ទំនប់វារីអគ្គិសនីសេសានក្រោម ២។ ហុង មិនា
ភ្នំពេញៈ រដ្ឋាភិបាលកម្ពុជាបានយល់ព្រមជាគោលការណ៍ឱ្យក្រុមហ៊ុន Royal Group សហការជាមួយនឹងក្រុមហ៊ុន China (Cambodia) Rich International Co.,Ltd ធ្វើការវិនិយោគលើគម្រោងវារីអគ្គិសនីស្ទឹងត្រែងមានអានុភាព ១ ៤០០ មេហ្គាវ៉ាត់ ស្ថិតក្នុងខេត្តស្ទឹងត្រែង។
លិខិតរបស់លោក គិត ម៉េង ប្រធានក្រុមហ៊ុន Royal Group ផ្ញើជូនលោក ស្វាយ សំអ៊ាង អភិបាលខេត្តស្ទឹងត្រែងដែលភ្នំពេញប៉ុស្តិ៍ទទួលបានក្នុងថ្ងៃទី ២៤ ខែមីនាឱ្យដឹងថា ក្រុមហ៊ុន The Huadong Engineering Corporation Limited គឺជាទីប្រឹក្សាបច្ចេកទេសទទួលបន្ទុកសិក្សាពីសមិទ្ធិលទ្ធភាពរបស់គម្រោង និងបានស្នើអភិបាលខេត្តឱ្យជួយសម្របសម្រួល និងអនុញ្ញាតឱ្យក្រុមបច្ចេកទេសអាចបំពេញកិច្ចការតាមផែនការដែលបានគ្រោងទុក។
លិខិតបន្តថា កាលពីថ្ងៃទី ២៣ ខែធ្នូ ឆ្នាំ ២០២១ ក្រុមបច្ចេកទេសរបស់ក្រុមហ៊ុន The Huadong Engineering Corporation Limited បានបញ្ជូនអ្នកបច្ចេកទេសជំនាញចំនួន ៦ នាក់មកដល់ខេត្តស្ទឹងត្រែង ដើម្បីត្រៀមរៀបចំសិក្សាផ្នែកភូគព្ភសាស្ត្រនៅទីតាំងជើងទំនប់ ដោយត្រូវមានការខួងចំនួន ២៧ ចំណុច។ នៅទីតាំងជើងទំនប់ ដោយត្រូវមានខួងចំនួន ២៧ ចំណុច។
លិខិតសរសេរថា៖ «ក្នុងជំហានដំបូងនេះ ក្រុមការងារត្រូវការបុគ្គលិកខ្មែរចំនួន ១០ នាក់ ហើយជាបន្តបន្ទាប់ ក្រុមអ្នកឯកទេសនឹងត្រូវមកថែមឡើងដល់ ២០ នាក់ ដោយត្រូវការបុគ្គលិកខ្មែរឡើងដល់ ៤០ នាក់ ហើយប្រើពេលវេលា ៦ ខែ គិតចាប់ពីខែមករា-មិថុនា ឆ្នាំ ២០២២»។
លោក ស្វាយ សំអ៊ាង អភិបាលខេត្តស្ទឹងត្រែងកាលពីថ្ងៃទី ៦ ខែមករា ឆ្នាំ ២០២២ បានចេញលិខិតមួយទៅស្រុកថាឡាបរិវ៉ាត់ និងស្រុកបុរីអូរស្វាយសែនជ័យ ដោយបានស្នើឱ្យអភិបាលក្រុង ស្រុកពាក់ព័ន្ធសហការជាមួយក្រុមការងារបច្ចេកទេស The Huadong Engineering Corporation Limited របស់ក្រុមហ៊ុន ROYAL GROUP ស្របតាមគោលការណ៍ និងផែនការអនុវត្តន៍ជាក់ស្តែង។
