ភូមិរីប្បែក (Ribbeck): ខណៈដែលប្រទេសអាល្លឺម៉ង់ ប្រញាប់ប្រញាល់ក្នុងការកាត់បន្ថយការពឹងផ្អែកលើថាមពលរបស់ប្រទេសរុស្ស៊ី ឧស្ម័នដែលផលិតចេញពីលាមកសត្វ និងកាកសំណល់សរីរាង្គផ្សេងទៀតនៅក្នុងកសិដ្ឋានរបស់លោក Peter Kaim អាចជាផ្នែកមួយនៃដំណោះស្រាយ។
ធ្វើដំណើរតាមរថយន្តរយៈពេល ១ ម៉ោងនៅភាគខាងលិចទីក្រុងប៊ែរឡាំង ក្លិនឆួលដ៏ខ្លាំងមួយបានភាយចេញពីបំពង់ដ៏ធំចំនួន ៣ នៅកណ្តាលវាលភក់នៅលើកសិដ្ឋានរបស់លោក Kaim ដែលចិញ្ចឹមសត្វគោទឹកដោះ ១០០ ក្បាល។
ជារៀងរាល់ថ្ងៃ កាកសំណល់សរីរាង្គរាប់តោន ដែលភាគច្រើនជាលាមកសត្វ ពោត និងស្មៅ ត្រូវបានចាក់ចូលទៅក្នុងកន្លែងស្ដុកទាំងនេះ។
នៅក្នុងដំណើរការមួយដែលហៅថា «ធ្វើឱ្យទៅជាមេតាន» ដែលដំណើរការដោយបាក់តេរី សារធាតុសរីរាង្គត្រូវបានបំប្លែងទៅជាឧស្ម័ន។
រោងចក្រថាមពលខ្នាតតូចនេះផ្គត់ផ្គង់កម្តៅដល់ផ្ទះប្រហែល ២០ ខ្នងនៅក្នុងភូមិ Ribbeck ដែលត្រូវបានគេស្គាល់ថាជាដើមព័រ ដែលសរសើរដល់លោក Theodor Fontane ជាអ្នកនិពន្ធដ៏គួរឱ្យស្រឡាញ់នៅសតវត្សរ៍ទី ១៩ ធ្លាប់បានច្រៀងនៅក្នុងកំណាព្យបុរាណមួយ។
លោក Kaim បាននិយាយថា អ្វីៗទាំងអស់ «បានមក ១០០ ភាគរយពីកសិដ្ឋានរបស់យើង»។
កសិកររូបនោះមានមោទនភាពចំពោះខ្លួនឯង លើការផលិតថាមពល «ឯករាជ្យ» ក្នុងបរិបទនៃសង្គ្រាមនៅប្រទេសអ៊ុយក្រែន ហើយអំពាវនាវឱ្យរដ្ឋ «អនុម័តនីតិវិធីអនុញ្ញាតដ៏សាមញ្ញ» ដើម្បីជួយជីវឧស្ម័នក្លាយជាផ្នែកដ៏ធំមួយនៃការបញ្ចូលគ្នានៅអាល្លឺម៉ង់។
ដូចប្រតិបត្តិករនេះ វិស័យជីវឧស្ម័នទាំងមូលមើលឃើញឱកាសរបស់ខ្លួនក្នុងវិបត្តិបច្ចុប្បន្ន ខណៈដែលទីក្រុងប៊ែរឡាំងសម្លឹងមើលការទប់ស្កាត់យ៉ាងរហ័សអំពីការពឹងផ្អែករបស់ខ្លួនលើទីក្រុងម៉ូស្គូសម្រាប់ថាមពល។
មុនពេលសង្គ្រាមប្រទេសអ៊ុយក្រែន អាល្លឺម៉ង់បាននាំចូល ៥៥ ភាគរយនៃឧស្ម័នធម្មជាតិរបស់ខ្លួនពីប្រទេសរុស្ស៊ី ពាក់កណ្តាលធ្យូងថ្ម និងប្រហែល ៣៥ ភាគរយនៃប្រេងរបស់ខ្លួន។
នៅក្នុងសញ្ញាមួយដែលថាសាររបស់ពួកគេកំពុងត្រូវបានផ្សព្វផ្សាយ រដ្ឋាភិបាលអាល្លឺម៉ង់បានប្រកាសក្នុងខែនេះពីគោលបំណងរបស់ខ្លួនក្នុងការ «បង្កើន ការផលិតឧស្ម័នបៃតង» ដែលជាផ្នែកនៃវិធានការ ដើម្បីបង្កើនភាពធន់នឹងការប្រឈមមុខនឹងការកើនឡើងតម្លៃថាមពល។
