ភ្នំពេញៈ កិច្ចការផលិតផលហាឡាល គឺជាប្រធានបទដែលរដ្ឋាភិបាលកម្ពុជាកំពុងយកចិត្តទុកដាក់ ព្រោះផលិតផលនេះមិនត្រឹមតែមានតម្រូវការខ្ពស់សម្រាប់ប្រទេសកាន់សាសនាអ៊ិស្លាមប៉ុណ្ណោះទេ ប៉ុន្តែក៏មានតម្រូវការនៅប្រទេសដទៃទៀតដែរ។ នេះបើតាមការអះអាងរបស់លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម។
គណៈកម្មាធិការត្រួតពិនិត្យផលិតផលហាឡាលកម្ពុជា (គ.ត.ផ.ហ.ក.) បានរៀបចំកិច្ចប្រជុំលើកដំបូងរបស់ខ្លួននៅទីស្តីការក្រសួងពាណិជ្ជកម្មកាលពីថ្ងៃទី ២២ ខែមីនា ដោយមានការចូលរួមពីលោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម និងជាប្រធានគណៈកម្មាធិការត្រួតពិនិត្យផលិតផលហាឡាលកម្ពុជា លោក អូស្មាន ហាស្សាន់ ទេសរដ្ឋមន្ត្រីទទួលបន្ទុកបេសកកម្មពិសេស និងជាអនុប្រធាន គ.ត.ផ.ហ.ក. ព្រមទាំងថ្នាក់ដឹកនាំ ក្រុមឯកទេសផលិតផលហាឡាល និងមន្ត្រីក្រសួងពាណិជ្ជកម្មជាច្រើនរូប។
កិច្ចប្រជុំនេះធ្វើឡើងនៅក្នុងគោលបំណង ដើម្បីពិនិត្យរបាយការណ៍របស់លេខាធិការដ្ឋាន គ.ត.ផ.ហ.ក. ការប្រមូលធាតុចូល ព្រមទាំងកំណត់ផែនការសកម្មភាពរបស់ គ.ត.ផ.ហ.ក. ដែលត្រូវអនុវត្តបន្ត។
ក្នុងកិច្ចប្រជុំនោះ លោក ប៉ាន សូរស័ក្តិ លើកឡើងថា កិច្ចការហាឡាល គឺជាប្រធានបទដ៏សំខាន់ដែលរដ្ឋាភិបាលកម្ពុជាកំពុងយកចិត្តទុកដាក់ ហេតុនេះគ្រប់ផ្នែកពាក់ព័ន្ធត្រូវតែខិតខំរិះរកវិធីសាស្ត្រល្អៗ និងថ្មីៗដើម្បីធ្វើយ៉ាងណាឱ្យកិច្ចការនេះទទួលជោគជ័យ និងទទួលការគាំទ្រ និងទំនុកចិត្តពីគ្រប់មជ្ឈដ្ឋាន។ លោកបន្តថា សម្រាប់កិច្ចការសំខាន់ៗនៅចំពោះមុខដែល គ.ត.ផ.ហ.ក. ត្រូវខិតខំ និងបន្តអនុវត្តមានដូចជា ការពង្រឹងគុណភាពការផ្តល់សេវា និងជំរុញការស្នើសុំវិញ្ញាបនបត្របញ្ជាក់បច្ចេកទេសស្តង់ដាផលិតផលហាឡាលកម្ពុជា, ការយកកម្រៃសេវាសាធារណៈលើកិច្ចការចុះបញ្ជី និងវិញ្ញាបនបត្របញ្ជាក់បច្ចេកទេសស្តង់ដាផលិតផលហាឡាលកម្ពុជា, ការរៀបចំសេចក្តីព្រាងសេចក្តីសម្រេចស្តីពីការតែងតាំងសមាសភាពនៃលេខាធិការដ្ឋាននៃ គ.ត.ផ.ហ.ក. និងសមាសភាពនៃក្រុមឯកទេសផលិតផលហាឡាលនៃ គ.ត.ផ.ហ.ក. ។ ចំណែកចំណុចសំខាន់ផ្សេងៗទៀតរួមមាន ការលើកកម្ពស់ទំនុកចិត្តលើការប្រើប្រាស់ស្លាកសញ្ញាហាឡាលកម្ពុជា តាមរយៈការជំរុញការអនុវត្តច្បាប់ និងបទប្បញ្ញត្តិបច្ចេកទេសពាក់ព័ន្ធដោយទន់ភ្លន់ ប្រកបដោយជំនាញ និងវិជ្ជាជីវៈ, និងការជំរុញលើកកម្ពស់ការយល់ដឹងអំពីកិច្ចការហាឡាល។
