ទីក្រុងវ៉ាស៊ីនតោនៈ រដ្ឋាភិបាលអាមេរិកបានប្រកាសកាលពីថ្ងៃពុធថា ខ្លួននឹងដំណើរការឡើងវិញការលើកលែងពន្ធនាំចូល សម្រាប់ផលិតផលរបស់ប្រទេសចិនចំនួន ៣៥២ មុខ ដែលបានទទួលរងពន្ធពិន័យជាលើកដំបូងកាលពីឆ្នាំ ២០១៨ នៅពេលដែលលោកប្រធានាធិបតី ដូណាល់ ត្រាំនៅពេលនោះ បានចាប់ផ្តើមសង្គ្រាមពាណិជ្ជកម្មជាមួយទីក្រុងប៉េកាំង។
ការលើកលែងនេះត្រូវបានបញ្ចប់កាលពីចុងឆ្នាំ ២០២០ ប៉ុន្តែរដ្ឋបាលរបស់លោកប្រធានាធិបតី ចូ បៃដិន កាលពីខែ តុលាឆ្នាំមុនបានចាប់ផ្តើមស្វែងរកយោបល់លើផលិតផលរបស់ប្រទេសចិនដែលទទួលបានសិទ្ធិចំនួន ៥៤៩ មុខដែលជាថ្មីម្ដងទៀតត្រូវដកចេញពីពន្ធនាំចូល។
នៅក្នុងសេចក្តីប្រកាសព័ត៌មានមួយ តំណាងពាណិជ្ជកម្មអាមេរិក (USTR) បានឱ្យដឹងថា៖ «ការប្តេជ្ញាចិត្តនៅថ្ងៃនេះ ត្រូវបានធ្វើឡើងបន្ទាប់ពីការពិចារណាយ៉ាងយកចិត្តទុកដាក់លើមតិជាសាធារណៈ និងដោយមានការពិគ្រោះយោបល់ជាមួយទីភ្នាក់ងារផ្សេងទៀតរបស់អាមេរិក»។
USTR បានឱ្យដឹងនៅក្នុងសេចក្តីប្រកាសព័ត៌មានមួយថា ការលើកលែងនេះគឺមានប្រតិសកម្មចាប់ពីថ្ងៃទី ១២ ខែតុលាឆ្នាំមុន ហើយបន្តរហូតដល់ចុងឆ្នាំ ២០២២។
រដ្ឋបាលលោក បៃដិន បានរងសម្ពាធពីក្រុមហ៊ុននានាក៏ដូចជាតំណាងរាស្ដ្រគណបក្សប្រជាធិបតេយ្យ និងគណបក្សសាធារណរដ្ឋឱ្យកាត់បន្ថយបន្ទុកពន្ធនាំចូល ដែលក្រុមអ្នករិះគន់ឱ្យដឹងថា ធ្វើឱ្យបញ្ហាផ្គត់ផ្គង់កាន់តែធ្ងន់ធ្ងរ និងបង្កើនតម្លៃកើនឡើង នៅពេលដែលអាមេរិកដោះស្រាយជាមួយនឹងរលកអតិផរណាខ្ពស់បំផុតមិនធ្លាប់មាន។
ជម្លោះពាណិជ្ជកម្មរវាងអាមេរិក និងចិនបានចាប់ផ្តើមនៅពេលដែលលោក ត្រាំ បានហូតពន្ធលើផលិតផលរបស់ប្រទេសចិនដែលមានតម្លៃ ៣៧០ ពាន់លានដុល្លារ ដោយលើកឡើងពីការអនុវត្តពាណិជ្ជកម្ម «មិនស្មើភាព»។
ទោះបីជាយ៉ាងណាក៏ដោយ ការមិនរាប់បញ្ចូលទំនិញជាង ២ ២០០ មុខត្រូវបានផ្តល់ហើយទំនិញចំនួន ៥៤៩ មុខក្នុងចំណោមទំនិញទាំងនោះត្រូវបានបន្ត ដោយភាគច្រើននៃការមិនរាប់បញ្ចូលនឹងផុតកំណត់នៅចុងឆ្នាំ ២០២០។
ទីក្រុងវ៉ាស៊ីនតោន និងទីក្រុងប៉េកាំងកាលពីខែមករា ឆ្នាំ ២០២០ បានចុះហត្ថលេខាលើកិច្ចព្រមព្រៀងពាណិជ្ជកម្មមួយហៅថា «ដំណាក់កាលទី ១»ស្ថិតក្រោមទីក្រុងប៉េកាំង ដែលបានសន្យាថានឹងបង្កើនការទិញផលិតផល និងសេវាកម្មរបស់អាមេរិកយ៉ាងហោចណាស់ ២០០ ពាន់លានដុល្លារក្នុងឆ្នាំ ២០២០ និង ២០២១ ជាទិសដៅមួយ ដែលប្រទេសចិនមិនអាចសម្រេចបាន ដោយសារតែការរីករាលដាលជំងឺកូវីដ ១៩។
លោកស្រី Katherine Tai តំណាងពាណិជ្ជកម្មអាមេរិកបានសន្យាថា ខ្លួននឹង «ចូលរួមយ៉ាងមាំមួយ» ជាមួយទីក្រុងប៉េកាំង ជុំវិញការប្តេជ្ញាចិត្តរបស់ខ្លួនចំពោះកិច្ចព្រមព្រៀងនេះ ប៉ុន្តែលោកស្រីបានឱ្យដឹងកាលពីខែមករាថា «យើងស្ថិតក្នុងដំណាក់កាលដ៏លំបាកនៃទំនាក់ទំនងពាណិជ្ជកម្មនេះ» ហើយបានបញ្ជាក់ថា៖ «ការសន្ទនាមិនងាយស្រួលនោះទេ»៕ LA