ភ្នំពេញៈ រាជរដ្ឋាភិបាលកម្ពុជាបានចេញសេចក្តីសម្រេចអន្តរក្រសួងលើប្រកាសស្តីពីការកំណត់រូបមន្តសម្រាប់កែសម្រួលថ្លៃលក់រាយប្រេងឥន្ធនៈនៅកម្ពុជាដើម្បីឱ្យថ្លៃប្រេងឥន្ធនៈឡើងចុះតាមតម្លៃប្រេងលើទីផ្សារអន្តរជាតិ ដោយឱ្យអនុវត្តតែទៅលើការលក់រាយប្រេងឥន្ធនៈប៉ុណ្ណោះ។
ក្រសួងចំនួន ៣ ដែលរួមមានក្រសួងសេដ្ឋកិច្ច និងហិរញ្ញវត្ថុ, ក្រសួងពាណិជ្ជកម្ម និងក្រសួងរ៉ែ និងថាមពលកាលពីថ្ងៃទី ២២ ខែមីនា ឆ្នាំ ២០២២ បានចេញប្រកាសអន្តរក្រសួង ដែលមាន ១២ ប្រការ ដោយខ្លឹមសារសំខាន់នៃប្រកាសនេះ គឺការកំណត់យករយៈពេលដាក់តម្លៃប្រេងឥន្ធនៈពី ១៥ ថ្ងៃ មកត្រឹម ១០ ថ្ងៃវិញ។ ក្នុងនោះដែរនៅប្រការ ៤ នៃប្រកាសនេះបានបញ្ជាក់ថា នាយកដ្ឋានអភិវឌ្ឍន៍វិស័យឯកជននៃក្រសួងពាណិជ្ជកម្មត្រូវគណនាថ្លៃលក់រាយប្រេងឥន្ធនៈនៅកម្ពុជា និងចេញថ្លៃលក់រាយជូនក្រុមហ៊ុនប្រេងឥន្ធនៈនៅរៀងរាល់ថ្ងៃទី ០១, ទី ១១ និងទី ២១ នៃខែនីមួយៗ។
អ្នកនាំពាក្យក្រសួងពាណិជ្ជកម្មបានប្រាប់ភ្នំពេញប៉ុស្តិ៍បន្ថែមថា ការអនុវត្តតាមរូបមន្តថ្មីនេះនឹងចាប់ផ្តើមពីដើមខែមេសា ដោយការកំណត់រូបមន្តថ្មីនេះនឹងធ្វើឱ្យតម្លៃដែលបានកំណត់អាចប្រែប្រួលទាន់សភាពការណ៍នៃតម្លៃប្រេងនៅទីផ្សារអន្តរជាតិ។
លោកបញ្ជាក់ថា៖ «ការអនុវត្តបែបនេះនឹងបង្កើតបានសមធម៌មួយនៅក្នុងអាជីវកម្ម ទាំងអ្នកលក់ និងអ្នកទិញ បើយោងតាមតម្លៃប្រេងអន្តរជាតិ។ ចំពោះពន្ធផ្សេងៗដូចជា ពន្ធគយ អាករតម្លៃបន្ថែម អាករពិសេសគឺនៅរក្សាដដែលដោយមិនមានការប្រែប្រួលទេ»។
បើយោងតាមប្រកាសអន្តរក្រសួងថ្មីនេះ ក្រសួងពាណិជ្ជកម្មអាចចេញសេចក្តីជូនដំណឹងភ្លាមៗ ដោយកំណត់ឱ្យចេញថ្លៃលក់រាយជូនក្រុមហ៊ុនប្រេងឥន្ធនៈ ក្នុងរយៈពេល ១០ ថ្ងៃ ឬ ១៥ ថ្ងៃម្តងទៅតាមការចាំបាច់ ដើម្បីឱ្យមានសមាមាត្រគ្នារវាងតម្លៃប្រេងនៅទីផ្សារអន្តរជាតិ និងតម្លៃប្រេងឥន្ធនៈលក់រាយនៅកម្ពុជា និងដើម្បីរក្សាបានស្ថិរភាពផ្គត់ផ្គង់នៅកម្ពុជា។
យោងតាម លោក សុវិជាតិ បើមិនមានការចេញប្រកាសថ្មីទេ ប្រកាសអន្តរក្រសួងនេះនឹងនៅជាធរមាន។
លោក ស៊ឺន នីត ម្ចាស់ស្ថានីយប្រេងឥន្ធនៈភីធីធី នៅសង្កាត់ព្រែកកំពឹស ខណ្ឌដង្កោ រាជធានីភ្នំពេញ និយាយថា ការកំណត់រូបមន្តសម្រាប់កែសម្រួលថ្លៃលក់រាយប្រេងឥន្ធនៈនៅកម្ពុជានេះ គឺជាការសម្រួលរបស់ក្រសួងពាក់ព័ន្ធ ពិសេសក្រសួងពាណិជ្ជកម្ម ដើម្បីដើរឱ្យទាន់សភាពការណ៍ពិភពលោក។
លោកបន្តថា សាធារណជនមួយចំនួនយល់ថា ប្រេងឥន្ធនៈឡើងថ្លៃ ម្ចាស់ស្ថានីយអាចនឹងចំណេញបានច្រើន ប៉ុន្តែលោកថា នេះគឺជាការយល់ខុស។
លោកបានបញ្ជាក់ថា៖ «តម្លៃប្រេងឥន្ធនៈលក់រាយលើទីផ្សារ គឺជាការកំណត់ដោយក្រសួងពាណិជ្ជកម្ម ដូច្នេះប្រាក់ចំណេញ ដែលម្ចាស់ស្ថានីយទទួលបាន គឺប្រាក់ចំណេញថេរ បើទោះជាប្រេងឡើងដល់កម្រិតណា ឬធ្លាក់ដល់កម្រិតណាក៏ប្រាក់ចំណេញនៅបានដដែល។ ប៉ុន្តែអ្វីដែលជាបញ្ហាសម្រាប់ម្ចាស់ស្ថានីយនៅពេលប្រេងឡើងនោះគឺត្រូវចំណាយដើមទុនទ្វេដង ដើម្បីទិញយកមកស្តុក»។
នៅក្នុងប្រកាសអន្តរក្រសួងថ្មីនេះបានបញ្ជាក់ទៀតថា គ្រប់ស្ថានីយប្រេងឥន្ធនៈទាំងអស់ត្រូវមានយ៉ាងតិចនូវផលិតផលប្រេងសាំងធម្មតា និងប្រេងម៉ាស៊ូត សម្រាប់ដាក់លក់ជាប្រចាំ ហើយមិនអនុញ្ញាតឱ្យលក់ប្រេងស៊ុបពែរតែមួយមុខនោះទេ។ ក្នុងករណីល្មើសនឹងប្រកាសនេះ ត្រូវទទួលពិន័យអន្តរការណ៍ជាប្រាក់ ៤ លានរៀល ហើយបើនៅបន្តប្រព្រឹត្តល្មើស ក្រសួងនឹងផ្អាកប្រតិបត្តិការអាជីវកម្មជាបណ្តោះអាសន្ន៕ LA
វីដេអូ៖