ភ្នំពេញៈ ក្រសួងកសិកម្ម កំពុង​រៀបចំ​សេចក្តី​ព្រាងច្បាប់​ស្តីពី «​ការការពារ​រុក្ខជាតិ និង​ភូតគាម​អនាម័យ​» ដើម្បី​ឆ្លើយតប​ទៅនឹង​ការនាំចេញ​កសិផល​កម្ពុជា​ទៅ​ទីផ្សារ​អន្តរជាតិ​ឱ្យ​ស្របតាម​លក្ខខណ្ឌ​ភូតគាម​អនាម័យ និង​ទប់ស្កាត់​កសិផល និង​រុក្ខជាតិ ដែល​អាចមាន​សត្វល្អិត​ចង្រៃ សារធាតុ​គីមី និង​ថ្នាំ​សម្លាប់​សត្វល្អិត ហូរ​ចូលមក​កាន់​ប្រទេស​កម្ពុជា​។

កាលពី​ថ្ងៃទី​ ១៦ ខែមីនា ឆ្នាំ​ ២០២២ នា​វិមាន​រដ្ឋសភា​នៅ​ចំពោះមុខ​គណៈកម្មការ​ទី ៣ និង​គណៈកម្មការ​ជំនាញ​ផ្សេងៗ​ទៀត​នៃ​រដ្ឋសភា លោក វេង សាខុន រដ្ឋមន្ត្រី​ក្រសួង​កសិកម្ម រុក្ខាប្រមាញ់ និង​នេសាទ​បាន​និយាយថា សេចក្តី​ព្រាងច្បាប់​នេះ គឺជា​សមិទ្ធផល​ថ្មី​មួយទៀត ដែល​ក្រសួង​កសិកម្ម​បាន​ខិតខំ​កសាង​ដោយមាន​អគ្គនាយកដ្ឋាន​កសិកម្ម​ជា​សេនាធិការ​ក្នុង​គោលបំណង​ចាំបាច់​មួយ គឺ​រៀបចំ​ចងក្រង​ឯកសារ​គតិយុត្ត​ពេញលេញ​មួយ និង​មានអំណាច​គ្រប់គ្រាន់​លើ​វិសាលភាព​នៃ​ការនាំចេញ​កសិផល​កម្ពុជា​ទៅកាន់​ទីផ្សារ​អន្តរជាតិ​។

លោក វេង សាខុន បាន​បញ្ជាក់ថា​៖ «​គោលបំណង​នៃ​សេចក្តី​ព្រាងច្បាប់​នេះ​គឺ​ធានា​ដល់​ការគ្រប់គ្រង ការការពារ​រុក្ខជាតិ និង​ភូតគាម​អនាម័យ​លើ​កសិផល​ទាំង​នាំចេញ និង​នាំចូល​ ដើម្បី​បម្រើ​ផលប្រយោជន៍​សាធារណៈ និង​បំពេញ​សេចក្តីត្រូវការ​របស់​សង្គម និង​សេដ្ឋកិច្ច​ជាតិ​»​។

លោក សម វិទូ អ្នកប្រឹក្សា​ឯករាជ្យ ផ្នែក​វិស័យ​កសិកម្ម​កម្ពុជា​បាន​ប្រាប់​ភ្នំពេញ​ប៉ុស្តិ៍ នៅ​ថ្ងៃទី​ ១៧ ខែមីនា​ថា ជាទូទៅ​ប្រទេស​នីមួយៗ​ត្រូវមាន​ច្បាប់​ការការពារ​រុក្ខជាតិ និង​ភូតគាម​អនាម័យ​រៀងៗ​ខ្លួន ដើម្បី​បញ្ចៀស​បញ្ហា​ដែល​កើត​ដោយសារ​ការឆ្លង​មេរោគ​​ពី​កសិផល​នាំចូល និង​ការលួចចម្លង​ហ្ស៊ែន​របស់​រុក្ខជាតិ​ជាដើម​។

