ទីក្រុងម៉ូស្គូៈ ប្រធានាធិបតីរុស្ស៊ី លោក វ្ល៉ាឌីមៀរ ពូទីន បាននិយាយកាលពីថ្ងៃពុធថា រុស្ស៊ីនឹងទទួលយកតែការទូទាត់ជាប្រាក់រូប្លិ៍សម្រាប់ការចែកចាយឧស្ម័នទៅកាន់ «បណ្តាប្រទេសអមិត្ត (Unfriendly Countries)» ដែលរួមមានសមាជិកសហភាពអឺរ៉ុបទាំងអស់ បន្ទាប់ពីទីក្រុងម៉ូស្គូរងការវាយប្រហារដោយទណ្ឌកម្មដែលមិនធ្លាប់ មានពីមុនជុំវិញការធ្វើសង្គ្រាមនៅប្រទេសអ៊ុយក្រែន។
ភ្លាមៗបន្ទាប់ពីការប្រកាសរបស់គាត់ ប្រាក់រូប្លិ៍ ដែលបានធ្លាក់ចុះចាប់តាំងពីការចាប់ផ្តើមនៃជម្លោះនៅអ៊ុយក្រែនបានឡើងថ្លៃធៀបនឹងប្រាក់ដុល្លារ និងប្រាក់អឺរ៉ូ ខណៈដែលតម្លៃឧស្ម័នបានកើនឡើង។
លោក ពូទីន បាននិយាយក្នុងអំឡុងពេលកិច្ចប្រជុំរដ្ឋាភិបាលតាមទូរទស្សន៍ថា «ខ្ញុំបានសម្រេចចិត្តអនុវត្តសំណុំនៃវិធានការ ដើម្បីផ្ទេរការទូទាត់សម្រាប់ការផ្គត់ផ្គង់ឧស្ម័នរបស់យើងទៅកាន់ប្រទេសដែលអមិត្តទៅជាប្រាក់រូប្លិ៍រុស្ស៊ី»។
ទោះជាយ៉ាងណា លោកបានបន្ថែមថា រុស្ស៊ីនឹងបន្តផ្គត់ផ្គង់បរិមាណឧស្ម័នដែលមានចែងក្នុងកិច្ចសន្យារបស់ខ្លួន។
លោក ពូទីន បានបញ្ជាឱ្យធនាគារកណ្តាលរបស់រុស្ស៊ីអនុវត្តប្រព័ន្ធទូទាត់ថ្មីក្នុងរយៈពេល ១ សប្តាហ៍ ដោយនិយាយ ថាវាត្រូវតែមាន «តម្លាភាព» ហើយនឹងពាក់ព័ន្ធនឹងការទិញជាប្រាក់រូប្លិ៍នៅលើទីផ្សារក្នុងស្រុករបស់រុស្ស៊ី។
លោក ពូទីន ក៏បានណែនាំថាការនាំចេញរបស់រុស្ស៊ីផ្សេងទៀតអាចរងផលប៉ះពាល់។
ក្រោយមកនៅថ្ងៃពុធ ទីភ្នាក់ងារអវកាសរុស្ស៊ី Roscosmos បានប្រកាសថា ខ្លួនក៏នឹងទទូចឱ្យដៃគូអន្តរជាតិរបស់ខ្លួនបង់ប្រាក់ជាប្រាក់រូប្លិ៍។
លោក Dmitry Rogozin ប្រធាន Roscosmos ត្រូវបានដកស្រង់សម្តីដោយទីភ្នាក់ងារសារព័ត៌មាន Tass ថា៖ «យើងក៏នឹងបញ្ចប់កិច្ចព្រមព្រៀងខាងក្រៅរបស់យើងទាំងអស់ជាប្រាក់រូប្លិ៍»។
លោក ពូទីន បាននិយាយថា «វាច្បាស់ណាស់ថា ការបញ្ជូនទំនិញរបស់យើងទៅកាន់សហភាពអឺរ៉ុប សហរដ្ឋអាមេរិក និងការទទួលប្រាក់ដុល្លារ ប្រាក់អឺរ៉ូ រូបិយប័ណ្ណផ្សេងទៀត មិនមានន័យចំពោះយើងទេ»។
អ៊ុយក្រែនបានថ្កោលទោសយ៉ាងឆាប់រហ័សចំពោះ «សង្គ្រាមសេដ្ឋកិច្ច» របស់រុស្ស៊ីលើសហភាពអឺរ៉ុប និងកិច្ចខិតខំប្រឹងប្រែងរបស់ខ្លួនដើម្បី «ពង្រឹងប្រាក់រូប្លិ៍»។