ចំនួន ២ ភាគ ៣ នៃបំពង់បង្ហូរឧស្ម័ន Nord Stream
នៅពេលនេះ ជីវឧស្ម័នមានចំនួនត្រឹមតែ ១ ភាគរយប៉ុណ្ណោះនៃការប្រើប្រាស់នៅប្រទេសមានសេដ្ឋកិច្ចឈានមុខគេរបស់អឺរ៉ុបមួយនេះ។
លោក Horst Seide ប្រធានសហព័ន្ធ អាល្លឺម៉ង់នៃក្រុមហ៊ុនផលិតជីវឧស្ម័នបានប្រាប់ទីភ្នាក់ងារព័ត៌មាន AFP ថា៖ «យើងអាចបង្កើនផលិតកម្មរបស់យើងភ្លាមៗ ចំនួន ២០ ភាគរយហើយជំនួសឧស្ម័នប្រទេសរុស្ស៊ី ៥ ភាគរយប្រសិនបើរបាំងបទប្បញ្ញត្តិមួយចំនួនត្រូវបានលុបចោលនៅថ្ងៃស្អែក»។
កិច្ចខិតខំប្រឹងប្រែងរួមគ្នាដើម្បីជំរុញវិស័យនេះនឹងអាចមានក្នុងរយៈពេលវែង «ដើម្បីផលិតពីរភាគបីនៃសមត្ថភាពរបស់បំពង់បង្ហូរឧស្ម័ន Nord Stream 2»ដែលជាគម្រោងបំពង់បង្ហូរឧស្ម័នដែលទីក្រុងប៊ែរឡាំងបានផ្អាក បន្ទាប់ពីការលុកលុយរបស់ប្រទេសរុស្ស៊ីកាលពីខែមុនលើប្រទេសអ៊ុយក្រែន។ នេះបើយោងតាមក្រុមឧស្សាហកម្ម។
ប្រវត្តិនៃជីវឧស្ម័ននៅប្រទេសអាល្លឺម៉ង់ មានតាំងពីរាប់ទសវត្សរ៍មកហើយ។ កាលពីដើមទសវត្សរ៍ឆ្នាំ ២០០០ ប្រទេសនេះបានប្រើប្រាស់ឥទ្ធិពលរបស់ខ្លួនដើម្បីគាំទ្រវិស័យនេះ ដោយធ្វើឱ្យប្រទេសនេះក្លាយជាប្រទេសនាំមុខគេមួយនៅដឹកនាំអឺរ៉ុប។
ការផលិតឧស្ម័នមេតានពាក់កណ្តាលនៃទ្វីបមានទីតាំងនៅប្រទេសអាល្លឺម៉ង់។
ប៉ុន្តែកាលពីដើមឆ្នាំ ២០១៤ រដ្ឋាភិបាលអាល្លឺម៉ង់បានផ្លាស់ប្តូរទិសដៅដោយសម្រេចចិត្តទប់ស្កាត់សមត្ថភាពផលិតកម្មរបស់ឧស្សាហកម្មនេះជាមួយនឹងប្រព័ន្ធដ៏ស្មុគស្មាញនៃការឧបត្ថម្ភធនគោលដៅ។
ការជំទាស់ដ៏សំខាន់បណ្ដាលមកពីឧស្សាហូបនីយកម្មដ៏ធំនៃវិស័យនេះ ដែលបង្កបញ្ហាបរិស្ថានយ៉ាងធ្ងន់ធ្ងរ ដែលជាប់ទាក់ទងនឹងការកើនឡើងហានិភ័យនៃការបំពុលទឹក និងការលេចធ្លាយឧស្ម័នបំពុលបរិយាកាស។
ការរំលោភយកដីសម្រាប់ការប្រើប្រាស់ថាមពលធ្វើឱ្យខូចប្រយោជន៍ផលិតកម្មអាហារក៏ជាមូលហេតុនៃការបារម្ភ។
ក្រសួងកសិកម្មឱ្យដឹងថា ១៤ ភាគរយនៃដីស្រែរបស់ប្រទេសអាល្លឺម៉ង់ត្រូវបានប្រើប្រាស់រួចហើយសម្រាប់ការបង្កើតថាមពល។
ដោយសារតែការមិនលើកទឹកចិត្ត ការបើកកន្លែងជីវឧស្ម័នថ្មីបានធ្លាក់ចុះយ៉ាងខ្លាំងពី ១ ៥២៦ កាលពីឆ្នាំ ២០១៣ មកនៅត្រឹម ៩៤ ក្នុងឆ្នាំ ២០១៤ បន្ទាប់ពីការផ្លាស់ប្តូរបទប្បញ្ញត្តិមកត្រឹមតែ ៦០ ប៉ុណ្ណោះនៅឆ្នាំ ២០២១៕ LA