លោក​បញ្ជាក់ថា​៖ «​កន្លងទៅ ដូចជា​ផលិតផល​ស្វាយ​កម្ពុជា​ជាដើម ដែល​យើង​បាន​នាំ​ចេញទៅ​ប្រទេស​ចិន គឺ​ត្រូវ​ទទួល​ការត្រួតពិនិត្យ​តឹងរ៉ឹង​ណាស់​ពី​គយ​ចិន ព្រោះ​ផលិតផល​កសិកម្ម​ទាំងនេះ​អាច​នាំ​មេរោគ ឬ​សមាសភាព​ចង្រៃ​ទៅ​ចម្លង​ដល់​រុក្ខជាតិ​នៅ​ប្រទេស​គេ​បាន ហើយ​នេះ​ជា​ចំណុច​សំខាន់​ដែល​កម្ពុជា​ក៏ត្រូវ​តែមាន​ច្បាប់ និង​អនុវត្ត​ឱ្យបាន​ខ្ជាប់ខ្ជួន​»​។

លោក​បន្ថែមថា នៅពេល​ដែល​មានច្បាប់​នេះ ក្រសួង​ពាក់ព័ន្ធ​គួរតែ​គិតគូរ​បន្ថែម​ទៅលើ​ឧបករណ៍​ ដើម្បី​ពិសោធ​ចល័ត​ឱ្យបាន​គ្រប់កន្លែង​ច្រកចេញ​-​ចូល​ដែលមាន​ទំនិញ ពិសេស​កសិផល​ចូលមក ដើម្បី​ជំរុញ​ការអនុវត្ត​ច្បាប់​ស្តីពី​ការការពារ​រុក្ខជាតិ និង​ភូតគាម​អនាម័យ​ឱ្យមាន​ប្រសិទ្ធភាព​។

បើតាម​លោក​រដ្ឋមន្ត្រី សេចក្តី​ព្រាងច្បាប់​នេះ​មាន​អត្ថប្រយោជន៍​សំខាន់ៗ​ដូចជា គ្រប់គ្រង ការពារ​រុក្ខជាតិ និង​ការអនុវត្ត​វិធានការ​ភូតគាម​អនាម័យ​, គាំទ្រ​គោលនយោបាយ និង​យុទ្ធសាស្ត្រ​ជំរុញ​ផលិតកម្ម​កសិកម្ម ពិពិធភាវូបនីយកម្ម និង​ពាណិជ្ជូបនីយកម្ម​កសិកម្ម​, ជា​ឧបករណ៍​បទដ្ឋាន​គតិ​យុត្ត​ក្នុងការ​អនុវត្ត​វិធានការ​ការពារ​រុក្ខជាតិ និង​ភូតគាម​អនាម័យ ដើម្បី​ទប់ស្កាត់​ការបង្ក ការ​រាតត្បាត និង​ការបំផ្លាញ​ពី​សំណាក់​សមាសភាព​ចង្រៃ​គ្រប់​ប្រភេទ​, គ្រប់គ្រង​សុខភាព​រុក្ខជាតិ លើក​កម្ពស់​ផលិតភាព គុណភាព និង​សុវត្ថិ​ភាព​, រក្សា​អធិបតេយ្យភាព និង​សន្តិសុខ​ភូតគាម​អនាម័យ​តាមរយៈ​ការទប់ស្កាត់​ការហូរចូល​ផលិតផល​កសិកម្ម​ដែល​អាចមាន​ផ្ទុក​សមាសភាព​ចង្រៃ និង​សារធាតុ​បង្ក​ផលប៉ះពាល់​ដល់​​សុខភាព​សាធារណៈ​ជាដើម​។

ទិន្នន័យ​ក្រសួងកសិកម្ម​បង្ហាញថា ក្នុង​ឆ្នាំ​ ២០២១ កម្ពុជា​នាំចេញ​កសិផល​ទៅ​ក្រៅប្រទេស​ក្នុង​បរិមាណ​ជិត ៨ លាន​តោន​កើនឡើង​ជាង ៣,១ ​លាន​តោន ស្មើនឹង ៦៣,៨៣ ​ភាគរយ បើ​ធៀប​នឹង​ឆ្នាំ​ ២០២០៕ LA