.jpg)
លោកស្រី Kristalina Georgieva នាយកគ្រប់គ្រងមូលនិធិរូបិយប័ណ្ណអន្តរជាតិ(IMF)។ AFP
ទីក្រុងវ៉ាស៊ីនតោនៈ ក្រុមប្រឹក្សាប្រតិបត្តិរបស់ IMF កាលពីថ្ងៃសុក្របានអនុម័តប្រាក់កម្ចីចំនួន ៤៤ ពាន់លានដុល្លារសម្រាប់ប្រទេសអាហ្សង់ទីន ដើម្បីជួយដល់សេដ្ឋកិច្ចរបស់ប្រទេសដែលទទួលរងផលប៉ះពាល់ដោយអតិផរណាជាមួយនឹងទឹកប្រាក់ចំនួន ៩,៧ ពាន់លានដុល្លារនៃមូលនិធិដែលអាចរកបានភ្លាម។
ធនាគារផ្តល់ប្រាក់កម្ចីដែលមានវិបត្តិមានមូលដ្ឋាននៅទីក្រុងវ៉ាស៊ីនតោនមួយនេះ បានឱ្យដឹងថា ការផ្តល់ហិរញ្ញប្បទាននេះ «មានគោលបំណងផ្តល់ឱ្យប្រទេសអាហ្សង់ទីននូវតុល្យភាពនៃការទូទាត់ និងការគាំទ្រផ្នែកថវិកា» ហើយក៏ «ពង្រឹងនិរន្តរភាពបំណុល ដោះស្រាយអតិផរណាខ្ពស់ បង្កើនទុនបម្រុង ដោះស្រាយគម្លាតសង្គម និងហេដ្ឋារចនាសម្ព័ន្ធរបស់ប្រទេសមួយនេះ និងលើកកម្ពស់កំណើនប្រកបដោយបរិយាប័ន្ន»។
លោក Martin Guzman រដ្ឋមន្ត្រីក្រសួងសេដ្ឋកិច្ចប្រទេសអាហ្សង់ទីន បានឱ្យដឹងថា ការរៀបចំទាំងនេះគឺជា «ជំហានទៅមុខ» មួយសម្រាប់ «ស្ថិរភាពម៉ាក្រូសេដ្ឋកិច្ច» និង «ការស្ទុះងើបឡើងវិញនៃសេដ្ឋកិច្ច» របស់ប្រទេសនេះ។
លោក Guzman បានប្រាប់ទីភ្នាក់ងារព័ត៌មាន AFP នៅទីក្រុងប៉ារីសថា កិច្ចព្រមព្រៀងនេះ «អាចឱ្យប្រទេសមួយនេះបន្តបង្កើតលក្ខខណ្ឌ ដើម្បីអាចបន្តការស្ទុះងើបឡើងវិញនៃសេដ្ឋកិច្ចដ៏រឹងមាំដែលប្រទេសមួយនេះកំពុងជួបប្រទះ»។
ព្រឹទ្ធសភាប្រទេសអាហ្សង់ទីនកាលពីខែមុនបានយល់ព្រមលើកិច្ចព្រមព្រៀងមួយជាមួយមូលនិធិរូបិយវត្ថុអន្តរជាតិ ដើម្បីរៀបចំរចនាសម្ព័ន្ធឡើងវិញនៃបំណុលចំនួន ៤៥ ពាន់លានដុល្លារដែលជាប្រាក់កម្ចីដែលបានចុះកិច្ចសន្យាកាលពីឆ្នាំ ២០១៨ ក្រោមការគ្រប់គ្រងរបស់លោក Mauricio Macri អតីតប្រធានាធិបតីនៅពេលនោះ។
លោកស្រី Kristalina Georgieva នាយកគ្រប់គ្រង IMF បានកត់សម្គាល់ថាប្រទេសនេះមានការជម្នះជាមួយនឹងការកើនឡើងតម្លៃយ៉ាងឆាប់រហ័ស និងប្រាក់ចំណូលទាប។
លោកស្រីបានថ្លែងនៅក្នុងសេចក្តីប្រកាសព័ត៌មានមួយថា៖ «ស្ថិតក្នុងបរិការណ៍នេះ កម្មវិធីសេដ្ឋកិច្ចរបស់អាជ្ញាធរកំណត់គោលដៅជាក់ស្តែង និងពិតប្រាកដ រួមជាមួយនឹងគោលនយោបាយដែលអាចជឿទុកចិត្តបានក្នុងការពង្រឹងស្ថិរភាពម៉ាក្រូសេដ្ឋកិច្ច និងចាប់ផ្តើមដោះស្រាយបញ្ហាប្រឈមដែលចាក់ឫសយ៉ាងជ្រៅរបស់ប្រទេសអាហ្សង់ទីន»។
ទោះជាយ៉ាងណា លោកស្រីបានកត់សម្គាល់ថា៖ «ហានិភ័យចំពោះកម្មវិធីនេះ គឺខ្ពស់ណាស់ ហើយផលប៉ះពាល់ដោយសារសង្គ្រាមនៅប្រទេសអ៊ុយក្រែនកំពុងកើតឡើងរួចទៅហើយ»។
កាលពីឆ្នាំ ២០១៨ ស្ថិតក្រោមរដ្ឋាភិបាលលោក Macri ប្រកាន់កណ្តាល IMF បានអនុម័តប្រាក់កម្ចីចំនួនច្រើនបំផុតដែលមិនធ្លាប់មានចំនួន ៥៧ ពាន់លានដុល្លារដល់ប្រទេសអាហ្សង់ទីន។ ប្រទេសនេះទទួលបាន ៤៤ ពាន់លានដុល្លារ ក្នុងចំណោមទឹកប្រាក់នោះ។
ការសងប្រាក់ចំនួន ១៩ ពាន់លានដុល្លារ និង ២០ ពាន់លានដុល្លារបានដល់ពេលកំណត់នៅឆ្នាំនេះ ដែលជាពេលវេលាមួយ ដែលរដ្ឋាភិបាលមួយនេះ គិតថា មិនអាចសងបានទេ។
ប្រទេសអាហ្សង់ទីនទើបតែងើបចេញពីវិបត្តិសេដ្ឋកិច្ចរយៈពេល ៣ ឆ្នាំ និងប្រយុទ្ធប្រឆាំងនឹងអត្រានៃភាពក្រីក្រខ្ពស់ និងអតិផរណាកើនឡើងដែលបានកើនឡើងដល់ ៥០,៩ ភាគរយកាលពីឆ្នាំមុន។
ការផ្តល់ហិរញ្ញប្បទាននេះនឹងប្រើរយៈពេល ៣០ ខែ៕ LA
