ទីក្រុងអាប៊ូ ដាប៊ីៈ នាយករដ្ឋមន្ត្រីអង់គ្លេសលោក Boris Johnson នឹងបញ្ចុះបញ្ចូលថ្នាក់ដឹកនាំប្រទេសអារ៉ាប៊ីសាអ៊ូឌីត និងអារ៉ាប់រួម (UAE) ឱ្យបង្កើនការបូមប្រេងបន្ថែម ទៀត ដើម្បីរម្ងាប់ទីផ្សារប្រេងដែលមានភាពច្របូកច្របល់ នៅពេលលោកជួបជាមួយថ្នាក់ដឹកនាំរដ្ឋនៅតំបន់ឈូងសមុទ្រក្នុងមជ្ឈិមបូព៌ាកាលពីថ្ងៃពុធ។
លោក Johnson បានមកដល់ទីក្រុង Abu Dhabi ដើម្បីពិភាក្សាជាមួយព្រះអង្គម្ចាស់ Mohammed bin Zayed ហើយគ្រោងនឹងបន្តដំណើរទៅកាន់ទីក្រុង Riyadh នៅពេលក្រោយ ខណៈដែលប្រទេសលោកខាងលិចស្វែងរកការបញ្ចប់ការពឹងផ្អែកលើប្រេងរបស់រុស្ស៊ី បន្ទាប់ពីការលុកលុយលើប្រទេសអ៊ុយក្រែន។
ដំណើរទស្សនកិច្ចរបស់នាយករដ្ឋមន្ត្រីអង់គ្លេស ខណៈពេលដែលតម្លៃប្រេងមើលឃើញនូវការប្រែប្រួលយ៉ាងខ្លាំង ស្របពេលជាមួយនឹងការថ្កោលទោសជាថ្មីនៃកំណត់ត្រាសិទ្ធិមនុស្សរបស់ប្រទេសអារ៉ាប៊ី សាអ៊ូឌីត បន្ទាប់ពីបុរស ៨១ នាក់ត្រូវបានកាត់ទោសប្រហារជីវិតដ៏ធំមួយកាលពីថ្ងៃសៅរ៍។
នាយករដ្ឋមន្ត្រីអង់គ្លេសក៏នឹងជួបជាមួយមេដឹកនាំអារ៉ាប៊ី- សាអ៊ូឌីត គឺព្រះអង្គម្ចាស់ Mohammed bin Salman ផងដែរ ខណៈដែលគាត់ក្លាយជាមេដឹកនាំ ១ រូបក្នុងចំណោមមេដឹកនាំបស្ចិមប្រទេសមួយចំនួនដែលមកបំពេញទស្សនកិច្ចនៅទីក្រុងរីយ៉ាដ ចាប់តាំងពីការសម្លាប់អ្នកកាសែតអារ៉ាប៊ី សាអ៊ូឌីត ឈ្មោះ Jamal Khashoggi ឆ្នាំ ២០១៨។
ប្រធានាធិបតីអាមេរិក Joe Biden និងព្រះអង្គម្ចាស់ Mohammed មិនទាន់បាននិយាយគ្នានៅឡើយទេ ចាប់តាំងពីលោក Biden ឈានជើងចូលសេតវិមានហើយបានប្តេជ្ញាថានឹងចាត់ទុកព្រះរាជាណាចក្រជារដ្ឋ «pariah» (ជារដ្ឋឯកោ ឬក៏អាចរងទណ្ឌកម្ម ឬក៏អាចលុកលុយដោយកម្លាំងអន្តរជាតិ) ជុំវិញការសម្លាប់លោក Khashoggi ដែលភា្នក់ងារ CIA បានស្តីបន្ទោសទៅលើរាជវង្ស អារ៉ាប៊ី សាអ៊ូឌីត។
