.jpg)
អ្នកនាង អាំ វាសនា ចូលរួមកម្មវិធី Boost Leaders Network របស់ហ្វេសប៊ុក កាលពីខែធ្នូ ឆ្នាំមុន ក្នុងទីក្រុងភ្នំពេញ។
ការគួបផ្សំគ្នារវាងមហិច្ឆតា បំណងប្រាថ្នា និងការតស៊ូ ដើម្បីភាពជោគជ័យ បានធ្វើឱ្យអ្នកនាង អាំ វាសនា ក្លាយជាសហគ្រិនឆ្នើមក្នុងវិស័យបច្ចេកវិទ្យា។ ភាពជោគជ័យរបស់អ្នកនាងថែមទាំងបានទាក់ទាញចំណាប់អារម្មណ៍ពីក្រុមហ៊ុនហ្វេសប៊ុកថែមទៀតផង នៅពេលដែលអ្នកនាងត្រូវបានជ្រើសរើសក្នុងចំណោមសហគ្រិនស្ត្រី ១១ នាក់ សម្រាប់បណ្តាញ «Boost Leader Network» របស់ហ្វេសប៊ុក ដែលជាសមិទ្ធផលមួយទៀត។
កាលពីក្មេងអ្នកនាង វាសនា ចង់ក្លាយជាអ្នកសារព័ត៌មានដូច លោក Anderson Cooper នៅ CNN ប៉ុន្តែមរណភាពឪពុករបស់អ្នកនាង ពេលគាត់មានអាយុទើបតែ ៧ ឆ្នាំ បានបង្អាក់ដល់ក្តីសុបិននោះ។ ទោះយ៉ាងណា អ្នកនាងបានជម្នះទុក្ខលំបាក និងបានបើកអាជីវកម្មផ្ទាល់ខ្លួនគឺហាង BCS Computer ក្នុងឆ្នាំ ២០០៧ ដែលមានជំនាញទាំងផ្នែក Hardware និង Software មានសេវាប្រឹក្សាយោបល់ និងផ្គត់ផ្គង់សម្ភារការិយាល័យគ្រប់ប្រភេទ ដែលស្ថិតនៅផ្លូវកម្ពុជាក្រោម។
សហគ្រិនវ័យ ៣៩ ឆ្នាំរូបនេះថ្លែងថា៖ «ម្តាយរបស់ខ្ញុំគឺជាអាជីវករ ហើយខ្ញុំមានទំនួលខុសត្រូវច្រើនក្នុងនាមកូនច្បង ខណៈគ្រួសារមិនសូវធូរធារ។ ក្នុងឆ្នាំ ១៩៩៩ ខ្ញុំបានចូលបម្រើការងារនៅហាងហ្វូតូកូពី ភារកិច្ចរបស់ខ្ញុំគឺថតចម្លង ធ្វើសៀវភៅ មើលគ្រឿងម៉ាស៊ីន លក់សម្ភារការិយាល័យ និងមើលស្តុកជាដើម»។
ដំណើរជាសហគ្រិនក្នុងវិស័យដែលគ្រប់គ្រងដោយបុរស គឺមិនងាយស្រួលទេ។ អស់រយៈពេល ៧ ឆ្នាំ អ្នកនាងបានខិតខំរៀនសិក្សា ស្រាវជ្រាវ អំពីបច្ចេកវិទ្យាកុំព្យូទ័រ និងអាជីវកម្មទាក់ទងនឹង IT ហើយជាមួយគ្នាអ្នកនាងត្រូវដើរតួជាម្តាយផងឪពុកផង ដើម្បីមើលថែកូនស្រីម្នាក់ទៀត។
បន្ទាប់ពីមានបទពិសោធ និងការលក់ អ្នកនាងបានឈប់ពីការងារ ហើយសម្រេចបើកហាង BCS Computer ដោយប្រើដើមទុនជាង ៧០០ ដុល្លារ ដែលជាប្រាក់សន្សំ និងខ្ចីពីសាច់ញាតិខ្លះ។
«ពីដំបូងខ្ញុំមិនមែនជាអ្នកជំនាញអ្វីនោះទេ ប៉ុន្តែអំឡុងពេលបំពេញការងារខ្ញុំត្រូវសិក្សាស្រាវជ្រាវឱ្យបានច្រើន ទើបខ្ញុំអាចអភិវឌ្ឍខ្លួន ដើម្បីធ្វើការនៅផ្នែកនេះបាន។
