដែលបានប្រែប្រួលយ៉ាងខ្លាំង និងមាននិន្នាការងាកទៅរកឌីជីថល បន្ទាប់ពីឆ្លងកាត់ការផ្ទុះឡើងនៃវិបត្តិកូវីដជាង ២ ឆ្នាំ។
អនុស្សរណៈយោគយល់គ្នានេះត្រូវបានចុះហត្ថលេខាកាលពីថ្ងៃទី ១២ ខែមីនា នៅក្រៅជំនួបនៃវេទិកាស្តីពីការអភិវឌ្ឍសេដ្ឋកិច្ចឌីជីថលក្រោយជំងឺកូវីដ-១៩ នៅកម្ពុជា ដែលប្រមូលផ្តុំទាំងវិស័យសាធារណៈ និងវិស័យឯកជន រួមមានក្រសួងសេដ្ឋកិច្ច និងហិរញ្ញវត្ថុ ក្រសួងប្រៃសណីយ៍ និងទូរគមនាគមន៍ ក្រុមហ៊ុន Huawei Cambodia ក្រុមហ៊ុន Zhengheng Group សមាគមហិរញ្ញវត្ថុ និងបច្ចេកវិទ្យាកម្ពុជា (CAFT)។ល។
លោក Jack Lee នាយកក្រុមប្រឹក្សាភិបាល និងជាសហស្ថាបនិក CISA ស្ថាបនិកកម្មវិធី Smile Shop App បានឱ្យដឹងថា CISA ត្រូវបានផ្តួចផ្តើមរួមគ្នាដោយក្រុមហ៊ុនឈានមុខគេរបស់ប្រទេសចិននៅក្នុងឧស្សាហកម្មអ៊ីនធឺណិតនៅកម្ពុជា រួមមានក្រុមហ៊ុន Smile Shop កម្មវិធី Gold Zone Media ក្រុមហ៊ុន58cam.comក្រុមហ៊ុន Compass Real Estate ក្រុមហ៊ុន CamHR, FOCUS DIGITAL ជាដើម។ CISA ប្ដេជ្ញាពង្រីកបណ្តាញធុរកិច្ច ធុរកិច្ចបង្កើតថ្មី និងការផ្តល់សេវាកម្មជាប់ទាក់ទងនឹងការបណ្តុះបណ្តាល ការវិនិយោគ និងហិរញ្ញវត្ថុ។
លោក Jack Lee លើកឡើងថា៖ «CISA ស្វែងរកការផ្តួចផ្តើមគំនិត កិច្ចសហការយ៉ាងជិតស្និទ្ធជាមួយសហគមន៍វិនិយោគធុរកិច្ចបង្កើតថ្មីផ្សេងទៀត និងបម្រើជាស្ពានមួយដើម្បីជួយសម្រួលដល់ការទំនាក់ទំនងក្នុងចំណោមសហគមន៍ធុរកិច្ច នៅកម្ពុជា។ តាមរយៈការនាំមុខការវិនិយោគបន្ថែមពីប្រទេសចិនឆ្ពោះទៅប្រព័ន្ធអេកូឡូស៊ីនៃឧស្សាហកម្មអ៊ីនធឺណិតកម្ពុជា យើងមានគោលបំណងផ្តល់សិទ្ធិអំណាចដល់ធុរកិច្ចបង្កើតថ្មី និងសហគ្រាសធុនតូច និងមធ្យមក្នុងស្រុក និងជួយពួកគេប្រកួតប្រជែងលើទីផ្សារក្នុងតំបន់ និងអន្តរជាតិ»។
លោក Tomas Pokorny អគ្គលេខាធិការ CAFT សហស្ថាបនិកក្រុមហ៊ុន Pi Pay បានបញ្ជាក់ពីផលប៉ះពាល់ជាវិជ្ជមានរបស់ CISA លើការផ្តល់សិទ្ធិអំណាចដល់ធុរកិច្ចបង្កើតថ្មីនៅក្នុងឧស្សាហកម្មអ៊ីនធឺណិត តាមរយៈការនាំមុខក្នុងការវិនិយោគកាន់តែច្រើន និងការសម្របសម្រួលបណ្តាញឧស្សាហកម្ម។
