.jpg)
ភ្ញៀវទេសចរដើរលេងកម្សាន្តនៅរមណីយដ្ឋានវត្តភ្នំក្នុងរាជធានីភ្នំពេញ។ ហេង ជីវ័ន
ភ្នំពេញៈ ក្រសួងទេសចរណ៍បើកកិច្ចប្រជុំលើកដំបូងជាមួយក្រុមការងារប្រតិបត្តិ ដើម្បីវាយតម្លៃ និងគ្រប់គ្រងតំបន់គោលដៅទេសចរណ៍សុវត្ថិភាពរាជធានីភ្នំពេញ ដើម្បីសិក្សាវាយតម្លៃ តាមដាន ចងក្រងរបាយការណ៍សម្រាប់គោលដៅរាជធានីភ្នំពេញ។
លោក ជា បូរ៉ា រដ្ឋលេខាធិការក្រសួងទេសចរណ៍ និងជាប្រធានក្រុមការងារប្រតិបត្តិ ដើម្បីវាយតម្លៃ និងគ្រប់គ្រងតំបន់គោលដៅទេសចរណ៍សុវត្ថិភាពរាជធានីភ្នំពេញបានលើកឡើងថា រាជរដ្ឋាភិបាលបានសម្រេចបង្កើត «ក្រុមការងាររាជរដ្ឋាភិបាល និងឯកជន ដើម្បីស្ដារ និងលើកស្ទួយវិស័យទេសចរណ៍កម្ពុជា ក្នុង និងក្រោយវិបត្តិជំងឺកូវីដ ១៩»។
លោកបន្ថែមថា ក្រុមការងារនេះមានតួនាទី និងភារកិច្ចដឹកនាំ ចាត់ចែង និងតាមដានត្រួតពិនិត្យការអនុវត្តផែនទីចង្អុលផ្លូវ (Roadmap) ស្ដីពីផែនការស្ដារ និងលើកស្ទួយវិស័យទេសចរណ៍កម្ពុជាក្នុង និងក្រោយវិបត្តិកូវីដ ១៩ ដើម្បីស្តារវិស័យទេសចរណ៍ដែលបានទទួលរងផលប៉ះពាល់ក្នុងវិបត្តិជំងឺកូវីដ-១៩ ខណៈវិស័យនេះធ្លាប់ដើរតួនាទីជាចន្ទល់នៃកំណើនសេដ្ឋកិច្ចដ៏សំខាន់។
លោកបញ្ជាក់ថា៖ «ក្រុមការងារប្រតិបត្តិដើម្បីវាយតម្លៃ និងគ្រប់គ្រងតំបន់គោលដៅទេសចរណ៍សុវត្ថិភាពរាជធានីភ្នំពេញបានឯកភាពដាក់ចេញទិសដៅការងារមួយចំនួនរួមមាន ការបន្ត និងជំរុញបន្ថែមលើការងារវាយតម្លៃទីផ្សារទេសចរណ៍អន្តរជាតិ ដែលគួរស្រូបទាញយកក្នុងដំណាក់កាលនេះ ដោយបច្ចុប្បន្នទីផ្សារទេសចរណ៍ពិតជាមានការប្រកួតប្រជែងស្រួចស្រាល់បំផុត និងកាន់តែតូចចង្អៀត, បន្តធ្វើការសហការឱ្យបានជាប់ជាប្រចាំជាមួយផ្នែកពាក់ព័ន្ធ ជាពិសេសរដ្ឋលេខាធិការដ្ឋានអាកាសចរស៊ីវិល និងអន្តោប្រវេសន៍, បន្តពង្រឹងការនុវត្តវិធានសុវត្ថិភាពទេសចរណ៍ និងនីតិវិធីប្រតិបត្តិស្ដង់ដាអប្បបរមាសម្រាប់អាជីវកម្មទេសចរណ៍ ជាដើម»។
លោក ម៉េត មាសភក្តី អ្នកនាំពាក្យរដ្ឋបាលសាលារាជធានីភ្នំពេញបានប្រាប់ភ្នំពេញប៉ុស្តិ៍ នៅថ្ងៃទី ១៦ ខែមីនា ថា បទដ្ឋានគតិយុត្តផ្សេងៗ ដើម្បីទប់ស្កាត់ការរីករាលដាលកូវីដ ១៩ ត្រូវបានអាជ្ញាធររាជធានីរៀបចំ ដើម្បីដាក់ចេញ ដោយយោងតាមការណែនាំពីក្រសួងទេសចរណ៍ និងក្រសួងសុខាភិបាល។
លោកបន្ថែមថា ការអនុវត្តវិធានការសុវត្ថិភាពទាំងនោះបានផ្តោតជាសំខាន់ទៅទីតាំងអាជីវកម្មទេសចរណ៍ ឬទីតាំងរមណីយដ្ឋាននានា ដែលបម្រើសេវាដល់ភ្ញៀវទេសចរ។
លោកនិយាយថា៖ «ជាញឹកញយ ឯកឧត្តមអភិបាលតែងធ្វើការក្រើនរំឭកដល់អាជ្ញាធរតាមខណ្ឌ ចុះត្រួតពិនិត្យដោយសហការជាមួយមន្ទីរទេសចរណ៍ ដើម្បីអនុវត្តស្តង់ដាទេសចរណ៍សុវត្ថិភាព។ យើងឃើញថា ភាគច្រើន គឺអនុវត្តបានល្អ នៅមានខ្វះចន្លោះតិចតួចប៉ុណ្ណោះ ខណៈដែលអាជ្ញាធររបស់យើង ក៏នៅតែបន្តខិតខំត្រួតពិនិត្យដើម្បីបញ្ចៀសការរីករាលដាលជំងឺកូវីដ ១៩ នេះឡើងវិញ»។
ទីប្រឹក្សាសមាគមទីភ្នាក់ងារទេសចរណ៍កម្ពុជា លោក ហូ វណ្ឌី បានឱ្យដឹងថា នៅមុនកូវីដ-១៩ផ្ទុះឡើង រាជធានីភ្នំពេញបានស្រូបយកភ្ញៀវទេសចរអន្តរជាតិចន្លោះពី ៥០ ទៅ ៦០ ភាគរយ ដោយសារតែភ្នំពេញជាបេះដូងនៃប្រទេសកម្ពុជា។
លោកបានអះអាងថា៖ «បទពិសោធ ២ ឆ្នាំនៅក្នុងបរិបទកូវីដ ១៩ ខ្ញុំយល់ថា គ្រប់វិស័យទាំងអស់បានបន្សាំខ្លួនជាមួយជំងឺនេះហើយ ដោយគ្រប់គ្នាចាប់ផ្តើមរៀនរស់នៅជាមួយវា។ ប៉ុន្តែសម្រាប់ការបើកទទួលទេសចរអន្តរជាតិ ដើម្បីសម្រេចផែនការដែលបានដាក់ចេញកន្លងមក គឺទាល់តែដករនាំងកូវីដចេញ មានន័យថា ការកាត់បន្ថយថ្ងៃធ្វើចត្តាឡីស័ក ការតេស្តជាដើម ប៉ុន្តែស្ថិតនៅក្នុងការអនុវត្តវិធានការ ៣ កុំ ៣ ការពារទើបវិស័យទេសចរណ៍កម្ពុជាមានសង្ឃឹម»៕ LA
