ទីក្រុងអង់ការ៉ាៈ លោក Mevlut Cavusoglu រដ្ឋមន្ត្រីក្រសួងការបរទេសតួកគី បានឱ្យដឹងកាលពីថ្ងៃសៅរ៍ថា ក្រុមអ្នកមានទ្រព្យសម្បត្តិច្រើនរបស់រុស្ស៊ីអាចបន្តធ្វើអាជីវកម្មនៅក្នុងប្រទេសតួកគី ដរាបណាពួកគេគោរពច្បាប់ជាតិ និងអន្តរជាតិ។
ក្នុងបទសម្ភាសនៅខាងក្រៅវេទិកាក្នុងទីក្រុងដូហា ប្រទេសកាតា លោក Cavusoglu ត្រូវបានសួរថាតើ ក្រុមអ្នកមានទ្រព្យសម្បត្តិច្រើនរបស់ប្រទេសរុស្ស៊ីដែលប្រឈមមុខនឹងការដាក់ទណ្ឌកម្មពីបណ្តាប្រទេសលោកខាងលិចអាចធ្វើអាជីវកម្មនៅក្នុងប្រទេសតួកគីបានដែរឬទេ?
លោកបានឆ្លើយថា៖ «ពិតណាស់ បើវាមានភាពស្របច្បាប់ បើវាមិនប្រឆាំងនឹងច្បាប់អន្តរជាតិទេ ខ្ញុំនឹងគិតថា អាចធ្វើបាន»។
លោកបន្តថា៖ «ប្រសិនបើវាផ្ទុយនឹងច្បាប់អន្តរជាតិ នោះជារឿងមួយទៀត»។
នាវាទំនើប ២ គ្រឿងដែលជាកម្មសិទ្ធិរបស់ លោក Roman Abramovich មហាសេដ្ឋីរុស្ស៊ីបានចូលចតនៅប្រទេសតួកគីក្នុងសប្តាហ៍នេះ។
នៅពេលសួរអំពីស្ថានភាពរបស់ពួកគេ លោករដ្ឋមន្ត្រីរូបនោះបានឱ្យដឹងថា ប្រទេសតួកគីបានអនុវត្តទណ្ឌកម្មដែលអនុម័តដោយអង្គការសហប្រជាជាតិ។
វិធានការនានាដែលកំណត់គោលដៅកម្មសិទ្ធិរបស់ក្រុមអ្នកមានទ្រព្យសម្បត្តិច្រើនរបស់ប្រទេសរុស្ស៊ីមិនត្រូវបានអនុម័តដោយអង្គការសហប្រជាជាតិនោះទេ ប៉ុន្តែដោយបណ្ដាប្រទេសលោកខាងលិចរួមទាំងអាមេរិក និងបណ្ដាប្រទេសជាសមាជិករបស់សហភាពអឺរ៉ុប។
ប្រទេសទាំងនោះបានដាក់វិធានការដែលមិនធ្លាប់ប្រឆាំងនឹងប្រទេសរុស្ស៊ី ជុំវិញការលុកលុយរបស់ខ្លួនលើប្រទេសអ៊ុយក្រែន រួមទាំងការដាក់ក្រុមអ្នកមានទ្រព្យសម្បត្តិច្រើន និងក្រុមបុគ្គលជាច្រើនផ្សេងទៀតដែលជិតស្និទ្ធនឹងលោក ពូទីន ក្នុងបញ្ជីទណ្ឌកម្ម។
ប្រទេសជាច្រើនបានរឹបអូសទូកកម្សាន្តដែលជាកម្មសិទ្ធិរបស់ក្រុមមហាសេដ្ឋីរុស្ស៊ី ខណៈដែលលោក ចូ បៃដិន ប្រធានាធិបតីអាមេរិកបានប្តេជ្ញាថា សម្ព័ន្ធមិត្តជាច្រើននឹង «រួមគ្នាប្រឆាំងនឹងផលប្រយោជន៍ខុសច្បាប់»។
លោក Abramovich ក៏រងផលប៉ះពាល់ ដោយសារតែការបង្កកទ្រព្យសម្បត្តិនៅចក្រភពអង់គ្លេស និងការហាមការធ្វើដំណើរ។
ប៉ុន្តែ ប្រទេសតួកគី ដែលជាសមាជិកអង្គការណាតូដែលមានទំនាក់ទំនងខ្លាំងជាមួយប្រទេសរុស្ស៊ី និងអ៊ុយក្រែនមិនបានចូលរួមជាមួយរបបទណ្ឌកម្មរបស់បណ្ដាប្រទេសលោកខាងលិចដែលកំណត់ទិសដៅលើក្រុងម៉ូស្គូនោះទេ។
ដោយបានសង្កត់ថាតើក្រុមអ្នកមានទ្រព្យសម្បត្តិច្រើនរបស់ប្រទេសរុស្ស៊ីអាចធ្វើអាជីវកម្មនៅក្នុងប្រទេសតួកគីបានដែរឬទេ? លោក Cavusoglu បានឆ្លើយតបថា៖ «យើងនឹងអនុញ្ញាតឱ្យមានសកម្មភាពផ្លូវច្បាប់ និងស្របច្បាប់ណាមួយ ហើយយើងនឹងមិនអនុញ្ញាតឱ្យមានសកម្មភាពខុសច្បាប់ណាមួយនៅក្នុងប្រទេសតួកគីនោះទេ»។
ប្រទេសតួកគីបានពណ៌នាការលុកលុយរបស់ប្រទេសរុស្ស៊ីលើប្រទេសអ៊ុយក្រែនថា៖ «មិនអាចទទួលយកបាន» ហើយបានផ្តល់សេវាកម្មរបស់ខ្លួនជាអ្នកសម្របសម្រួល ដើម្បីជួយបញ្ចប់សង្គ្រាមនៅអ៊ុយក្រែន។
លោក Cavusoglu បន្តកិច្ចខិតខំប្រឹងប្រែង ដើម្បីទទួលបានកិច្ចព្រមព្រៀងបទឈប់បាញ់បានថ្លែងថា៖ «យើងត្រូវស្វែងរកមធ្យោបាយរក្សាភាពថ្លៃថ្នូរ ឬច្រកចេញប្រកបដោយកិត្តិយសសម្រាប់ភាគីទាំង ២ (ដែលពួកគេ) អាចលក់បានជាសាធារណៈ និងជាសកល»៕ LA
វីដេអូ៖