ភ្នំពេញៈ ឯកអគ្គរដ្ឋទូតម៉ាឡេស៊ីប្រចាំកម្ពុជា លោក Eldeen Husaini Hohd Hashim បានសន្យានឹងកៀរគរវិនិយោគិនរបស់ខ្លួនឱ្យមកបណ្តាក់ទុននៅកម្ពុជាលើវិស័យមួយចំនួនដូចជា ទេសចរណ៍ អចលនទ្រព្យ ពាណិជ្ជកម្ម កសិកម្ម និងវិស័យអគ្គិសនីដើរដោយថាមពលពន្លឺព្រះអាទិត្យ នៅទឹកដីខេត្តកំពង់ស្ពឺ នាពេលខាងមុខ បន្ទាប់ពីមើលឃើញពីសក្តានុពលសេដ្ឋកិច្ចក្នុងខេត្តមួយនេះ។
ការសន្យារបស់លោក Eldeen Husaini Hohd Ha-shim បានធ្វើឡើងក្នុងពេលដឹកនាំគណៈប្រតិភូទៅទស្សនកិច្ចស្វែងយល់ពីសក្តានុពលរបស់ខេត្តកំពង់ស្ពឺ និងបានជួបពិភាក្សាជាមួយលោក វ៉ី សំណាង អភិបាលខេត្តកំពង់ស្ពឺកាលពីថ្ងៃទី ១៦ ខែមីនា ឆ្នាំ ២០២២ នៅសាលាខេត្តកំពង់ស្ពឺ។
លោកឯកអគ្គរដ្ឋទូត បាននិយាយថា នៅពេលអ្នកវិនិយោគម៉ាឡេស៊ីចូលមកបណ្ដាក់ទុនក្នុងខេត្តកំពង់ស្ពឺ ប្រជាពលរដ្ឋនៅក្នុងខេត្តនេះនឹងទទួលបានប្រាក់ចំណូលបន្ថែមទៀត។
អភិបាលខេត្តកំពង់ស្ពឺ លោក វ៉ី សំណាង ប្រាប់ភ្នំពេញប៉ុស្តិ៍នៅថ្ងៃទី ១៧ ខែមីនាថា មូលហេតុដែលឯកអគ្គរដ្ឋទូតម៉ាឡេស៊ី ចាប់អារម្មណ៍ និងមានបំណងកៀរគរវិនិយោគិនខ្លួនឱ្យចូលមកវិនិយោគនៅក្នុងខេត្តកំពង់ស្ពឺគឺដោយសារខេត្តនេះមានសក្តានុពលលើវិស័យជាច្រើន ព្រមទាំងមានហេដ្ឋារចនាសម្ព័ន្ធដឹកជញ្ជូនល្អប្រសើរផងដែរ។
លោកបន្តថា មួយវិញទៀតលោកឯកអគ្គរដ្ឋទូតម៉ាឡេស៊ីក៏ទទួលបានការចង្អុលបង្ហាញពីនាយករដ្ឋមន្ត្រីរបស់គាត់ដែលបានមកបំពេញទស្សនកិច្ចនៅកម្ពុជា និងបានជួបពិភាក្សាជាមួយលោកនាយករដ្ឋមន្ត្រី ហ៊ុន សែន កាលពីចុងខែកុម្ភៈ។
លោកបន្ថែមថា៖ «យើងរីករាយប្រសិនបើគេមកបណ្តាក់ទុនវិនិយោគ ព្រោះស្មើនឹងគេរកការងារឱ្យប្រជាពលរដ្ឋយើងធ្វើ។ នៅពេលមានការងារធ្វើ ប្រជាពលរដ្ឋនឹងមានប្រាក់ចំណូល។ មិនត្រឹមតែមានប្រាក់ចំណូលប៉ុណ្ណោះទេ សេដ្ឋកិច្ចក៏នឹងកើនទៅតាមហ្នឹងដែរ»។
