The Phnom Penh Post Search

Search form




Logo of Phnom Penh Post newspaper Phnom Penh Post - ក្រសួង​ទេសចរណ៍​បន្ត​កិច្ចសហការ​ជាមួយ​សាលា​ប៉ូលឌុយប្រ៊ូល

ក្រសួង​ទេសចរណ៍​បន្ត​កិច្ចសហការ​ជាមួយ​សាលា​ប៉ូលឌុយប្រ៊ូល

Content image - Phnom Penh Post
លោក ថោង ខុន និង​លោកស្រី Eleonore Mueth-Dubrule​។ រូបថត សហការី

ក្រសួង​ទេសចរណ៍​បន្ត​កិច្ចសហការ​ជាមួយ​សាលា​ប៉ូលឌុយប្រ៊ូល

ភ្នំពេញៈ ក្រសួង​ទេសចរណ៍​បាន​បន្ត​កិច្ចសហការ​ជាមួយនឹង​សាលា​បណ្តុះបណ្តាល​ផ្នែក​សណ្ឋាគារ និង​ទេសចរណ៍​ប៉ូលឌុយប្រ៊ូល (The Ecole d'Ho-tellerie et de Tourisme Paul Dubrule) និង​អង្គការ​បណ្តុះបណ្តាល និង​វឌ្ឍនភាព​កម្ពុជា ដើម្បី​បង្កើន​ការបណ្ដុះ​បណ្ដាល​ជំនាញ​វិជ្ជាជីវៈ​ទេសចរណ៍​ដល់​យុវជន​នៅក្នុង​ខេត្តសៀមរាប​។

រដ្ឋមន្ត្រី​ក្រសួង​ទេសចរណ៍​លោក ថោង ខុន បាន​ថ្លែងថា ក្រសួង​នឹង​បន្ត​កិច្ចសហប្រតិបត្តិការ​ស្ថាប័ន​ទាំង​ ២​ នេះ​ក្នុងការ​បណ្ដុះបណ្ដាល​ជំនាញ​វិជ្ជាជីវៈ​ទេសចរណ៍ ដើម្បី​ធ្វើ​យ៉ាងណា​ត្រៀម​ទទួលភ្ញៀវ​ទេសចរ​អន្តរជាតិ​នៅ​ខេត្តសៀមរាប​ឡើងវិញ​ឱ្យបាន​ល្អប្រសើរ​ប្រកប​ដោយ​គុណភាព​។

លោក​លើកឡើងថា​៖ «​សូមឱ្យ​សាលា​បណ្ដុះបណ្ដាល​បន្ថែម​ទៅដល់​យុវជន​ដើម្បី​ឆ្លើយតប​នឹង​តម្រូវការ​កម្លាំង​ពលកម្ម​នៅ​ខេត្តសៀមរាប និង​ឱ្យ​ស្របតាម​ផែនការមេ​អភិវឌ្ឍន៍​ទេសចរណ៍​ខេត្តសៀមរាប ដោយ​តាមរយៈ​ផែនការ​មេនេះ កម្ពុជា​មាន​ចក្ខុវិស័យ​ថា​នៅ​ឆ្នាំ​ ២០៣០ ខេត្តសៀមរាប​នឹង​ផ្ដល់ឱកាស​ការងារ​ដល់​យុវជន​ឱ្យបាន​ ៩០​ ម៉ឺន​នាក់​។ ដូច្នេះ​ដើម្បី​អាច​សម្រេច​តាម​ផែនការ​នេះ​គឺ​ត្រូវ​មានការ​បណ្ដុះបណ្ដាល​យ៉ាង​យកចិត្ត​ទុកដាក់ ដើម្បីឱ្យ​អ្នក​បញ្ចប់​ការបណ្ដុះបណ្ដាល​ហើយ​ចេញទៅ​ធ្វើការ​មានគុណ​ភាព មាន​ជំនាញ​ត្រឹមត្រូវ​»​។

លោកស្រី Eleonore Mueth-Dubrule អនុប្រធាន​ក្រុមប្រឹក្សាភិបាល​សាលា​បណ្តុះបណ្តាល​ផ្នែក​សណ្ឋាគារ និង​ទេសចរណ៍​ប៉ូលឌុយប្រ៊ូល បាន​លើកឡើងថា នេះ​ស្រប​ពេលដែល​កម្ពុជា​បើកទទួល​ទេសចរ​ក៏ដូចជា​បើក សកម្មភាព​សេដ្ឋកិច្ច​សង្គម​ឡើងវិញ​នៅ​ទូទាំងប្រទេស​នោះ​។

លោកស្រី​បានលើកឡើង​ថា​៖ «​សាលា​ប៉ូលឌុយប្រ៊ូល និង​អង្គការ​បណ្តុះបណ្តាល និង​វឌ្ឍនភាព​កម្ពុជា​ស្នើសុំ​ក្រសួង​ទេសចរណ៍​បន្ត​កិច្ចសហប្រតិបត្តិការ​បន្ត​ទៅមុខទៀត​លើ​ការបណ្ដុះបណ្ដាល​ជំនាញ​វិជ្ជាជីវៈ​ទេសចរណ៍ ទាំង​ក្នុង​ក្របខ័ណ្ឌ​អាស៊ាន និង​ក្របខ័ណ្ឌ​ជាតិ​»​។

