.jpg)
លោក គិត ម៉េង ប្រធានសភាពាណិជ្ជកម្មកម្ពុជា ថ្លែងក្នុងវេទិកាសេដ្ឋកិច្ចកម្រិតខ្ពស់នៅរាជធានីភ្នំពេញ កាលពីថ្ងៃទី ២៨ មីនា។ រូបថត សហការី
ភ្នំពេញៈ លោក គិត ម៉េង ប្រធានសភាពាណិជ្ជកម្មកម្ពុជាបានជំរុញឱ្យសមាជិករបស់អង្គការអន្តរជាតិហ្វ្រង់កូហ្វូនី (OIF) ដែលជាស្ថាប័នធំជាងគេមួយមានសមាជិក ៨៨ ប្រទេស ចូលមកស្វែងរកឱកាសវិនិយោគលើវិស័យកសិឧស្សាហកម្ម ថាមពលប្រកបដោយនិរន្តរភាព និងបច្ចេកវិទ្យាក្នុងប្រទេសកម្ពុជា។
ការអំពាវនាវនេះធ្វើឡើងក្នុងវេទិកាសេដ្ឋកិច្ចកម្រិតខ្ពស់នៅរាជធានីភ្នំពេញ កាលពីថ្ងៃទី ២៨ ខែមីនា ឆ្នាំ ២០២២ ដែលជាការរៀបចំរួមគ្នាដោយក្រសួងការបរទេស និងសហប្រតិបត្តិការអន្តរជាតិ និងអង្គការអន្តរជាតិ ហ្វ្រង់កូហ្វូនី (OIF)។
លោក គិត ម៉េង បានឱ្យដឹងថា កម្ពុជា គឺជាប្រទេសមួយក្នុងចំណោមប្រទេសដែលមានកំណើនសេដ្ឋកិច្ចរហ័សបំផុតនៅក្នុងតំបន់ក្នុងរយៈពេលជាច្រើនទសវត្សរ៍ចុងក្រោយនេះជាមួយនឹងអត្រាកំណើនជាមធ្យម ៧ ភាគរយក្នុង ១ ឆ្នាំ។ កម្ពុជាទទួលបានឋានៈជាប្រទេសមានប្រាក់ចំណូលមធ្យមកម្រិតទាប និងកំពុងស្ថិតនៅលើដំណើរផ្លូវដ៏ត្រឹមត្រូវដើម្បីក្លាយជាប្រទេសមានប្រាក់ចំណូលខ្ពស់នៅត្រឹមឆ្នាំ ២០៥០។
លោកលើកឡើងថា ទោះបីរងផលប៉ះពាល់ពីវិបត្តិជំងឺកូវីដ-១៩ ក៏កម្ពុជានៅតែជាប្រទេសមួយដែលមានសេដ្ឋកិច្ចងើបឡើងវិញរហ័សបំផុតក្នុងតំបន់ ដោយសារតែវិធានការត្រឹមត្រូវ និងទាន់ពេលវេលាដែលរដ្ឋាភិបាលបានធ្វើដើម្បីធ្វើឱ្យអាជីវកម្ម និងសកម្មភាពសេដ្ឋកិច្ចរស់ឡើងវិញ។ បន្ថែមលើនេះកម្ពុជាបានស្ថិតក្នុងចំណោមប្រទេសដែលមានអត្រាចាក់វ៉ាក់សាំងខ្ពស់បំផុតចំនួន ៩២ ភាគរយនៃប្រជាជនសរុប ១៦ លាននាក់។ កម្ពុជាក៏ជាគោលដៅសុវត្ថិភាពសម្រាប់ដំណើរកម្សាន្ត និងការវិនិយោគ។
លោកនិយាយថា៖ «សម្រាប់ប្រទេសកម្ពុជា គឺមិនមានការបញ្ឈប់ការផលិតនោះទេ។ ការរីករាលដាលកូវីដ ១៩ ត្រូវបានគ្រប់គ្រង។ នៅពេលនេះកម្ពុជា បានបើកទទួលវិនិយោគិន និងពាណិជ្ជករទាំងអស់ឡើងវិញ។ មិនមានតម្រូវការសម្រាប់ការធ្វើតេស្ត PCR មុនពេលមកដល់ប្រទេសកម្ពុជា ឬការធ្វើតេស្តរហ័សពេលមកដល់ ដើម្បីចូលប្រទេសកម្ពុជាទេ។ អ្វីដែលត្រូវការគឺកាតចាក់វ៉ាក់សាំង។ សេវាកម្មទិដ្ឋាការនៅពេលមកដល់ក៏ត្រូវបានបើកដំណើរការឡើងវិញផងដែរ»។
