ភ្នំពេញៈ ប្រទេសកម្ពុជារំពឹងថា នឹងទទួលបានភ្ញៀវទេសចរ វិនិយោគិន និងជើងហោះហើរកាន់តែច្រើនពីប្រទេសម៉ាឡេស៊ី បន្ទាប់ពីប្រទេសមួយនេះប្រកាសបើកព្រំដែនសម្រាប់អ្នកដំណើរអន្តរជាតិឡើងវិញចាប់ពីថ្ងៃទី ១ ខែមេសា ឆ្នាំ ២០២២។ បច្ចុប្បន្នមានក្រុមហ៊ុនអាកាសចរណ៍ចំនួន ២ ប៉ុណ្ណោះដែលកំពុងតែធ្វើប្រតិបត្តិការហោះហើរប្រចាំសប្តាហ៍រវាងទីក្រុងគូឡាឡាំពួរ-ភ្នំពេញ។
លោក ស៊ិន ចាន់សេរីវុត្ថា អ្នកនាំពាក្យនៃរដ្ឋលេខាធិការដ្ឋានអាកាសចរស៊ីវិល ប្រាប់ភ្នំពេញប៉ុស្តិ៍នៅថ្ងៃទី ១៥ ខែមីនាថា បច្ចុប្បន្ន ជើងហោះហើរពីទីក្រុងគូឡាឡាំពួរ មកទីក្រុងភ្នំពេញ មានតែ ២ ប៉ុណ្ណោះ គឺក្រុមហ៊ុនអាកាសចរណ៍ AirAsia និងក្រុមហ៊ុន Malay-sia Airlines ដែលកំពុងប្រតិបត្តិការហោះហើរប្រចាំសប្តាហ៍ ប៉ុន្តែមិនសូវមានភ្ញៀវទេ។ លោកបន្តថា នៅពេលប្រទេសម៉ាឡេស៊ីបើកដំណើរការសេដ្ឋកិច្ចឡើងវិញ កម្ពុជានឹងទទួលបានជើងហោះហើរកាន់តែច្រើនថែមទៀតពីប្រទេសនេះ ព្រោះបច្ចុប្បន្នភ្ញៀវមានការព្រួយបារម្ភពីការធ្វើចត្តាឡីស័ក ដូច្នេះពួកគេមិនសូវហ៊ានធ្វើដំណើរឆ្លងកាត់ទេ ប៉ុន្តែបើបើកប្រទេសដូចកម្ពុជាអាចនឹងមានភ្ញៀវធ្វើដំណើរឆ្លងកាត់ចេញ-ចូលកាន់តែច្រើន។
បើតាម លោក ចាន់សេរីវុត្ថា ក្រៅពីក្រុមហ៊ុនអាកាសចរណ៍ AirAsia និងក្រុមហ៊ុន Malaysia Airlines កាលពីមុនក៏មានក្រុមហ៊ុនអាកាសចរណ៍ Malindo Air បានបើកប្រតិបត្តិការហោះហើរដែរ ប៉ុន្តែបានផ្អាកវិញដោយសារអ្នកធ្វើដំណើរមានចំនួនតិច និងទីផ្សារមិនទាន់ល្អប្រសើរ។ ទោះយ៉ាងណានៅពេលភ្ញៀវមានចំនួនច្រើនវិញក្រុមហ៊ុនអាកាសចរណ៍នេះ និងក្រុមហ៊ុនផ្សេងទៀតនឹងបើកការហោះហើរមកកាន់កម្ពុជា។
លោកបន្ថែមថា តាមស្ថានភាពជាក់ស្តែងនាពេលនេះ កម្ពុជាទទួលបានភ្ញៀវធ្វើដំណើរក្នុងរង្វង់ ១ ០០០ ទៅជាង ១ ០០០ នាក់ប៉ុណ្ណោះក្នុង ១ ថ្ងៃ ដែលភាគច្រើនមកពីតំបន់អាស៊ាន អាស្រ័យទៅលើការប្រតិបត្តិការហោះហើររបស់ក្រុមហ៊ុនអាកាសចរណ៍ ព្រោះក្រុមហ៊ុនអាកាសចរណ៍ខ្លះបានហោះហើរ ២ ជើង និងក្រុមហ៊ុនខ្លះហោះហើរច្រើនជើង។
