.jpg)
អគារស្នាក់ការសាខារបស់ក្រុមហ៊ុនអចលនទ្រព្យ Evergrande របស់ចិន។ AFP
ទីក្រុងហុងកុងៈ Evergrande ដែលជាក្រុមហ៊ុនអភិវឌ្ឍន៍អចលនទ្រព្យខ្នាតយក្សរបស់ប្រទេសចិន និងគ្រប់ក្រុមហ៊ុនបុត្រសម្ព័ន្ធរបស់ខ្លួនទាំងអស់ បានផ្អាកការជួញដូរក្នុងទីក្រុងហុងកុងនៅព្រឹកថ្ងៃចន្ទ។ នេះបើតាមការជូនដំណឹងដល់ផ្សារហ៊ុន។
ក្រុមហ៊ុនអចលនទ្រព្យរបស់ប្រទេសចិនបានប្រឹងប្រែងតស៊ូក្រាញននៀលក្នុងបុព្វហេតុនៃការជំរុញរបស់ទីក្រុងប៉េកាំង ដើម្បីទប់ស្កាត់បំណុលលើសលប់នៅក្នុងវិស័យអចលនទ្រព្យ ក៏ដូចជាការរំពឹងទុករបស់អ្នកប្រើប្រាស់ដ៏ច្រើនសន្ធឹកសន្ធាប់។
ក្នុងចំណោមក្រុមហ៊ុនដែលជាប់គាំងក្នុងវិបត្តិនោះគឺ Evergrande ដែលជាក្រុមហ៊ុនអភិវឌ្ឍន៍ធំបំផុតមួយរបស់ប្រទេសដែលបានចូលរួមក្នុងការចរចារៀបចំរចនាសម្ព័ន្ធឡើងវិញ បន្ទាប់ពីប្រមូលបំណុលចំនួន ៣០០ ពាន់លានដុល្លារ។
នៅថ្ងៃចន្ទក្រុមហ៊ុនបាន ប្រកាសថា ការជួញដូរនឹងត្រូវបាន «បញ្ឈប់» ដោយមិនផ្តល់មូលហេតុច្បាស់លាស់។
សេចក្តីជូនដំណឹងមួយទៅកាន់ផ្សារហ៊ុនហុងកុងបាននិយាយថា៖ «ក្រៅពីនោះ រាល់ផលិតផលដែលមានរចនាសម្ព័ន្ធទាំងអស់ទាក់ទងនឹងក្រុមហ៊ុន ក៏នឹងត្រូវបានបញ្ឈប់ពីការជួញដូរក្នុងពេលតែមួយដែរ»។
ភាគហ៊ុនរបស់ក្រុមហ៊ុន Evergrande Property Services Group និង China Evergrande New Energy Vehicle Group ត្រូវបានផ្អាក។
ការព្យួរនេះដែលជាលើកទី ២ ក្នុងឆ្នាំនេះ កើតឡើងមុនការរំពឹងទុកនៃកាតព្វកិច្ចទូទាត់សងវិញនូវទឹកប្រាក់ចំនួន ២ ពាន់លានដុល្លារនៅថ្ងៃពុធ និងមួយទៀតនៅខែក្រោយចំនួន ១,៤ ពាន់លានដុល្លារ។
អ្នកអភិវឌ្ឍន៍ដែលជាប់គាំងត្រូវបានដាក់ស្លាកថា «ខកខានការទូទាត់បំណុល» ដោយក្រុមហ៊ុនវាយតម្លៃអន្តរជាតិនៅក្នុងខែធ្នូ បន្ទាប់ពីក្រុមហ៊ុនមិនបានសងបំណុលទាន់ពេលវេលា។
ការតស៊ូនៅពេលមុននេះក្នុងការទូទាត់ប្រាក់ឱ្យអ្នកផ្គត់ផ្គង់ និងអ្នកម៉ៅការដោយសារវិបត្តិបំណុលបាននាំឱ្យមានការតវ៉ាជាហូរហែពីអ្នកទិញផ្ទះ និងអ្នកវិនិយោគនៅទីស្នាក់ការកណ្តាលនៅទីក្រុងស៊ិនជិន (Shenzhen) របស់ក្រុមក្នុងខែកញ្ញា។
ក្រុមហ៊ុនបាននិយាយម្តងហើយម្តងទៀតថា ខ្លួននឹងបញ្ចប់គម្រោងរបស់ខ្លួន ហើយប្រគល់ផ្ទះទៅឱ្យអ្នកទិញក្នុងកិច្ចខិតខំប្រឹងប្រែងដែលគ្មានសង្ឃឹម ដើម្បីសង្គ្រោះបំណុលរបស់ខ្លួន។
ប៉ុន្តែនៅក្នុងខែមករា ក្រុមហ៊ុនត្រូវបានបញ្ជាដោយអាជ្ញាធរឱ្យរុះរើអគារចំនួន ៣៩ នៅលើកោះ Hainan ដោយសារតែសំណង់ទាំងនោះត្រូវបានសាងសង់ដោយខុសច្បាប់នៅលើប្រជុំកោះសិប្បនិម្មិតនៅក្នុងមជ្ឈមណ្ឌលទេសចរណ៍។
ក្រុមហ៊ុននេះបានព្យាយាមលក់ទ្រព្យសម្បត្តិរបស់លោក Hui Ka Yan ប្រធានក្រុមហ៊ុន ព្រមទាំងបានសងបំណុលមួយចំនួនដោយប្រើទ្រព្យសម្បត្តិផ្ទាល់ខ្លួនរបស់គាត់។
ផលលំបាករបស់ Evergrande បានជះឥទ្ធិពលដល់វិស័យអចលនៈទ្រព្យទាំងមូលនៅប្រទេសចិន ជាមួយនឹងក្រុមហ៊ុនតូចៗ មួយចំនួនដែលខកខានមិនបានផ្តល់ប្រាក់កម្ចី ហើយក្រុមហ៊ុនផ្សេងទៀតកំពុងតស៊ូស្វែងរកសាច់ប្រាក់គ្រប់គ្រាន់។
មូលនិធិរូបិយវត្ថុអន្តរជាតិបានព្រមានកាលពីចុងខែមករាថា វិបត្តិមូលនិធិអចលនទ្រព្យអាចមានឥទ្ធិពលលើសេដ្ឋកិច្ចទូលំទូលាយ និងទីផ្សារពិភពលោក៕ RR
