.jpg)
ទីក្រុងប៉ារីសៈ ទីភ្នាក់ងារថាមពលអន្តរជាតិ (IEA) បានអនុម័តអាណត្តិទី ៣ សម្រាប់លោក Fatih Birol ជានាយកប្រតិបត្តិ ខណៈអង្គការមួយនេះស្វែងរកការផ្លាស់ប្តូរកាន់តែលឿនទៅរកថាមពលស្អាត។ នេះបើយោងតាម IEA បានឱ្យដឹងនៅថ្ងៃសុក្រ។
សេដ្ឋវិទូតួកគីរូបនេះ ដែលកាន់តួនាទីតាំងពីខែកញ្ញា ២០១៥ នឹងកាន់តំណែងរយៈពេល ៤ ឆ្នាំទៀតចាប់ពីខែកញ្ញា ឆ្នាំ ២០២៣។
IEA បានឱ្យដឹងនៅក្នុងសេចក្តីប្រកាសព័ត៌មានមួយថា អាណត្តិរបស់លោក ដែលត្រូវបានអនុម័តជាឯកច្ឆន្ទដោយក្រុមប្រឹក្សាភិបាលរបស់ទីភ្នាក់ងារដែលមានមូលដ្ឋាននៅទីក្រុងប៉ារីសមួយនេះបានមកដល់ «ពេលវេលាដ៏សំខាន់ »មួយ សម្រាប់ IEA។
IEA បានបន្ថែមថា លោក Birol នៅពេលនេះមាន «ការគាំទ្រដ៏រឹងមាំដើម្បីដឹកនាំយុគសម័យថ្មីសម្រាប់ IEA»។
ចាប់តាំងពីការចាប់ផ្តើមរបស់ខ្លួន ទីភ្នាក់ងារនេះបានផ្តោតលើសន្តិសុខថាមពលក្នុងចំណោមបណ្ដាប្រទេសអភិវឌ្ឍន៍ ប៉ុន្តែបេសកកម្មរបស់ខ្លួនត្រូវបានបន្តជាផ្លូវការនៅសប្តាហ៍នេះ ដើម្បីស្វែងរកការបំភាយឧស្ម័នកាបូនសូន្យ ដើម្បីដោះស្រាយការប្រែប្រួលអាកាសធាតុ។
ក្នុងចំណោមបេសកកម្មថ្មីៗរបស់ខ្លួន IEA ក៏នឹងផ្តោតលើបញ្ហាធនធានលោហៈ និងរ៉ែ ដែលជាគន្លឹះដ៏សំខាន់ក្នុងការផលិតហាដវែរថាមពលគ្មានកាបូន។
IEA ត្រូវបានបង្កើតឡើងកាលពីឆ្នាំ ១៩៧៤ បន្ទាប់ពីវិបត្តិប្រេងជាមួយនឹងអាណត្តិ ដែលផ្តោតលើសន្តិសុខថាមពល និងកិច្ចសហប្រតិបត្តិការគោលនយោបាយ។
ស្ថិតក្រោមការដឹកនាំរបស់លោក Birol អង្គការ IEA បានផ្តោតលើការផ្លាស់ប្តូរទៅរកថាមពលការបំភាយកាបូនសូន្យ ដែលជាផ្នែកមួយនៃការប្រយុទ្ធប្រឆាំងនឹងការប្រែប្រួលអាកាសធាតុរបស់វិស័យនេះ។
កាលពីខែឧសភា ឆ្នាំ ២០២១ អង្គការ IEA បានផលិតផែនទីបង្ហាញផ្លូវមួយដែលរួមបញ្ចូលការអំពាវនាវឲ្យមិនមានការវិនិយោគលើគម្រោងផ្គត់ផ្គង់ឥន្ធនៈ ហ្វូស៊ីលថ្មី៕ LA
