ភ្នំពេញៈ រដ្ឋមន្ត្រីក្រសួងសាធារណការ លោក ស៊ុន ចាន់ថុល បានអំពាវនាវដល់វិស័យឯកជន អង្គការសង្គមស៊ីវិល និងដៃគូអភិវឌ្ឍន៍នានាឱ្យចូលរួមផ្តល់យោលបល់ជាធាតុចូលក្នុងការតាក់តែងឯកសារយុទ្ធសាស្ត្រ ដើម្បីអភិវឌ្ឍការប្រើប្រាស់រថយន្តអគ្គិសនី (EV ) សំដៅទាក់ទាញអ្នកវិនិយោគមកលើវិស័យនេះឱ្យកាន់តែច្រើន។
ថ្លែងក្នុងពិធីតាំងពិព័រណ៍យានយន្តអគ្គិសនី និងសម្ពោធដាក់ឱ្យប្រើប្រាស់ស្ថានីយបញ្ចូលថាមពលសម្រាប់យានយន្តអគ្គិសនី កាលពីថ្ងៃទី ២៦ ខែមីនា ឆ្នាំ ២០២២ នៅទីស្តីការក្រសួងសាធារណការ និងដឹកជញ្ជូន លោក ស៊ុន ចាន់ថុល បានបញ្ជាក់ថា ដើម្បីទាក់ទាញអ្នកវិនិយោគទុនមកបណ្តាក់ទុនលើ EV លុះត្រាតែកម្ពុជាមានរថយន្តច្រើន ដោយសារអ្នកទិញរថយន្តនឹងមិនចង់ទិញរថយន្តទេបើគ្មានកន្លែងបញ្ចូលថាមពលអគ្គិសនីទៅយានយន្តរបស់គាត់ នេះគឺជាបញ្ហានៅកម្ពុជា។
លោកបានថ្លែងថា៖ «យើងចង់ឆ្លៀតឱកាសនេះដើម្បីផ្សព្វផ្សាយទៅកាន់ប្រជាពលរដ្ឋយើងអំពីការប្រើប្រាស់យានយន្តអគ្គិសនី និងចង់ផ្សព្វផ្សាយដល់អ្នកវិនិយោគឱ្យបណ្តាក់ទុនសាងសង់ស្ថានីយបញ្ចូលថាមពលអគ្គិសនីដើម្បីបញ្ចូលថាមពលអគ្គិសនីទូទាំងប្រទេស លុះត្រាតែយើងមានស្ថានីយបញ្ចូលអគ្គិសនីនៅទូទាំងប្រទេសទើបយើងអាចជំរុញឱ្យប្រជាពលរដ្ឋយើងទិញរថយន្តប្រើប្រាស់ភ្លើងនេះ»។
លោកបន្ថែមថា៖ «ដើម្បីសម្រេចគោលដៅនេះទាមទារឱ្យមានការចូលរួមពីក្រសួង-សា្ថប័ន និងភាគីពាក់ព័ន្ធទាំងអស់ ដើម្បីរៀបចំ និងអនុវត្តគោលនយោបាយ ផែនការយុទ្ធសាស្ត្រ និងវិធានការនានាប្រកបដោយប្រសិទ្ធភាព និងប្រសិទ្ធផល ជំរុញការគាំទ្រ និងការលើកទឹកចិត្តដល់ការអភិវឌ្ឍ និងការប្រើប្រាស់យានយន្តអគ្គិសនី ដោយផ្តោតលើយុទ្ធសាស្ត្រទាក់ទាញឱ្យមានកំណើននៃការប្រើប្រាស់យានយន្តអគ្គិសនី កំណើននៃការបង្កើតស្ថានីយបញ្ចូលថាមពលយានយន្ត អគ្គិសនី និងការគ្រប់គ្រង ការកែច្នៃ និងការបោះបង់សំណល់អាគុយប្រកបដោយសុវត្ថិភាព»។
