ភ្នំពេញៈ ដំណើរការ​សាងសង់​អាកាសយានដ្ឋាន​អន្តរជាតិ​ថ្មី​សៀមរាប-​អង្គរ គិត​ត្រឹម​ដំណាច់​ខែកុម្ភៈ ឆ្នាំ​ ២០២២ ​នេះ ទើបតែ​សម្រេចបាន​ប្រមាណ​ជាង ២២ ​ភាគរយ​ប៉ុណ្ណោះ ខណៈ​ការ​យឺតយ៉ាវ​នេះ​ត្រូវបាន​លើកឡើងថា​បណ្តាល​មកពី​វិបត្តិ​ការរីក​រាលដាល​ជំងឺ​កូវីដ​ ១៩​។ ទោះយ៉ាងណា​ក្រុមហ៊ុន​អភិវឌ្ឍន៍​បាន​សន្យាថា​នឹង​ជំរុញ​ល្បឿន​នៃ​ការ​សាងសង់​ឱ្យ​ចប់​តាម​ផែនការ​ដែល​បាន​គ្រោងទុក​។ នេះ​បើ​យោងតាម​អ្នកនាំពាក្យ​នៃ​រដ្ឋលេខាធិការដ្ឋាន​អាកាសចរ​ស៊ីវិល​។

លោក ស៊ិន ចាន់សេរីវុត្ថា អ្នកនាំពាក្យ​នៃ​រដ្ឋលេខាធិការដ្ឋាន​អាកាសចរ​ស៊ីវិល បាន​ប្រាប់​ភ្នំពេញ​ប៉ុស្តិ៍​នៅ​ថ្ងៃទី​ ២៨ ខែមីនា​ថា គម្រោង​សាងសង់​អាកាសយានដ្ឋាន​អន្តរជាតិ​សៀមរាប​មាន​ភាពយឺតយ៉ាវ​បន្តិចបន្តួច ដោយសារ​ទទួលរង​ផលប៉ះពាល់​ពី​វិបត្តិ​នៃ​ការឆ្លង​រាលដាល​ជំងឺ​កូវីដ ១៩​។ ទោះ​យ៉ាងណា នៅពេលនេះ​សកម្មភាព​នៃ​ការសាងសង់​កំពុង​ប្រព្រឹត្ត​ទៅដោយ​រលូន ដោយ​ក្រុមហ៊ុន​បាន​បន្ថែម​ធនធាន និង​ពេលវេលា​ក្នុង​ការសាងសង់​ ដើម្បី​ឱ្យ​ចប់​ទៅតាម​កម្មវិធី និង​ផែនការ​ក្នុង​ការបើក​ឱ្យ​ដំណើរការ​នៅ​ឆ្នាំ​ ២០២៣​។

លោក​បាន​ថ្លែងថា​៖ «​ពីមុន​ការគណនា​ភាគរយ​នៃ​វឌ្ឍនភាព​វា​ខុសៗ​គ្នា​។ ឥឡូវ​ក្រុមហ៊ុន​បាន​ពិនិត្យឡើងវិញ​ហើយ​។ បើ​គិត​ត្រឹម​ថ្ងៃទី​ ២៨ ខែកុម្ភៈ គឺ​ការសាងសង់​សម្រេចបាន​ជាង ២២ ​ភាគរយ ខណៈ​កាលពីមុន​យើង​គិតថា​បាន​ ៤០ ​ភាគរយ​»​។ លោក​បញ្ជាក់ថា​៖ «​យើង​ត្រូវតែ​ទទួល​ស្គាល់​ពី​ភាពយឺតយ៉ាវ​នេះ ដែល​វា​បណ្តាលមកពី​ផលប៉ះពាល់​ទៅលើ​ចង្វាក់​ផ្គត់ផ្គង់ និង​ចង្វាក់​ភ័ស្តុភារកម្ម គឺ​ទី​ ១ សម្ភារ​ភាគច្រើន​ត្រូវបាន​ដឹក​មកពី​ក្រៅប្រទេស និង​ទី ​២ រយៈពេល​នៃ​ការដឹកជញ្ជូន​ពី​មុន​ប្រើពេល ២ ​សប្តាហ៍ ប៉ុន្តែ​នៅក្នុង​អំឡុងពេល​កូវីដ​ ១៩ ប្រើ​ពេល​ពី​ ៣ ទៅ​ ៤ ​ខែ​។

