ភ្នំពេញៈ លោកនាយករដ្ឋមន្ត្រី ហ៊ុន សែន បានលើកឡើងថា ថ្ងៃទី ៣០ ខែមីនា គឺជាថ្ងៃដែលវិស័យពន្ធដារកម្ពុជាបំបែកឯតទគ្គកម្ម ដោយប្រមូលចំណូលបាន ២៣៦ លានដុល្លារ ដែលនឹងធ្វើឱ្យចំណូលរបស់អគ្គនាយកដ្ឋានពន្ធដារក្នុងត្រីមាសទី ១ ឆ្នាំ ២០២២ នេះមានជាង ១២០០ លានដុល្លារ កើនលើសរយៈពេលដូចគ្នាឆ្នាំ ២០២១ ជាង ២០០ លានដុល្លារ។
ក្នុងឱកាសចូលរួមជាគណៈអធិបតីនៃពិធីបើកសម្ពោធឱ្យប្រើប្រាស់ស្ពានអាកាស និងផ្លូវក្រោមដីចោមចៅ កាលពីថ្ងៃទី ៣១ មីនា លោក ហ៊ុន សែន បានលើកឡើងថា ថ្ងៃទី ៣០ ខែមីនា ជាថ្ងៃដែលលោកសប្បាយចិត្តជាងគេ ព្រោះការប្រមូលចំណូលផ្ទៃក្នុងបានបំបែកឯតទគ្គកម្មដោយមានទឹកប្រាក់ ២៣៦ លានដុល្លារ ហើយដែលនឹងធ្វើឱ្យចំណូលផ្ទៃក្នុងខែមីនា ឆ្នាំ ២០២២ កើនឡើងដល់ជាង ៧០០ លានដុល្លារ។ លោកបន្តថា តាមតួលេខ គឺក្នុងត្រីមាសទី ១ ឆ្នាំ ២០២២ ចំណូលដែលអគ្គនាយកដ្ឋានពន្ធដារ ប្រមូលបានមានចំនួនជាង ១ ២០០ លានដុល្លារ ដោយក្នុងខែមករា មានចំនួន ២៨៨ លានដុល្លារ, ខែកុម្ភៈ ២២៣ លានដុល្លារ និងខែមីនា មានជាង ៧០០ លានដុល្លារ។ គិតត្រឹមថ្ងៃទី ៣០ ខែមីនា ចំណូលប្រមូលបានមានចំនួនប្រមាណ ១ ១៣២ លានដុល្លាររួចហើយ។
លោកថ្លែងថា៖ «ម្សិលមិញ (ថ្ងៃទី ៣០ ខែមីនា) ចាត់ទុកថាជាពេលដែលខ្ញុំសប្បាយចិត្តក្នុងឆ្នាំនេះខ្លាំងជាងគេ ហេតុអ្វីបានជាយើងត្រូវសប្បាយចិត្ត ព្រោះគឺជាថ្ងៃដែលបំបែកឯតទគ្គកម្មសម្រាប់ចំណូលផ្ទៃក្នុង ដោយក្នុងថ្ងៃទី ៣០ ខែមីនា ចំណូលពន្ធដារផ្ទៃក្នុងរយៈពេល ១ ថ្ងៃ គិតជាប្រាក់ដុល្លារមានចំនួន ២៣៦ លានដុល្លារហើយបើគិតក្នុងរយៈពេល ៣០ ថ្ងៃ (ខែមីនា) គឺចំណូលបានចំនួន ៦២០ លានដុល្លារ»។
លោកលើកឡើងទៀតថា បើតាមថ្នាក់ដឹកនាំនៃអគ្គនាយកដ្ឋានពន្ធដារ នៅថ្ងៃទី ៣១ ខែមីនា ដែលជាថ្ងៃចុងក្រោយនៃខែមីនា លទ្ធភាពនៃការប្រមូលចំណូលអាចនឹងលើសពី ១០០ លានដុល្លារបន្ថែមទៀត។
មូលហេតុធ្វើឱ្យចំណូលក្នុងខែមីនាកើនឡើងត្រូវបានលោក ហ៊ុន សែន ប្រាប់ថា៖ «ខែមីនា ជាខែដែលត្រូវបង់ពន្ធលើប្រាក់ចំណេញនៃបណ្តាក្រុមហ៊ុន»។