យូរៗទៅខ្ញុំមានជំនាញ និងស្គាល់ពីសម្ភារកាន់តែច្បាស់ដូចជាគ្រឿងបន្លាស់ និងការជួសជុលខ្លះៗ។ ជាមួយបទពិសោធ និងជំនាញខ្ញុំមានទំនុកចិត្តក្នុងការចាប់ផ្តើមអាជីវកម្មផ្ទាល់ខ្លួន»។
បុគ្គលិកហាង BCS ពោរពេញដោយសមត្ថភាពនិងជំនាញច្បាស់លាស់។ ហេង ជីវ័ន
អ្នកនាងបន្តថា៖ «BCS Computer មានលក់ទំនិញទាក់ទងនឹងឌីជីថល សម្រាប់ការិយាល័យ មានព្រីនធ័រ កុំព្យូរទ័រ ម៉ាស៊ីនក្នុងការិយាល័យគ្រប់ប្រភេទ ដែលពាក្យស្លោករបស់យើងគឺ One Stop for All Digital Mission ហើយយើងបើករហូត ដល់ម៉ោង ៩:៣០ នាទីយប់»។
សហគ្រិនរូបនេះបានកសាងអាជីវកម្មមួយដ៏រឹងមាំ និងបានពឹងផ្អែកលើទីផ្សារឌីជីថលរបស់ហ្វេសប៊ុក ដែលបានជួយអ្នកនាងជម្នះបញ្ហាប្រឈមបង្កឡើងដោយជំងឺកូវីដ ខណៈអាជីវកម្មជាច្រើនបានរងផលប៉ះពាល់។
«កូវីដក៏ប៉ះពាល់ដល់អាជីវកម្មរបស់យើងដែរ ប៉ុន្តែខ្ញុំត្រូវដាក់ចេញយុទ្ធសាស្ត្រថ្មី ដោយផ្តោតលើការបង្កើនការលក់តាមអនឡាញ។ ខ្ញុំត្រូវធ្វើយ៉ាងណាឱ្យផេចហេ្វសប៊ុករបស់ខ្ញុំដំណើរការល្អ អាចឆ្លើយតបអតិថិជនបានឆាប់រហ័ស និងផ្តល់ដំណោះស្រាយតាមរយៈអនឡាញ យើងអាចជួសជុលឱ្យភ្ញៀវពីចម្ងាយ ដើម្បីប្រាកដថាយើងនៅតែអាចផ្តល់សេវាកម្មជូនអតិថិជន ទោះក្នុងកាលៈទេសៈណាក៏ដោយ»។
«ដើម្បីលើកទឹកចិត្តដល់សហគ្រិនស្ត្រី ក្រុមហ៊ុនហ្វេសប៊ុកបានជ្រើសរើសសហគ្រិនស្ត្រីចំនួន ១១ នាក់ ក្នុងនោះគេក៏ជ្រើសរើស BCS Computer ដោយសារតែខ្ញុំប្រើប្រាស់ Digital Marketing ជា មួយហ្វេសប៊ុក ដើម្បីស្រោចស្រង់អាជីវកម្មនៅពេលជួបការលំបាកអំឡុងពេលជំងឺរាតត្បាត»។
«ខ្ញុំរីករាយណាស់ដែលត្រូវបានជ្រើសរើសក្នុងចំណោម ១១ នាក់ ហើយអ្វីដែលជាមោទនភាពបំផុតនោះ គឺគេយក BCS Computer ជាគំរូក្នុងការប្រើប្រាស់ marketing digital នៅកម្ពុជា។ ហ្វេសប៊ុក តែងតែជួយ update រាល់ព័ត៌មានថ្មីៗ ឱ្យយើងអាចរៀនអំពី tools មួយចំនួន ហើយក៏ជួយផ្តល់យោបល់ ដើម្បីកែលម្អទំព័ររបស់យើងឱ្យកាន់តែប្រសើរដែរ»។
«គេជួយ update អ្វីថ្មីបានឆាប់រហ័ស យើងអាចសិក្សាពីផ្លាស់ប្តូរបច្ចេកវិទ្យាថ្មីបានទាន់ពេល ដើម្បីធ្វើឱ្យទំព័ររបស់យើងកាន់តែល្អ។ BCS Computer ត្រូវបានជ្រើសរើសជាគំរូមួយនៅកម្ពុជា ដែលគាត់ជាសហគ្រិនស្ត្រី បានប្រើហ្វេសប៊ុក ដើម្បីប្រែក្លាយការលក់ក្នុងហាងទៅជា digital marketing ធ្វើជាគំរូដល់សហគ្រិនស្ត្រីផ្សេងទៀត»។
