ភ្នំពេញៈ ធនាគារ ឈីហ្វ (Chief Bank) បានពង្រីកសេវាកម្មឥណទានខ្នាតតូចតាមប្រព័ន្ធឌីជីថលរបស់ខ្លួន «Chief Easy» តាមរយៈការចុះអនុស្សរណៈនៃការយោគយល់ (MoU) ជាមួយក្រុមហ៊ុនអចលនទ្រព្យមួយនៅកម្ពុជា Zillennium Co., Ltd។
MoU នេះត្រូវបានធ្វើឡើងកាលពីថ្ងៃទី ២៦ ខែមីនា ឆ្នាំ ២០២២ រវាងលោក សឿង ម៉ូរ៉ារិទ្ធ ប្រធាននាយកប្រតិបត្តិធនាគារពាណិជ្ជ ឈីហ្វ និងលោក គុយ វ៉ាត ប្រធានក្រុមប្រឹក្សាភិបាលក្រុមហ៊ុន Zillennium។
តាមរយ:កិច្ចសហការនេះ បុគ្គលិករបស់ក្រុមហ៊ុន Zillennium អាចស្នើឥណទានខ្នាតតូច (ចាប់ពីទឹកប្រាក់ ១០០ ដុល្លារទៅដល់ ១ ០០០ ដុល្លារ) ដោយស្វ័យប្រវត្តិតាមប្រព័ន្ធឌីជីថល ឬហៅថា Chief Easy របស់ធនាគារ ឈីហ្វ ជាមួយនឹងលក្ខខណ្ឌផ្តល់ជូនពិសេស។ MoU នេះក៏នឹងបើកផ្លូវដល់ស្ថាប័នទាំង ២ សហការលើសេវាកម្មផ្សេងៗទៀតផងដែរ។
លោក សឿង ម៉ូរ៉ារិទ្ធ បាននិយាយថា MoU នេះគឺជាការបើកផ្លូវឱ្យស្ថាប័នទាំង ២ បង្កើតនូវកិច្ចសហការជាផ្លូវការជាលើកដំបូង តាមរយៈគម្រោងផ្តល់ឥណទានខ្នាតតូចតាមប្រព័ន្ធឌីជីថល ដែលមានឈ្មោះថា Chief Easy។ គម្រោង Chief Easy នឹងជួយដោះស្រាយបញ្ហាហិរញ្ញវត្ថុជូនដល់បុគ្គលិកក្រុមហ៊ុន Zillennium ដែលមានតម្រូវការសាច់ប្រាក់ ខណៈការអនុម័តកម្ចី គឺមានភាពឆាប់រហ័សបំផុត។
លោកនិយាយថា៖ «Zillennium គឺជាក្រុមហ៊ុនធំ និងដំបូងគេនៅកម្ពុជាដែលធនាគារឈីហ្វ ចុះ MoU ជាមួយសម្រាប់កិច្ចសហប្រតិបត្តិការគម្រោង Chief Easy ដែលជាគម្រោងមានភាពងាយស្រួល និងឆាប់រហ័ស»។
ប្រធានក្រុមប្រឹក្សាភិបាលក្រុមហ៊ុន Zillennium លោក គុយ វ៉ាត បានប្រាប់ថា ការចុះ MoU នេះមានន័យថា ធនាគារឈីហ្វនឹងក្លាយជាដៃគូយុទ្ធសាស្ត្រដ៏សំខាន់របស់ Zillennium ហើយក៏ក្លាយជាកម្លាំងចលករថ្មីមួយទៀតដែលបន្ថែមថាមពលឱ្យទីផ្សារអចលនទ្រព្យនៅកម្ពុជាកាន់តែរីកចម្រើន។ លោកបន្ថែមថា នៅពេលទីផ្សារអចលនទ្រព្យមានដំណើរការល្អ វានឹងជួយធ្វើឱ្យប្រតិបត្តិការនៃការផ្ទេរប្រាក់តាមរយៈធនាគារមានដំណើរល្អទៅតាមនោះដែរ។
លោកប្រាប់ថា៖ «ការសហការនេះ នឹងមិនបញ្ចប់ត្រឹមនេះទេ ដោយយើងនឹងមានកិច្ចសហការជាយុទ្ធសាស្ត្រក្នុងរយៈវែងជាមួយគ្នាបន្ថែមទៀត»។
អគ្គនាយករងធនាគារពាណិជ្ជឈីហ្វ (ខេមបូឌា) ម.ក លោក តាន់ ស៊ីម បានប្រាប់ភ្នំពេញប៉ុស្តិ៍ថា នេះជាការបោះជំហានថ្មីមួយទៀតរបស់ធនាគារឈីហ្វ ក្នុងការពង្រីកប្រតិបត្តិការផ្តល់ប្រាក់កម្ចីខ្នាតតូចតាមប្រព័ន្ធឌីជីថល Chief Easy ទៅកាន់អតិថិជន តាមរយៈការចុះ MoU ជាមួយក្រុមហ៊ុន Zillennium។ លោកបន្ថែមថា Chief Easy គឺជាកម្មវិធីដែលឆ្លើយតបនឹងការវិវឌ្ឍដ៏ឆាប់រហ័សនៃការប្រើប្រាស់ប្រព័ន្ធឌីជីថលនៅកម្ពុជា។
លោកថ្លែងថា៖ «Zillennium គឺជាក្រុមហ៊ុនដ៏ធំ និងដំបូងគេនៅកម្ពុជាដែលធនាគារឈីហ្វ បានចុះ MoU ជាមួយសម្រាប់កិច្ចសហប្រតិបត្តិការគម្រោង Chief Easy។ គម្រោងនេះនឹងអនុញ្ញាតឱ្យបុគ្គលិក Zillennium អាចស្នើសុំកម្ចីខ្នាតតូចមកកាន់ធនាគារឈីហ្វតាមប្រព័ន្ធឌីជីថល»។
លោកប្រាប់ទៀតថា រាល់អតិថិជនរបស់ធនាគារ ឈីហ្វ អាចដោនឡូតកម្មវិធី Chief Easy ដើម្បីបំពេញព័ត៌មានផ្ទាល់ខ្លួនតាមប្រព័ន្ធអនឡាញ និងបញ្ជូនមកធនាគារ ដើម្បីផ្ទៀងផ្ទាត់ព័ត៌មាន និងអនុម័ត។
យោងតាមលោក តាន់ ស៊ីម នៅក្នុងដំណាក់កាលដំបូង ធនាគារពាណិជ្ជ ឈីហ្វ នឹងផ្តល់ឱកាសឱ្យបុគ្គលិកក្រុមហ៊ុន Zillennium អាចស្នើសុំកម្ចីខ្នាតតូចតាមរយៈប្រព័ន្ធឌីជីថល ដោយរយៈពេលនៃការអនុម័តនឹងមិនលើសពី ២៤ ម៉ោងនៃថ្ងៃធ្វើការ៕ LA