លោកបានចង្អុលបង្ហាញពីនិន្នាការសំខាន់ៗមួយចំនួននៅក្នុងសេដ្ឋកិច្ចឌីជីថល និងប្រព័ន្ធអេកូឡូស៊ី fintech របស់កម្ពុជា ជាឧទាហរណ៍ ការបង្កើនការទទួលយកការទូទាត់តាមឌីជីថល ការឆ្លើយតបរហ័ស (QR) កូដសម្រាប់ការទូទាត់តាមឌីជីថលនឹងត្រូវបានប្រមូលផ្តុំ និងមានលក្ខណៈស្តង់ដា អេឡិចត្រូនិកស្គាល់អ្នកប្រើប្រាស់ (E-kyc) នៅពេលខាងមុខ ពង្រឹងការទំនាក់ទំនងគ្នាតាមរយៈគម្រោងបាគង បង្កើនដំណោះស្រាយហិរញ្ញវត្ថុប្រកបនវានុវត្តន៍ ដើម្បីចាប់យកអតិថិជន និងវិស័យ MSME។
លោកបានបន្តថា៖ «ប្រទេសកម្ពុជាជាទីផ្សារតូចមួយ បើនិយាយពីចំនួនប្រជាជន ប៉ុន្តែទីផ្សារនេះកំពុងកើនឡើងយ៉ាងរស់រវើកហើយនៅតែមានសក្ដានុពលដ៏ធំសម្រាប់ចាប់យក។ និន្នាការថ្មីដែលរីកចម្រើនរហ័សថ្មីៗនឹងបង្ហាញពីឱកាសសម្រាប់វិស័យនេះក្នុងរយៈពេលមួយទសវត្សរ៍ក្រោយ»។
«ទោះបីជា វិស័យធុរកិច្ចបង្កើតថ្មីកំពុងកើនឡើងក៏ដោយ ក៏ជំងឺកូវីដ ១៩ បានធ្វើឱ្យធ្លាក់ចុះដល់ការផ្តល់មូលនិធិពីខាងក្រៅនៅកម្ពុជា។ ស្ថិតក្រោមកាលៈទេសៈនេះ កិច្ចខិតខំប្រឹងប្រែងវិនិយោគរួមមូលធនផ្ទៃក្នុងនឹងដើរតួយ៉ាងសំខាន់ក្នុងការវិនិយោគសម្រាប់ធុរកិច្ចបង្កើតថ្មី។ នេះបង្ហាញពីឱកាសសម្រាប់ចូលថ្មីពីខាងក្រៅមកក្នុងវិស័យនេះ។
លោកបានបន្តថា ឱកាសវិនិយោគលើការទូទាត់តាមទូរស័ព្ទ ធនាគារឌីជីថល និងដំណោះស្រាយហិរញ្ញវត្ថុរវាងធុរកិច្ច និងធុរកិច្ចហិរញ្ញវត្ថុវិមជ្ឈការ និងប្រតិបត្តិការហិរញ្ញវត្ថុ ក៏ដូចជារូបិយប័ណ្ណឌីជីថល (blockchain)។
លោក ជា កុកហុង អគ្គនាយករងផែនការគោលនយោបាយនៃក្រសួងសេដ្ឋកិច្ច និងហិរញ្ញវត្ថុបានលើកឡើងអំពីគោលនយោបាយរបស់រដ្ឋាភិបាល និងឱកាសវិនិយោគលើសេដ្ឋកិច្ចឌីជីថលដែលនឹងផ្តល់អត្ថប្រយោជន៍ជាច្រើនដល់អ្នក រកស៊ីក្នុងវិស័យនេះ។
លោកថ្លែងថា៖ «ចក្ខុវិស័យរបស់រាជរដ្ឋាភិបាលកម្ពុជានឹងកសាងសេដ្ឋកិច្ច និងសង្គមឌីជីថលដ៏រស់រវើក ដោយដាក់មូលដ្ឋានគ្រឹះដើម្បីលើកកម្ពស់ការទទួលយកឌីជីថល និងការផ្លាស់ប្តូរនៅក្នុងតួអង្គសង្គមទាំងអស់ រួមទាំងរដ្ឋ ប្រជាពលរដ្ឋ និងធុរជន ដើម្បីបង្កើនល្បឿនកំណើនសេដ្ឋកិច្ចថ្មី និងលើកកម្ពស់សុខុមាលភាពសង្គមតាមគន្លងប្រក្រតីភាពថ្មី»៕LA