លោក Andriy Yermak ទីប្រឹក្សាប្រធានាធិបតីអ៊ុយក្រែនបាននិយាយនៅលើ Telegram ថា «ប៉ុន្តែប្រទេសលោកខាងលិចអាចវាយប្រហារប្រទេសរុស្ស៊ីជាមួយនឹងការហ៊ុមព័ទ្ធប្រេងដែលនឹងធ្វើឱ្យសេដ្ឋកិច្ចរុស្ស៊ីធ្លាក់ចុះ»។
លោកបានបន្ថែមថា៖ «ឥឡូវនេះ នេះគឺជាសមរភូមិសេដ្ឋកិច្ចដ៏សំខាន់ ហើយលោកខាងលិចត្រូវតែរួមគ្នាឈ្នះវា»។
លោក Robert Habeck រដ្ឋមន្ត្រីក្រសួងសេដ្ឋកិច្ចអាល្លឺម៉ង់ ដែលប្រទេសរបស់ខ្លួនបាននាំចូលឧស្ម័នធម្មជាតិចំនួន ៥៥ ភាគរយពីរុស្ស៊ីមុនពេលមានជម្លោះនោះ បាននិយាយថា តម្រូវការរបស់លោកពូទីន គឺជាការបំពានកិច្ចសន្យា ហើយថាទីក្រុងប៊ែរឡាំងនឹងពិភាក្សាជាមួយដៃគូអឺរ៉ុប «របៀបដែលយើងនឹងប្រតិកម្មចំពោះរឿងនោះ»។
ក្រុមហ៊ុនថាមពល OMV របស់ប្រទេសអូទ្រីសបាននិយាយកាលពីថ្ងៃពុធថា ខ្លួននឹងបន្តបង់ប្រាក់សម្រាប់ឧស្ម័នរុស្ស៊ីជាប្រាក់អឺរ៉ូ ទោះបីជាមានការប្រកាស។
លោក Alfred Stern នាយកប្រតិបត្តិ OMV បានប្រាប់ទូរទស្សន៍អូទ្រីសថា «យើងមិនមានមូលដ្ឋានផ្សេងទៀតសម្រាប់កិច្ចសន្យានោះទេ។ ខ្ញុំនឹងមិនអាចធ្វើអ្វីផ្សេងបានទេ»។
បណ្តាប្រទេសលោកខាងលិចបានដាក់ទណ្ឌកម្មយ៉ាងធ្ងន់ធ្ងរលើទីក្រុងម៉ូស្គូ ចាប់តាំងពីរុស្ស៊ី បានធ្វើប្រតិបត្តិការយោធាចូលទៅក្នុងទឹកដីអ៊ុយក្រែន។
លោកខាងលិចបានបង្កកប្រាក់បម្រុងរូបិយប័ណ្ណបរទេសរបស់រុស្ស៊ីប្រមាណ ៣០០ ពាន់លានដុល្លារនៅបរទេស ដែលជាទង្វើដែលរដ្ឋមន្ត្រីការបរទេសលោក Sergei Lavrov នៅថ្ងៃពុធបានហៅថាជា «ចោរកម្ម»។
ប៉ុន្តែខណៈពេលដែលសហរដ្ឋអាមេរិកបានហាមឃាត់ការនាំចូលប្រេង និងឧស្ម័នពីប្រទេសរុស្ស៊ី សហភាពអឺរ៉ុបដែលបានទទួលប្រហែល ៤០ ភាគរយនៃការផ្គត់ផ្គង់ឧស្ម័នពីប្រទេសរុស្ស៊ីក្នុងឆ្នាំ ២០២១ បានរក្សាផ្គត់ផ្គង់ពីទីក្រុងម៉ូស្គូ។
ទោះជាយ៉ាងណាក៏ដោយ ទីក្រុងប្រ៊ុចសែលបានកំណត់គោលដៅកាត់បន្ថយការនាំចូលឧស្ម័នរបស់រុស្ស៊ីចំនួន ២ ភាគ ៣ នៅចុងឆ្នាំនេះ ហើយកំពុងសម្លឹងមើលការហ៊ុមព័ទ្ធដោយទណ្ឌកម្មប្រេង។
លោក Ipek Ozkardeskaya អ្នកវិភាគជាន់ខ្ពស់នៅ Swissquote លោកថា៖ «រុស្ស៊ីឥឡូវនេះកំពុងព្យាយាមដាក់សម្ពាធលើប្រទេសលោកខាងលិចជាមួយនឹងទណ្ឌកម្មប្រឆាំង និងកាត់បន្ថយការពឹងផ្អែកលើរូបិយប័ណ្ណបរទេស»៕ RR