បើតាម​លោក ចាន់សេរីវុត្ថា អាកាសយានដ្ឋាន​ថ្មី​នេះ​គឺជា​គម្រោង​កម្រិត​យុទ្ធសាស្ត្រ​រវាង​ប្រទេស​ចិន និង​កម្ពុជា ដែល​នឹង​នាំមក​នូវ​ការរីកចម្រើន​ផ្នែក​សេដ្ឋកិច្ច និង​ជំនួស​អាកាសយានដ្ឋាន​ចាស់​ដែល​មិនអាច​ទទួល​យន្តហោះ​ធំៗ និង​មកពី​តំបន់​ឆ្ងាយៗ​។ មួយវិញទៀត វា​នឹង​ធ្វើឱ្យ​តំបន់​នៅ​ជុំវិញ​អាកាសយានដ្ឋាន​នេះ មាន​ការរីកចម្រើន​ផងដែរ​។

លោកនាយក​រដ្ឋមន្ត្រី ហ៊ុន សែន នៅក្នុង​ពិធី​សម្ពោធ​ដាក់ឱ្យ​ប្រើប្រាស់​អគារ​មជ្ឈមណ្ឌល​ត្រចៀក ច្រមុះ បំពង់ក នៃ​មនី្ទរពេទ្យ​ព្រះអង្គឌួង ក្នុង​ថ្ងៃទី​ ២៨ ខែមីនា បាន​ថ្លែងថា លោក​នឹង​ទៅ​ពិនិត្យមើល​ការដ្ឋាន​សាងសង់​គម្រោង​អាកាសយានដ្ឋាន​-​អន្តរជាតិ​សៀមរាប-​អង្គរ នេះ នៅ​ថ្ងៃទី​ ៣ ខែមេសា ខាងមុខ ដើម្បី​គាំទ្រ និង​ជំរុញ​ដំណើរការ​គម្រោង​នេះ​ឱ្យបាន​ចប់​ទៅតាម​ផែនការ​។

លោក LU WEI ប្រធាន​ក្រុមប្រឹក្សាភិបាល​ក្រុមហ៊ុន​អាកាសយានដ្ឋាន​សៀមរាប​-​អង្គរ កាលពី​ថ្ងៃ​ទី​ ២៥ ខែមករា ឆ្នាំ​ ២០២២ បានឱ្យដឹងថា ឆ្នាំ​ ២០២២ គឺជា​ឆ្នាំ​សាងសង់​ដ៏មមាញឹក និង​ជា​ឆ្នាំ​ចាប់ផ្តើម​ការត្រៀម​ដាក់ឱ្យ​ដំណើរការ​ប្រតិបត្តិ​របស់​គម្រោង ហើយ​ក្រុមហ៊ុន​នឹង​ជម្នះ​រាល់​ឧបសគ្គ​ដើម្បី​ធ្វើឱ្យ​គោលដៅ​សាងសង់​ព្រលាន​យន្ដហោះ​អន្តរជាតិ​សៀមរាប​-​អង្គរ អាចដាក់​ឱ្យ​ដំណើរការបាន​ក្នុង​ឆ្នាំ​ ២០២៣ ខាងមុខ​។

អាកាសយានដ្ឋាន​អន្តរជាតិ​ថ្មី​នេះ ស្ថិត​នៅក្នុង​លំដាប់ 4E ដោយមាន​ផ្លូវ​រត់​ប្រវែង ៣ ៦០០ ​ម៉ែត្រ ទទឹង ៤៥​ ម៉ែត្រ មាន ៣៨ ចំណត​យន្តហោះ និង​មាន​ក្រឡា​ផ្ទៃ​ស្ថានីយ​អ្នកដំណើរ​ជាង ៨ ​ម៉ឺន​ម៉ែត្រការ៉េ​ដែល​អាច​ទទួល​អ្នកដំណើរ​ប្រចាំឆ្នាំ​បាន​ប្រមាណ ៧ ​លាន​នាក់ និង​ស្ថិតក្រោម​កិច្ចព្រមព្រៀង​គម្រោង​វិនិយោគ BOT ៥៥ ​ឆ្នាំ​។

អាកាសយានដ្ឋាន​អន្តរជាតិ​ថ្មី​នេះ​ទទួល​បាន​សិទ្ធិ​វិនិយោគ​ដោយ​ក្រុមហ៊ុន​អាកាសយានដ្ឋាន​អន្តរជាតិ​សៀមរាប​ (AIAI) ដែល​ជា​បុត្រសម្ព័ន្ធ​របស់​ក្រុមហ៊ុន Yunnan Investment Holdings របស់​ចិន​ក្នុង​ចំនួន​ទឹកប្រាក់ ៨៨០​ លាន​ដុល្លារ និង​ត្រូវបាន​សាងសង់​លើ​ផ្ទៃដី ៧៥០ ​ហិកតា នៅក្នុង​ឃុំ​ពពេល ស្រុក​សូទ្រនិគម ជាយក្រុង​សៀមរាប កាលពី​ថ្ងៃទី​ ១៥ ខែមីនា ឆ្នាំ​ ២០២០៕ LA

វីដេអូ៖