ទីក្រុងកូណាគ្រី ប្រទេស ហ្គីណេៈ ទូរទស្សន៍សាធារណៈបានប្រកាសថា របបយោធាដែលកំពុងកាន់អំណាចរបស់ប្រទេសហ្គីណេនៅទ្វីបអាហ្វ្រិកខាងលិច សម្រេចបានកិច្ចព្រមព្រៀងមួយមានតម្លៃ ១៥ ពាន់លានដុល្លារជាមួយក្រុមហ៊ុនរ៉ែ Rio Tinto និងក្រុមហ៊ុនដៃគូអាស៊ី-ហ្គីណេ ដើម្បីទាញយកកំណប់រ៉ែដែក Simandou ដ៏ធំនៅភាគអាគ្នេយ៍នៃប្រទេសនេះ។
កិច្ចព្រមព្រៀងត្រីភាគី ដែលបានចុះហត្ថលេខាកាលពីល្ងាចថ្ងៃសុក្រមានរយៈពេល ៣៥ ឆ្នាំសម្រាប់ការអភិវឌ្ឍរួមគ្នាដោយ Rio Tinto ជាក្រុមហ៊ុនរុករករ៉ែឈានមុខគេរបស់អង់គ្លេស អូស្ត្រាលី និងក្រុមហ៊ុន Winning Consortium ដឹកនាំដោយប្រទេសសិង្ហបុរី។
ប្រទេសហ្គីណេមានទ្រព្យសម្បត្តិរ៉ែដ៏គួរឱ្យភ្ញាក់ផ្អើល រួមទាំងកំណប់រ៉ែដែកគុណភាពខ្ពស់ ដែលមិនទាន់បានអភិវឌ្ឍឈានមុខគេរបស់ពិភពលោក។
ប៉ុន្តែរដ្ឋនៅអាហ្វ្រិកខាងលិចមួយនេះ នៅតែជាប់គាំងយ៉ាងជ្រៅក្នុងភាពក្រីក្រ និងការគ្រប់គ្រងដោយប្រើប្រាស់អំណាចមានកេរ្តិ៍ឈ្មោះខាងអំពើពុករលួយ។
ការអភិវឌ្ឍពីមុនត្រូវបានរារាំងរយៈពេលជាច្រើនឆ្នាំដោយសារតែជម្លោះជុំវិញសិទ្ធិរុករករ៉ែ ការសង្ស័យអំពើពុករលួយ និងទំហំនៃការវិនិយោគដែលត្រូវការនៅតំបន់គ្មានច្រកសមុទ្រ និងជាប្រទេសមួយ ដែលខ្វះខាតហេដ្ឋារចនាសម្ព័ន្ធយ៉ាងខ្លាំង។
កាលពីដើមខែនេះ របបយោធារបស់ប្រទេសហ្គីណេបានបញ្ជាឱ្យផ្អាកសកម្មភាពទាំងអស់នៅទីតាំងនោះ ដោយលើកឡើងថា ការងារនៅទីនោះគួរតែលើកកម្ពស់ផលប្រយោជន៍របស់ប្រទេស៕ LA