លោក សំណាង បានបញ្ជាក់ទៀតថា នៅពេលមានអ្នកវិនិយោគចូលមកបណ្តាក់ទុន ក្នុងនាមអាជ្ញាធរនឹងខំជួយសម្រួលធ្វើយ៉ាងណាឱ្យការបណ្តាក់ទុននោះមានដំណើរការទៅមុខដោយរលូន ដើម្បីធ្វើឱ្យអ្នកវិនិយោគមានទំនុកចិត្ត។ បើសិនមិនមានការយកចិត្តទុកដាក់ ពួកគេនឹងបង្វែរទៅវិនិយោគនៅប្រទេសផ្សេងដែលនឹងធ្វើឱ្យខាតប្រយោជន៍ជាតិ ពិសេសគឺប្រជាជនមិនមានការងារ។
បើតាមលោក សំណាង ពេលនេះក៏មានវិនិយោគិនម៉ាឡេស៊ីកំពុងបណ្តាក់ទុនក្នុងខេត្តកំពង់ស្ពឺផងដែរពាក់ព័ន្ធនឹងការវិនិយោគលើវិស័យអគ្គិសនីដូចជាខ្សែភ្លើង និងអំពូលភ្លើង។
ក្នុងជំនួបពិភាក្សារវាងលោកនាយករដ្ឋមន្ត្រី ហ៊ុន សែន និងលោកនាយករដ្ឋមន្ត្រីម៉ាឡេស៊ី Ismail Sabri Yaakob កាលពីថ្ងៃទី ២៤ ខែកុម្ភៈ ឆ្នាំ ២០២២ ភាគីទាំង ២ បានពិភាក្សាគ្នាអំពីទំនាក់ទំនង និងកិច្ចសហប្រតិបត្តិការទ្វេភាគីរួមមាន វិស័យពាណិជ្ជកម្ម និងការវិនិយោគ សេដ្ឋកិច្ច-សង្គម ការពារជាតិ សន្តិសុខ និងការស្តារសង្គម-សេដ្ឋកិច្ចឡើងវិញ។
ក្នុងជំនួបនោះនាយករដ្ឋមន្ត្រីនៃប្រទេសទាំង ២ ក៏បានលើកទឹកចិត្តដល់ធុរជន និងអ្នកវិនិយោគឱ្យស្វែងរកកាលានុវត្តភាពបន្ថែមទៀតអំពីឱកាសអាជីវកម្ម និងវិនិយោគក្នុងប្រទេសទាំង ២ ដោយប្រទេសទាំង ២ មានកិច្ចព្រមព្រៀងស្តីពីការចៀសវាងការយកពន្ធត្រួតគ្នា និងបង្ការការគេចពន្ធទាក់ទងការយកពន្ធលើប្រាក់ចំណូលរវាងប្រទេសទាំង ២ ដែលបានចូលជាធរមានកាលពីថ្ងៃទី ១ ខែមករា ឆ្នាំ ២០២១ និងច្បាប់វិនិយោគថ្មីរបស់កម្ពុជាដែលនឹងផ្តល់នូវក្របខ័ណ្ឌច្បាប់បើកចំហមានតម្លាភាព អាចព្យាករបាន និងមានប្រសិទ្ធភាពជាងមុនសម្រាប់ការវិនិយោគ។
តាមទិន្នន័យក្រុមប្រឹក្សាអភិវឌ្ឍន៍កម្ពុជា (CDC) បង្ហាញថា គិតត្រឹមដំណាច់ឆ្នាំ ២០២១ ក្រុមប្រឹក្សាអភិវឌ្ឍន៍កម្ពុជាបានចុះបញ្ជីគម្រោងវិនិយោគមានលក្ខណសម្បត្តិគ្រប់គ្រាន់របស់ប្រទេសម៉ាឡេស៊ីចំនួន ១៦២ ក្រោមទុនវិនិយោគ ៣,១៥ ពាន់លានដុល្លារ៕ LA