លោក ឈួន វ៉ន់ អគ្គនាយកនៃអគ្គនាយកដ្ឋានដឹកជញ្ជូនផ្លូវគោក ក្រសួងសាធារណការ និងដឹកជញ្ជូន បានឱ្យដឹងថា ចំនួនយានយន្តអគ្គិសនីដែលបានចុះបញ្ជីមានចំនួនតែ ២ គ្រឿងប៉ុណ្ណោះ នៅក្នុងឆ្នាំ ២០២០ និងចំនួន ៦២ គ្រឿងនៅឆ្នាំ ២០២១ ហើយនៅក្នុងរយៈពេលតែ ៣ ខែប៉ុណ្ណោះ ពោលគឺចាប់ពីខែមករា-ខែមីនា ឆ្នាំ ២០២២ នេះការចុះបញ្ជីយានយន្តអគ្គិសនីមានរហូតដល់ ៤៧ គ្រឿង បើធៀបនឹងឆ្នាំ ២០២១ ក្នុងរយៈពេលដូចគ្នា (ចំនួន ៧ គ្រឿងប៉ុណ្ណោះ) មានការកើនឡើង ៦៧១ ភាគរយ ដែលនេះគឺជាកំណើននៃការប្រើប្រាស់យានយន្តអគ្គិសនីមួយគួរឱ្យកត់សម្គាល់។
បើយោងតាមលោក ស៊ុន ចាន់ថុល បច្ចុប្បន្ន UNDP បានសម្រេចផ្តល់ឱ្យកម្ពុជាកន្លែងបញ្ចូលអគ្គិសនី ៤ គ្រឿង គឺ ១ ដាក់នៅក្រសួង ១ ដាក់នៅខេត្តបាត់ដំបង សៀមរាប និងព្រះសីហនុ។ លើសពីនេះទៅទៀតក្រសួងក៏បានជួបអ្នកវិនិយោគមួយដែលត្រៀមនឹងវិនិយោគលើស្ថានីយបញ្ចូលអគ្គិសនី ១០ កន្លែងនៅទូទាំងប្រទេស ជាមួយគ្នានេះដែរ ក្រុមហ៊ុន Tela ក៏កំពុងពិចារណាដើម្បីពិភាក្សារកយុទ្ធសាស្ត្រ និងនីតិវិធីដើម្បីដំឡើងស្ថានីយបញ្ចូលអគ្គិសនីផងដែរ ស្របពេលក្រុមហ៊ុន PTT បានឯកភាពនឹងដំឡើងស្ថានីយនេះ ២ គ្រឿងនៅផ្លូវល្បឿនលឿនពីភ្នំពេញ-ក្រុងព្រះសីហនុនៅមុនដាច់ឆ្នាំនេះ។ ដោយឡែកនៅថ្ងៃទី ២៦ ខែមេសា ក្រុមហ៊ុន Caltex នឹងបើកស្ថានីយរបស់ខ្លួន ដោយក្នុងនោះក៏មានស្ថានីយបញ្ចូលអគ្គិសនីផងដែរ។
រាជរដ្ឋាភិបាលកម្ពុជាមានផែនការរៀបចំ និងអនុវត្តគោលនយោបាយ ផែនការយុទ្ធសាស្ត្រ និងវិធានការចាំបាច់នានា ដើម្បីឈានទៅសម្រេចបាននូវការប្រើប្រាស់រថយន្តអគ្គិសនីក្នុងអត្រា ៤០ ភាគរយ និងទោចក្រយានយន្ត (ម៉ូតូ) អគ្គិសនីក្នុងអត្រា ៧០ ភាគរយ នៅឆ្នាំ ២០៥០ ស្របតាមការកំណត់ទិសដៅជាក់លាក់ដែលមានចែងនៅក្នុងរបាយការណ៍បច្ចុប្បន្នភាពនៃការរួមចំណែករបស់ជាតិ និងយុទ្ធសាស្ត្រអភិវឌ្ឍន៍រយៈពេលវែងសំដៅ សម្រេចបានអត្រាកាបូនសូន្យនៅឆ្នាំ ២០៥០ នៅកម្ពុជា និងនិន្នាការនៃការប្រើប្រាស់យានយន្តអគ្គិសនីរបស់ពិភពលោក តំបន់ ក៏ដូចជាប្រទេសកម្ពុជាផងដែរ៕ LA
វីដេអូ៖