ក្រៅពីកសាងអាជីវកម្មរបស់ខ្លួន អ្នកនាងក៏បានជួយបណ្តុះបណ្តាលយុវជន បន្ទាប់ពីដឹងថា អ្នកជំនាញពិតប្រាកដផ្នែកព័ត៌មានវិទ្យានៅលើទីផ្សារមានការខ្វះខាត។
អ្នកនាងលើកឡើងថា៖ «ក្នុងនាមជាសហគ្រិនស្ត្រីបញ្ហាប្រឈមធំបំផុតសម្រាប់ខ្ញុំ គឺខ្ញុំត្រូវចំណាយពេលសិក្សាស្រាវជ្រាវច្រើន ដូចជាតាមយូធូប ដើម្បីដើរឱ្យទាន់ការវិវឌ្ឍនៃបច្ចេកវិទ្យាថ្មីៗ ដែលទាមទារឱ្យមានការយកចិត្តទុកដាក់ខ្ពស់។ បញ្ហាប្រឈមមួយទៀត គឺពិបាកជ្រើសរើសបុគ្គលិកដែលមានជំនាញផ្នែកឌីជីថលច្បាស់លាស់»។
«ខ្ញុំជួយបង្កើតអ្នកជំនាញខាងព័ត៌មានវិទ្យាច្រើនជាង ១០០ នាក់ តាមរយៈការបណ្តុះបណ្តាលជាក់ស្តែង ផ្តល់ការងារ ហើយពេលគាត់ចេញទៅធ្វើការកន្លែងផ្សេង គឺជាអ្នកកាន់ការងារធំៗ។ យើងក៏ផ្តល់ឱកាសដល់និស្សិតមួយចំនួនដែលចង់ហាត់ការងារនៅកន្លែងយើងផងដែរ»។
ក្រុមហ៊ុនមានលក់សម្ភារការិយាល័យគុណភាពខ្ពស់គ្រប់ប្រភេទ។ ហេង ជីវ័ន
«ពិតណាស់ជោគជ័យធំបំផុតរបស់ខ្ញុំ គឺការផ្តោតសំខាន់លើសេវាកម្មអតិថិជន។ បើសេវាកម្មមិនល្អ នោះនឹងប៉ះពាល់ដល់អាជីវកម្មរបស់យើង ដូច្នេះខ្ញុំផ្តោតលើការផ្តល់សេវាកម្មល្អបំផុតជូនអតិថិជន ដូចជាការជួសជុល ការដោះស្រាយបញ្ហាកុំព្យូទ័រឱ្យបានរហ័ស មានការទទួលខុសត្រូវ ហើយយើងមានបុគ្គលិកជំនាញជួយដំណោះស្រាយបញ្ហាគ្រប់យ៉ាង»។
អ្នកនាងវាសនាបានបង្កើតបរិយាកាសការងារដ៏ល្អ ដើម្បីលើកទឹកចិត្តបុគ្គលិករបស់ខ្លួន ដោយផ្តល់ការបណ្តុះបណ្តាលផ្នែកបច្ចេកវិទ្យាឌីជីថល បង្កើនជំនាញរបស់ពួកគេ និងផ្តល់ការលើកទឹកចិត្តបុគ្គលិក។
«ខ្ញុំតែងផ្តល់ឱកាសដល់បុគ្គលិកឱ្យកសាងសមត្ថភាព និងបណ្តុះគំនិតពួកគាត់ឱ្យក្លាយទៅជាអ្នកដឹកនាំ។ ខ្ញុំតែងតែចាត់ទុកក្រុមហ៊ុនខ្ញុំជាថ្នាលបណ្តុះបណ្តាលពួកគាត់ បង្វឹកសមត្ថភាព ឱ្យចេះធ្វើការជាក្រុម ហើយខ្ញុំមិនដាក់សម្ពាធដល់បុគ្គលិកទេ»។
អ្នកនាងវាសនាបន្តថា៖ «ខ្ញុំចង់ឱ្យសហគ្រិនស្ត្រីកុំបាក់ទឹកចិត្តនៅពេលជួបបញ្ហា ជាពិសេសអំឡុងពេលកូវីដ។ យើងដឹងថាទាំងគ្រួសារ និងអាជីវកម្ម គឺសុទ្ធតែប្រឈមបញ្ហា ប៉ុន្តែយើងត្រូវសម្លឹងមើលចំណុចវិជ្ជមាន ស្វែងរកដំណោះស្រាយ។ រឿងខ្លះយើងមើលទៅដូចជាពិបាក ប៉ុន្តែនៅពេលយើងតស៊ូ ជម្នះវាបាន នោះពេលយើងសម្លឹងមើលទៅបញ្ហានោះវិញ គឺវាតូចទេ។ បើយើងបាក់ទឹកចិត្ត នោះយើងនឹងគ្មានឆន្ទៈបន្តដំណើរទៅមុខបានទេ។ មិនថាបញ្ហានោះធំប៉ុនណា គឺតែងតែមានផ្លូវដោះស្រាយជានិច្ច»៕