លោកស្រី ឆាយ ស៊ីវលីន ប្រធាន​សមាគម​ទីភ្នាក់ងារ​ទេសចរណ៍​កម្ពុជា​បាន​ប្រាប់​ភ្នំពេញ​-​ប៉ុស្តិ៍​ថា ខេត្តសៀមរាប គឺជា​គោលដៅ​ទេសចរណ៍​ដ៏សំខាន់​របស់​កម្ពុជា​ក្នុងការ​ទាក់ទាញ​ទេសចរ​ពី​ក្រៅប្រទេស ដោយសារ​មាន​អង្គរវត្ត​ជា​គោល​។ ដូច្នេះ ការបណ្តុះបណ្តាល​ជំនាញ​វិជ្ជាជីវៈ​ទេសចរណ៍​នេះ​មាន​សារៈសំខាន់​ខ្លាំងណាស់​។

លោកស្រី​បន្ថែមថា ចាប់តាំងពី​មាន​ការរីក​រាលដាល​ជំងឺ​កូវីដ-១៩ មក អ្នក​ដែលមាន​ជំនាញ​វិជ្ជាជីវៈ​ខាង​ផ្នែក​ទេសចរណ៍​ភាគច្រើន​ស្ទើរ​ភ្លេច និង​បាន​បោះបង់​ជំនាញ​របស់ខ្លួន​ជាង ២ ឆ្នាំ​មកហើយ ដែល​បញ្ហា​នេះ​អាចជា​ក្តីបារម្ភ​មួយ​សម្រាប់​វិស័យ​ឯកជន​ផ្នែក​ទេសចរណ៍ នៅពេល​មាន​ភ្ញៀវ​អន្តរជាតិ​មក​កម្សាន្ត​ឡើងវិញ​។

លោកស្រី​ថ្លែងថា​៖ «​សម្រាប់​ជំនាញ​វិជ្ជាជីវៈ​ទេសចរណ៍​នេះ ខាង​ខេត្តសៀមរាប​ធ្វើ​បានល្អ​ជាងគេ​មាន​កម្រិត​ខ្ពស់​ជាងគេ ដោយ​កន្លងទៅ​នៅតាម​បណ្តា​ខេត្ត​ទេសចរណ៍​ផ្សេងៗ​តែងតែ​មក​ជ្រើសរើស​បុគ្គលិក​ទេសចរណ៍​ចេញពី​សៀមរាប​ជានិច្ច​។ យើង​ចង់ឱ្យ​ខេត្ត​ជា​គោលដៅ​ទេសចរណ៍​ផ្សេងៗ​ទៀត ដូចជា ខេត្ត​ព្រះសីហនុ មណ្ឌលគិរី កែប និង​កំពត​ជាដើម ទទួល​បានការ​បណ្តុះបណ្តាល​បែបនេះ​ដែរ ដើម្បី​បំពេញ​សេចក្តីត្រូវការ នៅពេល​ដែល​ទេសចរ​អន្តរជាតិ​មាន​កំណើន​ឡើងវិញ​»​។

បើតាម​ក្រសួង​ទេសចរណ៍​ប្រតិភូ​អង្គការ និង​ដៃគូ​ខាងលើ​បានលើកឡើង​កម្មវិធី​ចំនួន ២ ដែល​លើសពី​ការបណ្ដុះបណ្ដាល​ជំនាញ​វិជ្ជាជីវៈ​ទេសចរណ៍ គឺ​ទី ​១ កម្មវិធី​សិល្បៈ​សូន​រូប ដែល​លោក​រដ្ឋមន្ត្រី​បាន​លើកឡើងថា កម្មវិធី​នេះ​គឺជា​ការបង្កើន​នូវ​ភាពទាក់ទាញ និង​បង្កើន​ការចងចាំ​ពី​ទេសចរណ៍​នៅ​កម្ពុជា និង​កម្មវិធី​ទី​ ២ គឺ​កម្មវិធី​សន្ទានិស្សិតដ្ឋាន​ជា​កម្មវិធី​មួយ​ដែល​សាលា​ប៉ូលឌុយប្រ៊ូល​ទទួលបាន​កិច្ចសហការ​ពី​សាកលវិទ្យាល័យ​ល្បីៗ​នៅ​តំបន់​អឺរ៉ុប ដោយ​ផ្ដោតទៅលើ​ការបណ្ដុះ​បណ្ដាល​ជំនាញ​វិជ្ជាជីវៈ ការងារ​បរិស្ថាន អេកូទេសចរណ៍ និង​ការងារ​សិល្បៈ ហើយ​ប៉ូលឌុយប្រ៊ូល​នឹង​ក្លាយទៅជា​សាលា​ទី​ ១ នៅ​កម្ពុជា​ដែល​ចូលរួម​អនុវត្ត​តាម​ស្ដង់ដា​ទាំងនោះ​។

សាលា​សណ្ឋាគារ និង​ទេសចរណ៍ ប៉ូលឌុយប្រ៊ូល ត្រូវបាន​បង្កើតឡើង​នៅ​ឆ្នាំ​ ២០០២ ជា​សាលា​ដៃគូ​មួយ​ដ៏​ចម្បង​របស់​ក្រសួង​ទេសចរណ៍ ដែល​ទទួល​អនុវត្ត​នូវ​ស្ដង់ដា​កម្មវិធី​របស់​អាស៊ាន​ដែល​បច្ចុប្បន្ន​មាន ៣២ ​ជំនាញ ដើម្បី​ធ្វើយ៉ាងណា​ឱ្យ​អ្នកទទួលការ​បណ្ដុះបណ្ដាល​ពី​សាលា​អាច​ចល័ត​ការងារ​នៅក្នុង​តំបន់​អាស៊ាន​ទៅតាម​ច្បាប់​នៃ​ប្រទេស​ទទួល ខណៈ​សាលា​នេះ​គឺជា​ដៃគូ​ដ៏​សំខាន់​មួយ​របស់​អាស៊ាន​៕ LA

អត្ថបទគួរចាប់អារម្មណ៍