លោក ប្រាក់ សុខុន រដ្ឋមន្ត្រីក្រសួងការបរទេសដែលបានអញ្ជើញជាអធិបតីក្នុងព្រឹត្តិការណ៍នេះ បានឱ្យដឹងថា ក្នុងរយៈពេលជាង ២ ឆ្នាំមកនេះ ពិភពលោកបានឆ្លងកាត់ការផ្លាស់ប្តូរយ៉ាងខ្លាំង។
ជាមួយគ្នានេះ លោក សុខុន ក៏សម្តែងការស្វាគមន៍ចំពោះលោកស្រី Louise Mushikiwabo អគ្គលេខាធិការនៃអង្គការ OIF មកកាន់កម្ពុជាសម្រាប់ដំណើរទស្សនកិច្ចផ្លូវការរបស់លោកស្រីក្នុងអំឡុងពេលដែលលោកស្រីធ្វើជាសក្ខីភាពនៅក្នុងវេទិកាបេសកកម្មសេដ្ឋកិច្ច និងពាណិជ្ជកម្ម លើកដំបូងរបស់ ហ្វ្រង់កូហ្វូនី នៅអាស៊ីអាគ្នេយ៍ និងពិធីចុះហត្ថលេខាឯកសារទាក់ទងនឹងកិច្ចសហប្រតិបត្តិការរវាងអង្គការពាណិជ្ជកម្មវិជ្ជាជីវៈ និងសេដ្ឋកិច្ច។
ក្នុងឱកាសនោះ លោក គិត ម៉េង ក៏បានជំរុញឱ្យប្រតិភូធុរកិច្ចទាំងអស់ស្វែងយល់ពីសក្តានុពលពិតប្រាកដនៅក្នុងប្រទេសកម្ពុជា ខណៈកិច្ចពិភាក្សានៃវេទិកាបានផ្តោតទៅលើវិស័យសំខាន់ៗនៅកម្ពុជា និងបណ្ដាប្រទេស OIF មានដូចជាកសិឧស្សាហកម្ម ថាមពលនិរន្តរភាព និងបច្ចេកវិទ្យា។
លោកនិយាយថា៖ «ខ្ញុំលើកទឹកចិត្តឱ្យអ្នកស្វែងរកភាពជាដៃគូក្នុងវិស័យទាំងនេះ ហើយក៏សិក្សាផ្នែកផ្សេងទៀតក្រៅពីវិស័យទាំងនេះផងដែរ»។
លោកបន្ថែមថា៖ «ក្នុងនាមប្រធានសភាពាណិជ្ជកម្មកម្ពុជា និងជាប្រធានក្រុមប្រឹក្សាផ្ដល់យោបល់ធុរកិច្ចអាស៊ាន និងក្រុមការងាររបស់ខ្ញុំមកពីវិស័យឯកជនមានក្តីសោមនស្សក្នុងការផ្តល់ការគាំទ្រដល់ពាណិជ្ជករបណ្ដាប្រទេសហ្វ្រង់កូហ្វូនីដែលស្វែងរកឱកាសអាជីវកម្មដើម្បីរីកចម្រើនជាមួយគ្នា»។
ក្នុងឱកាសនៃវេទិកាសេដ្ឋកិច្ចកម្រិតខ្ពស់នេះសភាពាណិជ្ជកម្មកម្ពុជា ក៏បានចុះអនុស្សរណៈយោគយល់គ្នាចំនួន ៣ រវាងសភាពាណិជ្ជកម្មកម្ពុជាជាមួយនឹងសភាពាណិជ្ជកម្មបេណាំង (Benin) សហព័ន្ធសភាពាណិជ្ជកម្ម និងឧស្សាហកម្មអាហ្វ្រិកខាងលិច និងសភាពាណិជ្ជកម្ម និងឧស្សាហកម្មកូតឌីវ័រ (Cote d''Ivoire)៕ LA
