ទីក្រុងញូវយ៉កៈ តម្លៃប្រេងបានធ្លាក់ចុះកាលពីថ្ងៃអង្គារដោយសារតែចិនជាប្រទេសប្រើប្រាស់ថាមពលដ៏សំខាន់មួយ បានដាក់មនុស្សជិត ៣០ លាននាក់នៅស្ថិតក្រោមការបិទខ្ទប់ ដោយសារតែជំងឺកូវីដ ១៩ ហើយតម្លៃផ្សារភាគហ៊ុនហុងកុង និងចិនដីគោកបានធ្លាក់ចុះ ខណៈដែលតម្លៃភាគហ៊ុននៅតំបន់ហិរញ្ញវត្ថុ Wall Street កើនឡើង។
តម្លៃប្រេងឆៅ Brent ក្នុងកិច្ចសន្យាបានបញ្ចប់ក្រោមតម្លៃ ១០០ ដុល្លារក្នុង ១ បារ៉ែលជាលើកដំបូងក្នុងរយៈពេលជិត ៣ សប្តាហ៍ ដែលឆ្លុះបញ្ចាំងពីការបារម្ភអំពីចក្ខុវិស័យសម្រាប់ប្រទេសមានសេដ្ឋកិច្ចឈានមុខគេទី ២ របស់ពិភពលោកមួយនេះ នៅពេលដែលប្រទេសប្រឈមមុខនឹងការកើនឡើងជំងឺកូវីដ ១៩ នៅពេលថ្មីៗនេះ។
លោក Patrick O''Hare អ្នកវិភាគនៅគេហទំព័រ Briefing.com បានថ្លែងថា៖ «យើងមានព័ត៌មានល្អ និងមិនល្អ»។
លោក O''Hare បានបន្តថា៖ «ព័ត៌មានល្អគឺថាតម្លៃប្រេងធ្លាក់ចុះយ៉ាងខ្លាំង... ព័ត៌មានអាក្រក់គឺថាការតម្លៃប្រេងធ្លាក់ចុះយ៉ាងខ្លាំង គឺដោយសារតែការបារម្ភអំពីកំណើនបើវានៅបន្តវាមិនល្អសម្រាប់ចក្ខុវិស័យកំណើនប្រាក់ចំណូលនោះទេ»។
ប្រទេសចិនបានរាយការណ៍ករណីជំងឺកូវីដ ១៩ ថ្មីចំនួន ៥២៨០ កាលពីថ្ងៃអង្គារដែលច្រើនជាងទ្វេដងនៃចំនួនសរុបកាលពីថ្ងៃមុន ដោយសារវីរុសបំប្លែងថ្មីអូមីក្រុងដែលអាចឆ្លងរហ័ស រីករាលដាលនៅទូទាំងប្រទេស ដែលបានប្រកាន់យ៉ាងតឹងរ៉ឹងជាមួយនឹងយុទ្ធសាស្ត្រជំងឺកូវីដ-១៩សូន្យ។
លោក Louise Dickson អ្នកវិភាគនៅក្រុមហ៊ុន Rystad Energy បានឱ្យដឹងថា ការរឹតបន្តឹងយ៉ាងខ្លាំងរបស់ប្រទេសចិនអាចធ្វើឱ្យប្រេងចំនួន ៥០០ ពាន់បារ៉ែលក្នុង ១ ថ្ងៃស្ថិតក្នុងហានិភ័យ។
លោក Dickson បានថ្លែងថា៖ «ហានិភ័យនៃតម្រូវការប្រេងរបស់ប្រទេសចិនគឺមានពិតប្រាកដ»។ លោកបន្ថែមថា ប្រាក់ដុល្លារកើនឡើងតម្លៃក៏បានដាក់សម្ពាធលើតម្លៃប្រេងឆៅ ដោយសារតែប្រេងត្រូវបានជួញដូរជាប្រាក់ដុល្លារ។
ក្រុមហ៊ុន Rystadបានព្រមានថាការធ្លាក់ចុះនៃតម្លៃប្រេងអាច «មានរយៈពេលខ្លី» ដោយសារស្ថានភាពតឹងតែងនៃស្តុកប្រេងឆៅសកល និងភាពមិនច្បាស់លាស់ដែលកំពុងបន្តជុំវិញប្រេងឆៅរបស់រុស្ស៊ី។
ក្នុងចំណោមទីផ្សារដែលរងផលប៉ះពាល់ខ្លាំងបំផុត គឺផ្សារហ៊ុនហុងកុងដែលស្ថិតនៅក្រោមសម្ពាធរួចហើយពីការបង្ក្រាបផ្នែកបទប្បញ្ញត្តិរបស់ប្រទេសចិនលើក្រុមហ៊ុនបច្ចេកវិទ្យាដែលជាផ្នែកនៃវិធានការរបស់រដ្ឋាភិបាលក្នុងការរឹតបន្តឹងការគ្រប់គ្រងរបស់ខ្លួនលើសេដ្ឋកិច្ច។
ក្រុមពាណិជ្ជករក៏មានការបារម្ភផងដែរ ចំពោះក្រុមហ៊ុនចិនអាចប្រឈមមុខនឹងទណ្ឌកម្មរបស់ប្រទេសលោកខាងលិច ខណៈដែលអាមេរិក និងសម្ព័ន្ធមិត្តអឺរ៉ុបរបស់ខ្លួនដាក់សម្ពាធលើទីក្រុងប៉េកាំងឱ្យដកជំនួយរបស់ខ្លួនចេញពីប្រទេសរុស្ស៊ីដែលឯកោ បន្ទាប់ពីការលុកលុយលើអ៊ុយក្រែន។
នៅតំបន់ហិរញ្ញវត្ថុ Wall Street ភាគហ៊ុនបានបើកការជួញដូរកើនឡើងជាងការរំពឹងទុក និងទទួលបានសម្ទុះកើនឡើងពេញ ១ វគ្គជួញដូរដោយសារការធ្លាក់ចុះនៃតម្លៃប្រេងបានបង្ហាញពីការមិនផ្លាស់ប្តូរ។
លោក Adam Sarhan នៅក្រុមហ៊ុន 50 Park Investments បានប្រាប់ថា៖ «ទីផ្សារកំពុងមានភាពធូរស្រាលបន្តិច ដែលតម្លៃទំនិញភាគច្រើនជាអាហារ និងថាមពល និងគ្រាប់ធញ្ញជាតិកំពុងធ្លាក់ចុះ»។
លោក Sarhan បានថ្លែងថា៖ «ទន្ទឹមនឹងនេះអ្នកមានអ្នកដេញថ្លៃបង្ហាញខ្លួនហើយ»។ លោកបន្តថា៖ «យើងត្រូវបានលក់លើសចំនួន ហើយតម្លៃផ្សារហ៊ុនត្រូវបានកំណត់សម្រាប់ការកើនឡើងដ៏ល្អមួយ»៕ LA