The Phnom Penh Post Search

Search form




Logo of Phnom Penh Post newspaper Phnom Penh Post - កម្ពុជា​គ្រោង​ដាក់ឱ្យ​អនុវត្ត​គោលនយោបាយ​អភិវឌ្ឍន៍​កសិកម្ម ២០២១-៣០

កម្ពុជា​គ្រោង​ដាក់ឱ្យ​អនុវត្ត​គោលនយោបាយ​អភិវឌ្ឍន៍​កសិកម្ម ២០២១-៣០

Content image - Phnom Penh Post
កសិករ​ច្រូតស្រូវ​ពី​ក្នុង​ស្រែ​មួយ​ក្នុង​ខេត្ត​កណ្តាល​។ ហេង ជីវ័ន

កម្ពុជា​គ្រោង​ដាក់ឱ្យ​អនុវត្ត​គោលនយោបាយ​អភិវឌ្ឍន៍​កសិកម្ម ២០២១-៣០

ភ្នំពេញៈ រដ្ឋាភិបាល​គ្រោង​នឹង​ដាក់ឱ្យ​អនុវត្ត​គោលនយោបាយ​អភិវឌ្ឍន៍​វិស័យ​កសិកម្ម​ឆ្នាំ​ ២០២១-២០៣០ នាពេល​ឆាប់ៗ​នេះ​ ដើម្បី​ដោះស្រាយ​បញ្ហា​ប្រឈម​ទាំងឡាយ និង​ជំរុញ​ការអភិវឌ្ឍ​វិស័យ​កសិកម្ម​ឱ្យមាន​លក្ខណៈ​ទំនើប ឆ្លើយតប​នឹង​ការប្រែប្រួល​សេដ្ឋកិច្ច និង​វិបត្តិ​សកល​កូវីដ​ ១៩​។

ក្នុង​ពិធី​បិទ​សន្និបាត​បូកសរុប​ការងារ​ឆ្នាំ ​២០២១ របស់​ក្រសួង​កសិកម្ម កាលពី​ថ្ងៃទី ​២៣ ខែមីនា លោក​នាយក​រដ្ឋមន្ត្រី ហ៊ុន សែន បាន​ថ្លែងថា បច្ចុប្បន្ន​កសិកម្ម​កម្ពុជា គឺជា​វិស័យ​អាទិភាព​ដែល​ធានា​សន្តិសុខ​ស្បៀង អាហារូបត្ថម្ភ និង​ការនាំចេញ ដែល​ចាំបាច់​ត្រូវ​វិនិយោគ​បន្ថែម​ទៅលើ​ការកសាង​ហេដ្ឋារចនាសម្ព័ន្ធ​រូបវន្ត​គាំទ្រ​វិស័យ​កសិកម្ម​ប្រព័ន្ធធារាសាស្ត្រ​, ផ្លូវ​ដឹកជញ្ជូន ឡូជីស្ទិក​, ឥណទាន​កសិកម្ម ការស្រាវជ្រាវ ការអភិវឌ្ឍ​ពូជ​ថ្មី​, ការផ្សព្វផ្សាយ​បច្ចេកទេស​ទំនើប​។

លោក​បញ្ជាក់ថា​៖ «​រាជរដ្ឋាភិបាល​បានផ្តល់​អាទិភាព​ចំពោះ​ការអនុវត្ត​គោលនយោបាយ​អភិវឌ្ឍន៍​វិស័យ​កសិកម្ម​ឆ្នាំ​ ២០២១-២០៣០ ដែល​គ្រោង​ដាក់ឱ្យអនុវត្ត​ក្នុងពេល​ដ៏ខ្លី​ខាងមុខ និង​ស្នើឱ្យ​មានការ​ចូលរួម​យ៉ាង​សកម្ម​ពី​គ្រប់​តួអង្គ​ពាក់ព័ន្ធ​ទាំង​វិស័យ​សាធារណៈ វិស័យ​ឯកជន និង​ដៃគូ​អភិវឌ្ឍន៍​ដោយ​ត្រូវធ្វើ​សមាហរណកម្ម​ឱ្យ​កៀក​ទៅ​ផលិតករ សហគមន៍​កសិកម្ម​នៅ​មូលដ្ឋាន ដើម្បី​ដោះស្រាយ​បញ្ហា​ប្រឈម​ទាំងឡាយ ដែល​បាននិង​កំពុង​ជួបប្រទះ​»​។