លោក សូរស័ក្តិ បញ្ជាក់ថា៖ «កិច្ចការហាឡាល គឺជាប្រធានបទសំខាន់ដែលរាជរដ្ឋាភិបាលកម្ពុជា បាននិងកំពុងយកចិត្តទុកដាក់យ៉ាងខ្លាំង ដោយក្នុងនោះផលិតផលហាឡាល មិនត្រឹមតែមានតម្រូវការខ្ពស់នៅប្រទេសកាន់សាសនាអ៊ិស្លាមប៉ុណ្ណោះទេ ប៉ុន្តែសម្រាប់ប្រទេសដទៃទៀត ក៏មានតម្រូវការផលិតផលហាឡាលផងដែរ ដោយសារពាក្យថា «ហាឡាល» គឺសំដៅលើភាពស្អាត ឬអនាម័យខ្ពស់ ដែលធ្វើការផលិតដោយអនុលោមតាមច្បាប់ និងបទប្បញ្ញត្តិអ៊ិស្លាម»។
អគ្គនាយកនៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ លោក ផាន អូន បានឱ្យដឹងថា គិតមកដល់ពេលនេះ កិច្ចការវិញ្ញាបនបត្របញ្ជាក់បច្ចេកទេសស្តង់ដាផលិតផលហាឡាលកម្ពុជា ទទួលបានពាក្យស្នើសុំចំនួន ២២១ និងបានចេញវិញ្ញាបនបត្រ ១៩៦ វិញ្ញាបនបត្រ ដែលមាន ១០០ ក្រុមហ៊ុនសហគ្រាស សិប្បកម្ម និងអាហារដ្ឋាន ស្មើនឹងផលិតផលចំនួន ៦១៩ មុខទំនិញ។
លោកបន្ថែមថា៖ « គ.ត.ផ.ហ.ក. តែងតែធ្វើការអំពាវនាវជាប្រចាំឱ្យក្រុមហ៊ុនសហគ្រាស សិប្បកម្ម និងសេវាករទាំងអស់ ដែលមានបំណងស្នើសុំវិញ្ញាបនបត្របញ្ជាក់បច្ចេកទេសស្តង់ដាផលិតផលហាឡាលកម្ពុជា សូមទាក់ទងមកអគ្គនាយកដ្ឋាន ក.ប.ប. នៃក្រសួងពាណិជ្ជកម្មដើម្បីឱ្យក្រុមការងារពិនិត្យ និងវាយតម្លៃ»។
អនុប្រធានសភាពាណិជ្ជកម្មកម្ពុជា លោក លឹម ហេង បានប្រាប់ភ្នំពេញប៉ុស្តិ៍ថា ការគិតគូរពីផលិតផលហាឡាល ជាកិច្ចការសំខាន់ដែលនឹងរួមចំណែកដល់ការជំរុញកំណើនសេដ្ឋកិច្ច ព្រោះនៅពេលប្រទេសកម្ពុជាមានផលិតផលហាឡាលសម្បូរបែប និងមានស្តង់ដាគុណភាពច្បាស់លាស់ វាមិនត្រឹមតែជួយទាក់ទាញភ្ញៀវទេសចរប៉ុណ្ណោះទេ ប៉ុន្តែថែមទាំងទាក់ទាញវិនិយោគិនផងដែរ។
លោកនិយាយថា៖ «ការដាក់ផែនការ និងការរៀបចំគ្រប់គ្រងគុណភាពផលិតផលហាឡាលបានល្អនឹងជួយឱ្យកម្ពុជាទាក់ទាញទេសចរអ៊ិស្លាមមកកម្សាន្តកាន់តែច្រើន ហើយការវិនិយោគលើផលិតផលអាហារសម្រាប់សេចក្តីត្រូវការក្នុងស្រុក និងនាំចេញនឹងកើនឡើង»៕ LA