.jpg)
ភ្នំពេញៈ អភិបាលរដ្ឋម៉ាឡាកា នៃប្រទេសម៉ាឡេស៊ី បានបង្ហាញការចាប់អារម្មណ៍ចំពោះការវិនិយោគលើវិស័យមួយចំនួននៅកម្ពុជា ហើយព្រមទាំងបានសន្យានឹងនាំយកនូវព័ត៌មានស្តីពីសក្តានុពលការវិនិយោគនៅកម្ពុជា ទៅប្រាប់ដល់វិនិយោគិនម៉ាឡេស៊ីក្នុងរដ្ឋម៉ាឡាកា ឱ្យមកបណ្តាក់ទុននៅកម្ពុជាឱ្យបានច្រើន។
ការសន្យានេះត្រូវបានធ្វើឡើងដោយ លោក Haji Mohd Ali Bin Mohd Rustam អភិបាលរដ្ឋម៉ាឡាកា ក្នុងអំឡុងពេលជួបពិភាក្សាការងារជាមួយលោក នុត អ៊ុនវ័ណរ៉ា អគ្គលេខាធិការរងគណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា(CDC) នៅទីស្តីការក្រុមប្រឹក្សាអភិវឌ្ឍន៍កម្ពុជា កាលពីថ្ងៃទី២៤ ខែមីនា ឆ្នាំ២០២២។ ក្នុងជំនួបខាងលើក៏មានការចូលរួមរបស់លោក Eldeen Husaini Mohd Hashim ឯកអគ្គរដ្ឋទូតម៉ាឡេស៊ី ប្រចាំនៅកម្ពុជាផងដែរ។
ជាកិច្ចចាប់ផ្តើមលោក នុត អ៊ុនវ័ណរ៉ា បានលើកឡើងពីសក្តានុពល និងកាលានុវត្តភាពវិនិយោគដែលកម្ពុជាមាន និងការវិវត្តថ្មីៗនៃកិច្ចការទាក់ទងនឹងវិនិយោគ ជាពិសេសច្បាប់ស្តីពីវិនិយោគថ្មីនៃព្រះរាជាណាចក្រកម្ពុជា ដែលបានចូលជាធរមានកាលពីថ្ងៃទី១៥ ខែតុលា ឆ្នាំ២០២១ កន្លងទៅ ដោយក្នុងច្បាប់ថ្មីនេះមានការកំណត់នូវវិស័យ និងសកម្មភាពវិនិយោគអាទិភាព, ការផ្តល់ការលើកទឹកចិត្ត និងការការពារវិនិយោគជាដើម ហើយដែលមានភាពប្រសើរ និងទាក់ទាញជាងមុន។
ចំណែកលោក Haji Mohd Ali Bin Mohd Rustam បានបង្ហាញចំណាប់អារម្មណ៍យ៉ាងខ្លាំងចំពោះការវិនិយោគក្នុងវិស័យជាច្រើននៅកម្ពុជា មានដូចជា អប់រំ និងបណ្តុះបណ្តាលវិជ្ជាជីវៈ អចលនទ្រព្យ រ៉ែ និងថាមពល ជាដើម។ បន្ថែមពីលើនេះ លោកក៏បានសន្យា នឹងធ្វើការពាំនាំយកនូវព័ត៌មានស្តីពីសក្តានុពលវិនិយោគនៅកម្ពុជា និងការអភិវឌ្ឍរីកចម្រើនទាំងឡាយដែលលោកបានឃើញ និងស្វែងយល់ដោយផ្ទាល់ក្នុងដំណើរទស្សនកិច្ចនេះទៅប្រាប់មិត្តភក្តិ និងវិនិយោគិនម៉ាឡេស៊ីនៅរដ្ឋម៉ាឡាកា ដើម្បីបានជ្រាបរួចមកសិក្សា និងពិនិត្យលទ្ធភាពបណ្តាក់ទុននៅកម្ពុជា ឱ្យបានកាន់តែច្រើន និងដើម្បីបន្តរឹតចំណងមិត្តភាព និងទំនាក់ទំនងនៃប្រជាជាតិទាំង២ផងដែរ។
ជាការឆ្លើយតប លោក នុត អ៊ុនវ័ណរ៉ា បានលើកឡើងថា៖«កម្ពុជាមានក្តីសោមនស្ស និងការត្រៀមរួចជាស្រេចក្នុងការសហការជាមួយស្ថានទូតម៉ាឡេស៊ីប្រចាំនៅកម្ពុជា ក្នុងការផ្តល់ព័ត៌មានស្តីពីវិនិយោគ និងការសម្របសម្រួលរាល់ដំណើរទស្សនកិច្ចរបស់គណៈប្រតិភូវិនិយោគម៉ាឡេស៊ីដទៃទៀតនាពេលខាងមុខ»។
យោងតាម CDC គិតត្រឹមដំណាច់ខែកុម្ភៈ ឆ្នាំ២០២២ ក្រុមប្រឹក្សាអភិវឌ្ឍន៍កម្ពុជាបានស្វាគមន៍ និងចុះបញ្ជីគម្រោងវិនិយោគរបស់ក្រុមហ៊ុនម៉ាឡេស៊ីចំនួន ១៦២គម្រោង ក្នុងទុនវិនិយោគសរុបប្រមាណ ៣, ២ពាន់លានដុល្លារ៕