ភ្នំពេញប៉ុស្តិ៍មិនអាចទាក់ទងលោក ហេង គុណលាង អគ្គនាយកនៃអគ្គនាយកដ្ឋានថាមពល និងជាអ្នកនាំពាក្យក្រសួងរ៉ែ និងថាមពល សុំការធ្វើអត្ថាធិប្បាយបានទេនៅថ្ងៃទី ២៤ ខែមីនា ឆ្នាំ ២០២២ នេះ។
លោក ម៉ែន គុង អ្នកនាំពាក្យរដ្ឋបាលខេត្តស្ទឹងត្រែងបានប្រាប់ភ្នំពេញប៉ុស្តិ៍នៅថ្ងៃទី ២៤ ខែមីនា ថា ក្រុមហ៊ុនគ្រាន់តែសិក្សាសមិទ្ធលទ្ធភាពប៉ុណ្ណោះ ដែលការសិក្សានេះត្រូវការពេលប្រមាណ ៦ ខែ ពោលមិនមែនសិក្សាពីការសាងសង់នោះទេ លុះត្រាតែមានការសម្រេចពីប្រមុខរាជរដ្ឋាភិបាល ទើបអនុញ្ញាតឱ្យមានការសិក្សាសាងសង់គម្រោងនេះ។
លោកបានបន្ថែមទៀតថា ការសិក្សាសមិទ្ធលទ្ធភាពលើគម្រោងនេះត្រូវបានក្រុមហ៊ុនធ្វើការសិក្សាចំនួន ៣ ទីតាំងនៅផ្នែកខាងលើ ផ្នែកកណ្តាល និងផ្នែកខាងក្រោមនៃដងទន្លេមេគង្គក្នុងមូលដ្ឋានខេត្តស្ទឹងត្រែង។ បច្ចុប្បន្នរដ្ឋបាលខេត្តក៏កំពុងរង់ចាំពីការសិក្សាសមិទ្ធលទ្ធភាពនេះដែរ។ ទោះយ៉ាងណានៅពេលដែលសិក្សាចប់សព្វគ្រប់ ក្រុមហ៊ុននឹងរាយការណ៍មករដ្ឋបាលខេត្ត ដើម្បីឱ្យបានដឹង។
បើតាម លោក ម៉ែន គុង ប្រសិនបើគម្រោងនេះនឹងកើតឡើងជាក់ស្តែងនៅពេលខាងមុខ វានឹងផ្តល់ផលប្រយោជន៍លើផ្នែកសេដ្ឋកិច្ចយ៉ាងច្រើនដល់ខេត្តស្ទឹងត្រែង ក៏ដូចជាទូទាំងប្រទេសកម្ពុជាពាក់ព័ន្ធនឹងសន្តិសុខអគ្គិសនី និងជីវភាពរបស់ប្រជាពលរដ្ឋខ្មែរ នឹងមានការកើនឡើងបន្ថែមមួយកម្រិតទៀតតាមរយៈការបង្កើតមុខរបរ។
លោកថ្លែងថា៖ «ថាមពលអគ្គិសនីនឹងរួមចំណែកដល់ការបង្កើតមុខរបរ និងការងារច្រើនដល់ប្រជាពលរដ្ឋនៅក្នុងមូលដ្ឋាន ពិសេសវានឹងជំរុញឱ្យមានការផ្លាស់ប្តូរធ្វើកសិកម្មតាមបែបប្រពៃណី ឬបុរាណទៅជាការធ្វើកសិកម្មតាមបែបប្រពលវប្បកម្មវិញ។ បន្ថែមពីនេះ ការធ្វើឱ្យតម្លៃអគ្គិសនីនៅក្នុងប្រទេសកាន់តែចុះថោក វានឹងជួយទាក់ទាញវិនិយោគិនកាន់តែច្រើនថែមទៀត»។
បើតាម លោក ម៉ែន គុង ប្រសិនបើគម្រោងវារីអគ្គិសនីស្ទឹងត្រែងដែលមានអនុភាព ១ ៤០០ មេហ្គាវ៉ាត់នេះ កើតឡើងមួយទៀត វានឹងធ្វើឱ្យខេត្តមានវារីអគ្គិសនីចំនួន ២ ខណៈវារីអគ្គិសនីសេសានក្រោម២ មួយទៀតបានសាងសង់រួចរាល់ និងកំពុងដំណើរការប្រើប្រាស់បច្ចុប្បន្នដែលអាចផលិតថាមពលបាន ៤០០ មេហ្គាវ៉ាត់៕ LA
