ទីក្រុងតូក្យូៈ ភាគហ៊ុនិកក្រុមហ៊ុន Toshiba រៀបចំកិច្ចប្រជុំបោះឆ្នោតនៅថ្ងៃព្រហស្បតិ៍លើផែនការមួយ ដើម្បីបំបែកក្រុមហ៊ុនជប៉ុនដែលកំពុងប្រយុទ្ធមួយនេះជា ២ ដែលបានប្រឈមមុខរួចទៅហើយនឹងការប្រឆាំងយ៉ាងម៉ឺងម៉ាត់ពីអ្នកវិនិយោគសំខាន់ៗ។
សន្លឹកឆ្នោតលើសំណើដើម្បីបង្វិលផ្នែកឧបករណ៍អេឡិចត្រូនិករបស់ក្រុមហ៊ុន Toshiba គឺមានន័យដើម្បីបញ្ជាក់ការគាំទ្រនៅមុនការបោះឆ្នោតដំណោះស្រាយដែលរៀបចំទុក។
ប៉ុន្តែភាពជោគជ័យសម្រាប់ផែនការរបស់អ្នកគ្រប់គ្រងនៅឯកិច្ចប្រជុំម្ចាស់ភាគហ៊ុនវិសាមញ្ញកាលពីថ្ងៃព្រហស្បតិ៍គឺនៅឆ្ងាយពីការធានា។
ការបោះឆ្នោតដើម្បីបញ្ចប់ការវិលត្រឡប់នេះនឹងក្លាយជាការថយក្រោយមួយទៀត សម្រាប់ក្រុមហ៊ុនវិស្វកម្មយក្ស និងជាជ័យជម្នះដ៏កម្រសម្រាប់ម្ចាស់ភាគហ៊ុនសកម្មក្នុងក្រុមហ៊ុនជប៉ុនដ៏ចំណាស់មួយនេះ។
ក្រុមហ៊ុន Toshiba ដែលធ្លាប់ជានិមិត្តរូបនៃភាពរីកចម្រើនផ្នែកបច្ចេកវិទ្យា និងធុរកិច្ចរបស់ប្រទេសជប៉ុន បានប្រឈមមុខនឹងរឿងអាស្រូវជាបន្តបន្ទាប់ បញ្ហាហិរញ្ញវត្ថុ និងការលាលែងពីតំណែងនៃថ្នាក់ដឹកនាំជាន់ខ្ពស់ក្នុងប៉ុន្មានឆ្នាំថ្មីៗនេះ។
ផែនការបែងចែកជា ២ ត្រូវបានកែសម្រួលពីគំនិតមុនសម្រាប់ការបំបែកជា ៣ ផ្លូវ ដែលក៏បានជួបការប្រឆាំងយ៉ាងតឹងរ៉ឹងពីអ្នកវិនិយោគមួយចំនួនផងដែរ។
ម្ចាស់ភាគហ៊ុនធំៗ ជាច្រើនបានប្រកែកថា ការផ្តាច់ចេញនឹងបន្ថែមបញ្ហារបស់ Toshiba ដោយបង្កើតមុខតំណែងអ្នកគ្រប់គ្រងបន្ថែមទៀតនៅអង្គភាពតូចៗ ជាជាងការកែធ្វើឱ្យប្រសើរឡើងចំពោះអភិបាលកិច្ចរបស់ក្រុមហ៊ុន។
ហើយអ្នកខ្លះចង់ទិញយកជំនួសវិញ បន្ទាប់ពីការផ្តល់ជូនជម្រើសទិញយកដែលត្រូវបានគេបោះបង់ចោលកាលពីឆ្នាំមុនពីមូលនិធិមូលធនឯកជន CVC Capital Partners។
ក្រុមហ៊ុន Effissimo Capital Management ដែលមានមូលដ្ឋាននៅសិង្ហបុរី ដែលកាន់កាប់ភាគហ៊ុន ១០ ភាគរយនៃភាគហ៊ុនរបស់ក្រុមហ៊ុន Toshiba បាននិយាយថា ខ្លួននឹងច្រានចោលសំណើកាត់ផ្តាច់នេះ។
ក្រុមហ៊ុន 3D Investment Partners ដែលជាម្ចាស់ភាគហ៊ុនសំខាន់មួយទៀតបានជំរុញឱ្យ Toshiba ស្វែងរកជម្រើសផ្សេងៗ រួមទាំងការប្រែក្លាយជាឯកជន ហើយ Farallon Capital Management បាននិយាយថា ការទិញយកនឹង «បញ្ចប់ការមិនទុកចិត្ត និងកំណត់ជំហររបស់ក្រុមហ៊ុនឡើងវិញនាពេលអនាគត»។
លោក Satoshi Tsunakawa ដែលជាឥស្សរជនដ៏សំខាន់ម្នាក់នៅពីក្រោយសំណើកាត់ផ្តាច់ចេញនោះបានចុះចេញពីតំណែងជា CEO ភ្លាមៗនៅដើមខែនេះ បន្ទាប់ពីកាន់តំណែងរយៈពេលខ្លីតិចជាង ១ ឆ្នាំ។ គាត់ត្រូវបានជំនួសដោយ Taro Shimada ដែលគាំទ្រការបំបែកជា ២ ផ្លូវ។
វិនិយោគិនបរទេសបានរក្សាក្រុមហ៊ុន Toshiba ឱ្យនៅដដែល ប៉ុន្តែបានជំរុញឱ្យមានកំណើនលឿនជាងមុន និងយុទ្ធសាស្ត្ររយៈពេលវែងច្បាស់លាស់ជាងមុន។
លោក Travis Lundy អ្នកវិភាគនៅក្រុមហ៊ុន Quiddity Advisors ដែលផ្សាយនៅលើ Smartkarma បានប្រាប់ទីភ្នាក់ងារសារព័ត៌មានបារាំង AFP ថា «គោលដៅលេខមួយ» របស់ Toshiba គឺ «កម្ចាត់ចោលសកម្មជន ធ្វើឱ្យពួកគេចាកចេញ» ។
លោកបានថ្លែងថា៖ «បញ្ហាគឺនៅត្រង់ថា សកម្មជនមានអាណត្តិជាក់លាក់»។
លោកបានបញ្ជាក់ថា៖ «ពួកគេត្រូវតែចេញជាមួយជ័យជម្នះ បើមិនដូច្នេះទេ នៅពេលនេះ ពួកគេនឹងត្រូវចាកចេញជាមួយការចាញ់ ពីព្រោះពួកគេបាននៅទីនោះអស់់ជាច្រើនឆ្នាំមកហើយ»៕ RR