រដ្ឋមន្ត្រី​ក្រសួង​កសិកម្ម លោក វេង សាខុន បាន​និយាយថា វិស័យ​កសិកម្ម នៅតែ​ជួប​បញ្ហា​ប្រឈម​មួយចំនួន​ដូចជា ផលិតកម្ម​ដំណាំ​កសិកម្ម នៅមាន​ផលិតភាព​ទាប ហើយ​ការធ្វើ​ពិពិធកម្ម និង​ពាណិជ្ជូបនីយកម្ម​កសិកម្ម​នៅមានកម្រិត​, ប្រព័ន្ធ​កសិកម្ម​នៅ​កម្ពុជា​តែងតែ​ទទួលរង​ផលប៉ះពាល់​អវិជ្ជមាន​ពី​បាតុភូតធម្មជាតិ​នៃ​ការប្រែប្រួល​អាកាសធាតុ ពិសេស​គ្រោះ​រាំងស្ងួត និង​ទឹកជំនន់ ក៏ដូចជា​ជំងឺឆ្លង​សត្វ ក៏បាន​ដាក់បន្ទុក​ធ្ងន់​ដល់​ការអភិវឌ្ឍ​វិស័យ​កសិកម្ម រួមទាំង​បទល្មើស​ព្រៃឈើ និង​ជលផល​។

លោក​បន្ថែមថា ហេដ្ឋារចនាសម្ព័ន្ធ​គាំទ្រ​ក្នុងស្រុក មិនទាន់​បំពេញ​គ្រប់គ្រាន់​ទៅតាម​តម្រូវការ ហើយ​ការវិនិយោគ​លើ​ការកែច្នៃ​កសិផល​នៅ​មាន​កម្រិត​។ ម្យ៉ាងទៀត ថ្លៃដើម​ផលិតកម្ម​ និង​កែច្នៃ​នៅ​ខ្ពស់​នៅឡើយ ដូចជា​តម្លៃ​ជី ថ្នាំ​កសិកម្ម​បាន​កើនឡើង​ក្នុង​បរិបទ​កូវីដ​ ១៩ ចំណី​សត្វ​ផលិត​នៅក្នុង​ស្រុក​ថ្លៃ​ជាង​ប្រទេស​ជិតខាង​ក្នុង​អត្រា ២០ ​ភាគរយ​ជាដើម​។

លោក​បញ្ជាក់ថា​៖ «​ដើម្បី​ឆ្លើយតប​នឹង​បញ្ហា​ប្រឈម​ទាំងនេះ អង្គសន្និបាត​បានស្នើ​ដល់​ក្រសួង​ស្ថាប័ន​ពាក់ព័ន្ធ ធ្វើ​បទអន្តរាគមន៍​ពាក់ព័ន្ធ​នឹង​វិស័យ​កសិកម្ម និង​កិច្ចពិភាក្សា​ដោយ​ផ្តោតលើ​ប្រធានបទ​គន្លឹះ​សំខាន់ៗ​ដែល​ទាក់ទង​នឹង​វិធានការ​គន្លឹះ​ពាក់ព័ន្ធ​វិស័យ​ដំណាំ​កៅស៊ូ និង​អនុវិស័យ​សុខភាព​សត្វ និង​ផលិតកម្ម​សត្វ ដើម្បី​ស្តារ​សេដ្ឋកិច្ច​ក្នុង​បរិបទ​នៃ​ការឆ្លង​រាលដាល​ជំងឺ​កូវីដ ​១៩, ការជំរុញ​ការធ្វើ​​វារីវប្បកម្ម​ប្រកបដោយ​គុណភាព និង​ស្រប​តម្រូវការ​ទីផ្សារ​ជាដើម​»​។

លោក សម វិទូ ទីប្រឹក្សា​ឯករាជ្យ​ផ្នែក​វិស័យ​កសិកម្ម​នៅ​កម្ពុជា បាន​និយាយថា សម្រាប់​ការផលិត​ក្នុងស្រុក​ត្រូវ​ផ្តោតលើ​ចំណុច​សំខាន់​មួយចំនួន​​ដូចជា គុណភាព តម្លៃ ការចងក្រង​ជា​សហគមន៍ និង​ផែនការ​ផលិត​។

លោក​ថ្លែងថា​៖ «​ជាទូទៅ​យើង​ឃើញថា ទាក់ទង​នឹង​ចំណុច​ទាំងនេះ​យើង​ធ្វើបាន​ច្រើន​ហើយ តែ​មិនទាន់​គ្រប់ ដែល​ធ្វើឱ្យ​មានការ​នាំចូល​ច្រើន​។ បើសិន​យើង​អាចអនុវត្ត​ចំណុច​ទាំងនេះ​ឱ្យបាន​ជា​អតិបរមា វា​នឹង​ក្លាយជា​យន្តការ​ក្នុង​ការ​រៀបចំ​កសិករ​ធ្វើការ​រួមគ្នា ដើម្បីឱ្យ​ផលិតផល​មាន​ការប្រកួតប្រជែង​ខ្ពស់​»​។

តាម​ការឱ្យ​ដឹងពី​រដ្ឋ​មន្ត្រី​កសិកម្ម តម្លៃ​នៃ​ការនាំចេញ​ផលិតផល​កសិកម្ម​ក្នុង​ឆ្នាំ​ ២០២១ សម្រេចបាន​ក្នុង​ទំហំ​ទឹកប្រាក់ ៥​ ពាន់​លាន​ដុល្លារ​កើន​ ២៥ ​ភាគរយ​ធៀប​ឆ្នាំ​ ២០២០៕

អត្ថបទគួរចាប់អារម្មណ៍