ប្រទេសប្រេស៊ីលៈ រដ្ឋាភិបាលប្រេស៊ីលនៅដើមសប្តាហ៍បានធានាចំពោះអាមេរិកថា ខ្លួននឹងបង្កើនការផលិតប្រេង ជាការសម្រេចចិត្តមួយ ដែលអាចជួយបន្ធូរបន្ថយការបារម្ភជុំវិញការផ្គត់ផ្គង់ប្រេងឆៅជាសកល បន្ទាប់ពីការលុកលុយរបស់រុស្ស៊ីលើប្រទេសអ៊ុយក្រែន។
លោក Bento Albuquerque រដ្ឋមន្ត្រីក្រសួងរ៉ែ និងថាមពលរបស់ប្រទេសប្រេស៊ីលបានឱ្យដឹងថា លោកបានថ្លែងទៅកាន់សមភាគីអាមេរិករបស់លោក គឺ លោកស្រី Jennifer Granholm រដ្ឋមន្ត្រីក្រសួងថាមពល ហើយបានបញ្ជាក់ថា ប្រទេសប្រេស៊ីលនឹងស្វែងរកការបង្កើនទិន្នផលប្រេងរបស់ខ្លួន។
លោក Albuquerque បានឱ្យដឹងនៅក្នុងរបាយការណ៍មួយដែលក្រសួងបានផ្ញើទៅទីភ្នាក់ងារព័ត៌មាន AFP ថា៖ «លោកស្រីបានសួរខ្ញុំថា តើប្រទេសប្រេស៊ីលអាចជាផ្នែកមួយនៃកិច្ចខិតខំប្រឹងប្រែងនេះ (ដើម្បីផលិតប្រេងបន្ថែមទៀត) ដែរឬទេ? ខណៈពេលដែលប្រទេសជាសមាជិកអង្គការសហប្រតិបត្តិការសេដ្ឋកិច្ច និងអភិវឌ្ឍន៍ (OECD) ភាគច្រើនបានកាត់បន្ថយការផលិត។ យើងបានបង្កើនផលិតកម្មរបស់យើងក្នុងរយៈពេល ៣ ឆ្នាំចុងក្រោយនេះ»។
ក្នុងអំឡុងពេលសន្ទនា លោកស្រី Granholm បានពន្យល់ថា បណ្ដាប្រទេសផ្សេងទៀតកំពុងធ្វើការសម្រេចចិត្តស្រដៀងគ្នា ដើម្បីចៀសវាងការប្រែប្រួលកាន់តែខ្លាំងនៅក្នុងទីផ្សារប្រេងពិភពលោក។
ក្រសួងរ៉ែ និងថាមពលមិនបានផ្តល់ព័ត៌មានលម្អិតបន្ថែមអំពីចំនួនប៉ុន្មាន ដែលខ្លួនមានបំណងបង្កើនផលិតកម្ម ឬនៅពេលណានោះទេ។
ប្រទេសប្រេស៊ីលស្ថិតក្នុងចំណោមប្រទេសផលិតប្រេងឈានមុខគេទាំង ១០ នៅលើពិភពលោក ដែលផលិតកម្មរបស់ប្រទេសនេះមានប្រហែល ៣ លានបារ៉ែលក្នុង ១ ថ្ងៃ។
តម្លៃគោលប្រេងឆៅ Brent ដែលបានកើនឡើងដល់តម្លៃជិតដល់កម្រិតខ្ពស់បំផុត ១៤០ ដុល្លារក្នុងមួយបារ៉ែល កាលពីថ្ងៃទី ៧ ខែមីនាបានបិទការជួញដូរកាលពីព្រឹកថ្ងៃចន្ទ ក្នុងចំនួន ១០៦,៩០ ដុល្លារ។
បន្ទាប់ពីការប្រកាស ការដាក់ទណ្ឌកម្មសេដ្ឋកិច្ច លើការនាំចូលឥន្ធនៈហ្វូស៊ីលពីប្រទេសរុស្ស៊ីជាការដាក់ទណ្ឌកម្ម ដោយសារតែការលុកលុយរបស់ខ្លួនលើប្រទេសអ៊ុយក្រែន លោកប្រធានាធិបតីអាមេរិក ចូ បៃដិន កំពុងស្វែងរកមធ្យោបាយ ដើម្បីកាត់បន្ថយសម្ពាធលើតម្លៃប្រេងដែលស្ថិតក្នុងកម្រិតមួយខ្ពស់រួចទៅហើយ មុនពេលជម្លោះនេះចាប់ផ្តើម៕ LA