លោក ហ៊ុន សែន បានឱ្យដឹងទៀតថា បើបូកជាមួយចំណូលពន្ធគយ ក្នុងខែមីនា ឆ្នាំ ២០២២ កម្ពុជារកចំណូលបានជាង ៩០០ លានដុល្លារ។
យោងតាមលោក ហ៊ុន សែន កាលពីត្រីមាសទី ១ ឆ្នាំ ២០២១ ការប្រមូលពន្ធដារ សម្រេចបានទឹកប្រាក់ ១ ០៣២ លានដុល្លារ ដោយក្នុងខែមករា មានចំនួន ២១៧ លានដុល្លារ, ខែកុម្ភៈ ២០០ លានដុល្លារ និងខែមីនា ៦១៥ លានដុល្លារ។
អ្នកស្រាវជ្រាវសេដ្ឋកិច្ចនៃរាជបណ្ឌិត្យសភាកម្ពុជា លោក ហុង វណ្ណៈ បានប្រាប់ភ្នំពេញ-ប៉ុស្តិ៍កាលពីថ្ងៃទី ៣១ ខែមីនា កំណើនចំណូលពន្ធដារបង្ហាញថា សេដ្ឋកិច្ចកម្ពុជាកាន់តែមានភាពល្អប្រសើរដោយប្រជាជនបានចាប់ផ្តើមចំណាយច្រើនជាងមុន ខណៈវិធីសាស្ត្របង់ពន្ធសម្រាប់អ្នកជាប់កាតព្វកិច្ចបង់ពន្ធក៏កាន់តែងាយស្រួលជាងមុនដែរ។ ចំណូលនេះនឹងមានសម្ទុះខ្លាំងបន្ថែមទៀត ពិសេសនៅពេលវិស័យទេសចរណ៍ និងសំណង់មានភាពល្អប្រសើរឡើងវិញ។
ទោះយ៉ាងណា លោក វណ្ណៈ បានបញ្ជាក់ថា៖ «ដើម្បីឱ្យការប្រមូលចំណូលកាន់តែមានប្រសិទ្ធភាព គឺទាមទារឱ្យអាជ្ញាធរពន្ធដារត្រូវតែខិតខំបន្ថែមទៀតក្នុងការពង្រឹងប្រសិទ្ធភាពនៃការប្រមូលចំណូលពន្ធ ដើម្បីកុំឱ្យមានការលេចជ្រាប»។
អនុប្រធានសភាពាណិជ្ជកម្មកម្ពុជា លោក លឹម ហេង បាននិយាយថា ទោះបីការរីករាលដាលកូវីដ ១៩ នៅមិនទាន់បិទបញ្ចប់ទាំងស្រុង ប៉ុន្តែសកម្មភាពសេដ្ឋកិច្ចនៅកម្ពុជាបានបង្ហាញសម្ទុះឡើងវិញហើយ។ នេះជាមូលហេតុធ្វើឱ្យការប្រមូលចំណូលពន្ធកើនឡើង។ លោកបន្តថាអត្រាភាគរយខ្ពស់នៃចំនួនប្រជាជនចាក់វ៉ាក់សាំងប្រឆាំងនឹងជំងឺកូវីដ ១៩ និងការប្រកាសបើកប្រទេសចាប់តាំងពីខែវិច្ឆិកា ឆ្នាំ ២០២១ គឺជាកម្លាំងចលករមួយដ៏សំខាន់ដែលជួយជំរុញឱ្យចង្វាក់ផលិតកម្មដំណើរការឡើងវិញ។
លោកបញ្ជាក់ថា៖ «នៅពេលចង្វាក់ផលិតកម្មមានដំណើរការ វាមិនត្រឹមតែជួយឱ្យប្រជាពលរដ្ឋមានចំណូលប៉ុណ្ណោះទេ តែក៏ជួយឱ្យការប្រមូលពន្ធដារ និងពន្ធគយកើនឡើងផងដែរ»។
យោងតាមទិន្នន័យរបស់អគ្គនាយកដ្ឋានពន្ធដារ ការប្រមូលចំណូលពន្ធដារ ក្នុងឆ្នាំ ២០២១ សម្រេចបាន ២ ៧៨១,៩២ លានដុល្លារ កើនលើសផែនការ ២៤,០២ ភាគរយ៕ LA