ទីក្រុងញូវយ៉កៈ តម្លៃប្រេងពិភពលោកបានធ្លាក់ចុះកាលពីថ្ងៃចន្ទ ដោយសារក្តីបារម្ភអំពីតម្រូវការថាមពលថយចុះរបស់ប្រទេសចិន ចំពេលមានការកើនឡើងចុងក្រោយនៃការរីករាលដាលជំងឺកូវីដ ១៩ ខណៈភាគហ៊ុន Wall Street បានកើនឡើង ព្រោះតែក្តីសង្ឃឹមលើកិច្ចចរចាសន្តិភាពអ៊ុយក្រែន។
ប្រេងឆៅម៉ាក West Texas Intermediate របស់អាមេរិក និងប្រេងឆៅ London Brent របស់អឺរ៉ុបទាំង ២ បានធ្លាក់ចុះតម្លៃជាង ៦ ភាគរយ។
មនុស្សរាប់លាននាក់នៅក្នុងមជ្ឈមណ្ឌលហិរញ្ញវត្ថុរបស់ប្រទេសចិនត្រូវបានបង្ខាំងនៅក្នុងផ្ទះរបស់ពួកគេ ខណៈដែលពាក់កណ្តាលភាគខាងកើតនៃទីក្រុងសៀងហៃត្រូវបានដាក់ជាតំបន់បិទខ្ទប់ ដើម្បីទប់ស្កាត់ការរីករាលដាលនៃជំងឺកូវីដ ១៩ ដ៏ធំបំផុតរបស់ប្រទេស។
អាជ្ញាធរកំពុងដាក់ការឱ្យអនុវត្តវិធានការបិទខ្ទប់ ២ ដំណាក់កាលនៃទីក្រុងដែលមានប្រជាជនប្រហែល ២៥ លាននាក់ដើម្បីអនុវត្តការធ្វើតេស្តដ៏ធំមួយ។
លោក Robbie Fraser អ្នកវិភាគនៅក្រុមហ៊ុន Schneider Electric បានហៅការប៉ះពាល់ដល់តម្រូវការរបស់ចិនថាជាហានិភ័យ «ដ៏សំខាន់» សម្រាប់ទីផ្សារប្រេង ដែលកំពុងតែប្រឈមនឹងតម្លៃប្រេងឆៅខ្ពស់។
ការធ្លាក់ចុះវិញនៃតម្លៃប្រេងបានគាំទ្រយ៉ាងទូលំទូលាយដល់ទីផ្សារភាគហ៊ុនពិភពលោកដែលបានឃើញរលកនៃការលក់នៅឆ្នាំនេះដោយសារក្តីបារម្ភអំពីអតិផរណា។
ផ្សារហ៊ុន Wall Street រីករាយនឹងផ្នែកជួញដូរដ៏រឹងមាំមួយផ្សេងទៀត ដោយសន្ទស្សន៍ភាគហ៊ុន Nasdaq ដែលសម្បូរទៅដោយក្រុមហ៊ុនបច្ចេកវិទ្យាបានបន្ថែម ១,៣ ភាគរយ។
ប្រធានាធិបតីអ៊ុយក្រែនលោក Volodymyr Zelensky បាននិយាយថា អ្នកចរចារបស់ទីក្រុងកៀវ (Kyiv) កំពុងសិក្សាការទាមទាររបស់រុស្ស៊ីសម្រាប់អព្យាក្រឹតភាពអ៊ុយក្រែន។ ការអត្ថាធិប្បាយនេះបានកើតឡើងមុនកិច្ចពិភាក្សាទល់មុខគ្នាថ្មីរវាងប្រតិភូនៃប្រទេសទាំង ២ ដែលគ្រោងនឹងចាប់ផ្តើមនៅថ្ងៃអង្គារក្នុងប្រទេសតួកគី។
ធនាគារវិនិយោគ Charles Schwab បាននិយាយនៅក្នុងសេចក្តីថ្លែងការណ៍មួយថា៖ «ទីផ្សារបានឈានទៅរកភាពរឹងមាំមួយចំនួននៅក្នុងជំហានទៅមុខ ខណៈដែលអ្នកវិនិយោគបន្តជួបប្រទះនឹងផលប៉ះពាល់ឥតដែនកំណត់នៃសង្គ្រាមនៅអ៊ុយក្រែន និងភាពមិនច្បាស់លាស់ទាក់ទងនឹងថាតើ ធនាគារកណ្តាលអាមេរិកនឹងមានសេចក្តីក្លាហានយ៉ាងណាក្នុងការព្យាយាមកាត់បន្ថយសម្ពាធអតិផរណាដែលកំពុងកើតមានបន្ត»។
ទន្ទឹមនឹងនេះ នៅក្នុងទីផ្សារប្តូរប្រាក់បរទេស ប្រាក់យ៉េនជប៉ុនបានធ្លាក់ចុះដល់កម្រិតទាបបំផុតចាប់តាំងពីឆ្នាំ ២០១៥ នៅពេលដែលធនាគារកណ្តាលជប៉ុនបានប្រកាសពីផែនការសម្រាប់ការទិញជាថ្មីនៃសញ្ញាបណ្ណរដ្ឋាភិបាលរយៈពេល ១០ ឆ្នាំ។
លោក Joe Manimbo អ្នកវិភាគនៅក្រុមហ៊ុន Western Union Business Solutions បាននិយាយថា៖ «ការសម្រេចរបស់ប្រទេសជប៉ុនក្នុងការទប់ការឡើងការប្រាក់ដើម្បីគាំទ្រសេដ្ឋកិច្ចជប៉ុនដែលឈរលំដាប់លេខ ៣ ក្នុងពិភពលោក ដែលផ្ទុយស្រឡះពីធនាគារកណ្តាលអាមេរិក ដែលបានណែនាំអំពីការកើនឡើងអត្រាកាន់តែធំ ដើម្បីគ្រប់គ្រងអតិផរណា»៕ RR