អ្នកនាំពាក្យរបស់មេដឹកនាំចក្រភពអង់គ្លេសបានទទូចថា លោកនឹងលើកឡើងពីកង្វល់សិទ្ធិមនុស្ស និងការប្រហារជីវិតនាពេលថ្មីៗនេះ ហើយនឹងស្នើឱ្យលោក Bin Salman ថ្កោលទោសប្រធានាធិបតីរុស្ស៊ីលោក Vladimir Putin ជុំវិញការវាយលុករបស់ខ្លួនលើប្រទេសអ៊ុយក្រែន។
អារ៉ាប៊ី សាអ៊ូឌីត និង UAE ដែលជាប្រទេសនាំចេញប្រេងធំបំផុតរបស់ពិភពលោក ហើយប្រទេសទាំង ២ មានទំនាក់ទំនងជាមួយរុស្ស៊ី រហូតមកដល់ពេលនេះបានគេចពីគោលជំហរប្រឆាំងនឹងប្រទេសរុស្ស៊ី។
ប៉ុន្តែ លោក Johnson បាននិយាយមុនពេលចាកចេញថា ផលប៉ះពាល់នៃការវាយប្រហារ «ដ៏ឃោរឃៅ និងមិនមានការបង្កហេតុ» របស់ប្រធានាធិបតីរុស្ស៊ី Vladimir Putin នឹងមានអារម្មណ៍លើសពីអឺរ៉ុប។
លោកបានបន្ថែមថា នៅពេលដែលទណ្ឌកម្មរបស់បណ្តាប្រទេសលោកខាងលិចចាប់ផ្តើមខាំ សម្ព័ន្ធអន្តរជាតិថ្មីមួយគឺត្រូវការជាចាំបាច់ ដើម្បីទូទាត់ផលប៉ះពាល់របស់ពួកគេទៅលើអ្នកប្រើប្រាស់ដែលរងសម្ពាធពីការកើនឡើងពីអតិផរណា និងការកើនឡើងនៃតម្លៃរស់នៅ។
លោកបាននិយាយនៅក្នុងសេចក្តីថ្លែងការណ៍មួយថា៖ «ពិភពលោកត្រូវតែផ្តាច់ខ្លួនចេញពីអ៊ីដ្រូកាបូនរបស់រុស្ស៊ី និងធ្វើឱ្យលោក ពូទីន ស្រេកឃ្លាន ចំពោះប្រេង និងឧស្ម័ន»។
លោកនាយករដ្ឋមន្ត្រីអង់គ្លេសថា៖ «អារ៉ាប៊ី សាអ៊ូឌីត និងអេមីរ៉ាត អារ៉ាប់រួមគឺជាដៃគូអន្តរជាតិដ៏សំខាន់នៅក្នុងកិច្ចខិតខំប្រឹងប្រែងជាអន្តរជាតិនោះ»។
លោកបន្ថែម៖ «យើងនឹងធ្វើការជាមួយពួកគេដើម្បីធានាសន្តិសុខក្នុងតំបន់ គាំទ្រកិច្ចខិតខំប្រឹងប្រែងសង្គ្រោះមនុស្សធម៌ និងធ្វើឱ្យទីផ្សារថាមពលពិភពលោកមានស្ថិរភាពសម្រាប់រយៈពេលវែងជាងនេះ»។
ការិយាល័យរបស់ Johnson បាននិយាយថា អារ៉ាប់រួម និងអារ៉ាប៊ី សាអ៊ូឌីត គឺជាដៃគូសេដ្ឋកិច្ចដ៏ធំបំផុត ២ របស់ចក្រភពអង់គ្លេសនៅក្នុងតំបន់ជាមួយនឹងពាណិជ្ជកម្មទ្វេភាគីមានតម្លៃ ១២,២ ពាន់លានផោន (១៥,៩ ពាន់លានដុល្លារ ១៤,៥ ពាន់លានអឺរ៉ូ) និង ១០,៤ ពាន់លានផោនក្នុងឆ្នាំ ២០២០៕ RR
វីដេអូ៖