លោកថ្លែងថា៖ «ក្រុមហ៊ុនខ្លះហោះ ២ ជើង និងក្រុមហ៊ុនខ្លះហោះ ៣ ជើងក្នុង ១ សប្តាហ៍ ភាគច្រើនមកពីតំបន់អាស៊ានដែលមាន Flights ច្រើនជាងគេ ព្រោះតំបន់អាស៊ានបានតភ្ជាប់ជើងហោះហើររួចអស់ហើយ ដូចជាម៉ាឡេស៊ី ថៃ សិង្ហបុរី វៀតណាម និងប្រទេសមួយទៀត»។
ស្ថានឯកអគ្គរាជទូតកម្ពុជាប្រចាំប្រទេសម៉ាឡេស៊ីកាលពីថ្ងៃទី ៩ ខែមីនា ឆ្នាំ ២០២២ ឱ្យដឹងថា ដោយពិចារណាផ្អែកលើវិទ្យាសាស្ត្រ និងភាពជាក់ស្ដែងពាក់ព័ន្ធនឹងជំងឺកូវីដ ១៩ ក៏ដូចជាការបើកព្រំដែនឡើងវិញរបស់ប្រទេសដទៃទៀត និងដើម្បីស្ដារសេដ្ឋកិច្ចឡើងវិញ ជាពិសេសឧស្សាហកម្មទេសចរណ៍ដែលបានរងផលប៉ះពាល់ខ្លាំងពីជំងឺកូវីដ ១៩ រដ្ឋាភិបាលម៉ាឡេស៊ីសម្រេចបើកព្រំដែនសម្រាប់អ្នកដំណើរអន្តរជាតិឡើងវិញ ដែលនឹងចាប់អនុវត្តពីថ្ងៃទី ១ ខែមេសា ឆ្នាំ ២០២២ តទៅ។
លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជាបានស្វាគមន៍ចំពោះការសម្រេចបើកព្រំដែនរបស់រដ្ឋាភិបាលម៉ាឡេស៊ី ដែលនឹងធ្វើឱ្យមានចំនួនអ្នកដំណើរ និងការភ្ជាប់ជើងហោះហើរកាន់តែច្រើនរវាងទីក្រុងគូឡាឡាំពួរ មកប្រទេសកម្ពុជា និងជាសញ្ញាល្អសម្រាប់វិស័យទេសចរណ៍កម្ពុជាផងដែរ។
លោកស្រីបន្តថា វិស័យទេសចរណ៍ដែលអាចដំណើរការទៅបានអាស្រ័យទៅលើការចូលរួមពីវិស័យដឹកជញ្ជូនដែលមានលក្ខណៈសម្បូរបែប និងមកពីគ្រប់ទិសទីទាំងក្នុងតំបន់ និងពិភពលោក រួមជាមួយនឹងការផ្តល់ជម្រើសច្រើនសម្រាប់ភ្ញៀវទេសចរ ព្រោះភ្ញៀវមិនអាចធ្វើដំណើរថ្មើរជើងបានទេ។ ដូច្នេះការដឹកជញ្ជូនតាមផ្លូវអាកាសនេះ គឺមានសារៈសំខាន់ណាស់។
លោកស្រីថ្លែងថា៖ «ដូច្នេះការបើកប្រទេស និងមានជើងហោះហើរឡើងវិញនេះ នឹងអាចជួយសម្រួលដល់ភ្ញៀវទេសចរដែលមានបំណងចង់ចេញមកកម្ពុជា ព្រោះកន្លងមកគាត់មកអត់រួច ដោយសារមានការរឹតត្បិត និងការហោះហើរមានការរឹតត្បិត ប៉ុន្តែឥឡូវមានការដកចេញហើយ ដែលវានឹងជំរុញឱ្យមានការហោះហើរឡើងវិញ ហើយវាក៏នឹងជួយឱ្យយើងទទួលបានអត្ថប្រយោជន៍ពីការទទួលភ្ញៀវទេសចរមកកាន់កម្ពុជាដែរ»៕ LA