.jpg)
ចម្ការកៅស៊ូ ១ កន្លែង ក្នុងខេត្តរតនគិរី។ ហេង ជីវ័ន
ភ្នំពេញៈ កម្ពុជាប្រមូលប្រាក់បានជាង ៧៧ លានដុល្លារពីការនាំចេញជ័រកៅស៊ូ និងឈើកៅស៊ូទៅកាន់ទីផ្សារអន្តរជាតិក្នុងរយៈពេល ២ ខែដើមឆ្នាំ ២០២២ ខណៈដែលផ្ទៃដីដាំកៅស៊ូមិនប្រែប្រួលនោះទេក្នុងរយៈពេល ២-៣ ឆ្នាំចុងក្រោយនេះ។ នេះបើយោងតាមលោក ហ៊ឹម អូន អគ្គនាយកនៃអគ្គនាយកដ្ឋានកៅស៊ូក្រសួងកសិកម្ម រុក្ខាប្រមាញ់ និងនេសាទ។
យោងតាមទិន្នន័យ ក្នុងខែមករា-កុម្ភៈ ឆ្នាំ ២០២២ ការនាំចេញជ័រកៅស៊ូសម្រេចបានក្នុងបរិមាណ ៤៨ ៥០៩ តោនកើនឡើង ៦ ភាគរយធៀបនឹងរយៈពេល ២ ខែដើមឆ្នាំ ២០២១ និងទទួលបានប្រាក់ ៧៦,៨៨ លានដុល្លារ។ សម្រាប់ជ័រកៅស៊ូ ក្នុងរយៈពេលនេះគឺមានតម្លៃជាមធ្យម ១ ៥៨៥ ដុល្លារ ក្នុង ១ តោន ធ្លាក់ចុះតិចតួចបើធៀបរយៈពេលដូចគ្នាឆ្នាំមុន។
ដោយឡែកនៅក្នុងរយៈពេលខាងលើការនាំចេញឈើកៅស៊ូបានចំនួន ៨០៨ ម៉ែត្រគុប កើន ៦៦ ភាគរយ និងទទួលបានប្រាក់ ៣៥៥ ៩៤៦ ដុល្លារ។
អគ្គនាយកនៃអគ្គនាយកដ្ឋានកៅស៊ូ លោក ហ៊ឹម អូន បានប្រាប់ភ្នំពេញប៉ុស្តិ៍ ក្នុងថ្ងៃទី ២៧ ខែមីនាថា ស្ថានភាពទីផ្សារនាំចេញជ័រកៅស៊ូ និងឈើកៅស៊ូ ក្នុងរយៈពេល ២ ខែ ឆ្នាំ ២០២២ បានបង្ហាញសញ្ញាវិជ្ជមានតិចតួច ខណៈតម្លៃមធ្យមនៅលើទីផ្សារអន្តរជាតិ បានធ្លាក់ចុះក្នុងរង្វង់ ១ ភាគរយធៀបរយៈពេលដូចគ្នាឆ្នាំ ២០២១។ លោកបន្តថា ផ្ទៃដីដាំកៅស៊ូ ក្នុងរយៈពេល ២-៣ ឆ្នាំចុងក្រោយនេះ គឺមិនមានអ្វីប្រែប្រួលទេ។
ទាក់ទងការបើកដំណើរការរោងចក្រផលិតកង់រថយន្តនៅកម្ពុជា (នៅក្នុងខេត្តស្វាយរៀង និងខេត្តព្រះសីហនុ) លោក ហ៊ឹម អូន បានប្រាប់ថា បច្ចុប្បន្នរោងចក្រទាំង ២ មិនទាន់បានប្រមូលទិញកៅស៊ូក្នុងស្រុកទៅប្រើប្រាស់ទេ ដោយសាររោងចក្រទាំង ២ នៅមិនទាន់មានឡសម្រាប់ផ្សំកៅស៊ូសមាស។ ដូច្នេះរាល់ថ្ងៃគឺ ក្រុមហ៊ុនទាំង ២ បានធ្វើការនាំយកកៅស៊ូសមាសពីក្រៅប្រទេសមកផលិតកង់រថយន្តនៅកម្ពុជា។
លោកបន្តថា តម្លៃកៅស៊ូនៅកម្ពុជានឹងកើនឡើងនៅពេលតម្រូវការកៅស៊ូក្នុងស្រុកកើនឡើង។ លោកបានបញ្ជាក់ថា៖ «ក្រុមហ៊ុនទាំង ២ បានសន្យានឹងធ្វើកិច្ចសហការជាមួយនឹងអគ្គនាយកដ្ឋានកៅស៊ូ ដើម្បីប្រមូលកៅស៊ូនៅក្នុងស្រុកឱ្យបានច្រើននៅពេលពួកគេសាងសង់រោងចក្ររួចរាល់»។
អនុប្រធានសភាពាណិជ្ជកម្មកម្ពុជា លោក លឹម ហេង បានប្រាប់ថា ក្នុងរយៈពេលប៉ុន្មានឆ្នាំចុងក្រោយនេះ ការវិនិយោគលើកៅស៊ូមិនសូវមានភាពរីកចម្រើនទេ ព្រោះតម្លៃជ័រកៅស៊ូ-កម្ពុជាត្រូវពឹងផ្អែកទាំងស្រុងទៅលើទីផ្សារអន្តរជាតិ ហើយទិន្នន័យកម្ពុជាប្រមូលបាន គឺពឹងផ្អែកតែទៅលើការនាំចេញមួយមុខប៉ុណ្ណោះ។
ទោះយ៉ាងណា លោកបញ្ជាក់ថា ការបើកដំណើរការរោងចក្រផលិតកង់កៅស៊ូរបស់ក្រុមហ៊ុន Cart Tire Co., Ltd ដើម្បីនាំចេញទៅទីផ្សារអន្តរជាតិកាលពីឆ្នាំ ២០២១ នឹងរួមចំណែកធ្វើឱ្យទីផ្សារនេះមានភាពល្អប្រសើរឡើងវិញជាបណ្តើរៗ។
លោកថ្លែងថា៖ «យើងរំពឹងថា ការបណ្តាក់ទុនថ្មីៗលើរោងចក្រផលិតកង់រថយន្ត និងការបើករោងចក្រដំឡើងរថយន្តនៅកម្ពុជា នឹងធ្វើឱ្យតម្រូវការប្រើប្រាស់ជ័រកៅស៊ូនៅកម្ពុជាកើនឡើង ហើយតម្លៃក៏កើនឡើងជាងមុនផងដែរ»។
រដ្ឋមន្ត្រីក្រសួងកសិកម្ម លោក វេង សាខុន កាលពីថ្ងៃទី ២៣ ខែមីនា ក្នុងពិធីបិទសន្និបាតបូកសរុបការងារឆ្នាំ ២០២១ របស់ក្រសួងបានលើកឡើងថា ឆ្នាំ ២០២១ កម្ពុជារកចំណូលបានជាង ៦១០ លានដុល្លារពីការនាំជ័រកៅស៊ូ និងឈើកៅស៊ូទៅទីផ្សារអន្តរជាតិ៕ LA
