ភ្នំពេញៈ កម្ពុជាផលិតមាសបានជាង ២ តោនក្នុងរយៈពេល ៩ ខែ បន្ទាប់ពីក្រុមហ៊ុនអូស្ត្រាលី Renaissance Minerals (Cambodia)Ltd ចាប់ផ្តើមដំណើរការអាជីវកម្មកាលពីថ្ងៃទី ២១ ខែមិថុនា ដែលជាការបើកផ្លូវនៃការបង្កើតចំណូលជាតិពីវិស័យរ៉ែមាសជាលើកដំបូង។ នេះបើតាមការលើកឡើងរបស់លោកនាយករដ្ឋមន្ត្រី ហ៊ុន សែន កាលពីថ្ងៃទី ៣១ ខែមីនា។
ថ្លែងក្នុងកម្មវិធីសម្ពោធដាក់ឱ្យប្រើប្រាស់ស្ពានអាកាស និងផ្លូវក្រោមដីចោមចៅ នាព្រឹកថ្ងៃទី ៣១ ខែមីនា លោកនាយករដ្ឋមន្ត្រីបានបញ្ជាក់ថា អាជីវកម្មរ៉ែមាសនេះបានជំនួសដោយរ៉ែប្រេងកាត ដែលកម្ពុជាពុំទាន់ទទួលបានអត្ថប្រយោជន៍ បើទោះបីជាប្លុក A ត្រូវបានគេទាញយកកន្លងមកនេះ ប៉ុន្តែនៅមានចំនួនតិចតួចនៅឡើយ។ លោកបញ្ជាក់ថា រ៉ែមាសរបស់កម្ពុជានៅមានទីតាំងច្រើនកន្លែងទៀត ដែលកំពុងរុករក ហើយការរុករកនេះ គឺជាការប្រើប្រាស់នូវធនធានធម្មជាតិ ដើម្បីបំពេញសេចក្តីត្រូវការរបស់ប្រជាជន។
លោក ហ៊ុន សែន បានបញ្ជាក់ថា រយៈពេល ៩ ខែនៃដំណើរការអាជីវកម្មរ៉ែមាស នៅតំបន់អូរខ្វាវ ខេត្តមណ្ឌលគិរី កម្ពុជាអាចផលិតបានចំនួន ២ ២៧៥ គីឡូក្រាម។
លោកនាយករដ្ឋមន្ត្រីបានបន្ថែមថា៖ «គ្រាន់តែរយៈពេល ៩ ខែ យើងផលិតមាសបាន ២ ២៧៥ គីឡូក្រាម ឬជាង ២ តោន នេះយើងគិតតែមួយទេ [តំបន់អូរខ្វាវ មណ្ឌលគិរី] នៅកន្លែងដទៃទៀត។ អ៊ីចឹងយើងក៏ចាប់ផ្តើមប្រើប្រាស់នូវធនធានធម្មជាតិរបស់យើងមួយចំណែក ដែលយើងបាននិងកំពុងរុករក ដើម្បីធ្វើអាជីវកម្មបម្រើឱ្យសេចក្តីត្រូវការរបស់ប្រទេសជាតិ»។
Renaissance Minerals (Cambodia) Ltd គឺជាក្រុមហ៊ុនទី ១ ខ្នាតអន្ដរជាតិ ដែលបានផលិតមាសជាលើកដំបូងនៅប្រទេសកម្ពុជា។ ក្រុមហ៊ុននេះបានចាប់ផ្ដើមសម្ពោធដាក់ឱ្យដំណើរការការដ្ឋានអាជីវកម្ម និងរោងចក្រចម្រាញ់រ៉ែមាស ក្នុងតំបន់អូរខ្វាវ ស្រុកកែវសីមា ខេត្តមណ្ឌលគិរី កាលពីថ្ងៃទី ២១ ខែមិថុនា ឆ្នាំ ២០២១។
លោក Pablo Kang ឯកអគ្គរាជទូតអូស្ត្រាលីប្រចាំកម្ពុជាបាននិយាយក្នុងពេលចុះទៅពិនិត្យការដ្ឋានរបស់ក្រុមហ៊ុន Emerald Resources នាអំឡុងខែធ្នូ ឆ្នាំ ២០២១ ថា ការវិនិយោគរបស់ Renaissance Minerals គឺជាការវិនិយោគរបស់អូស្ត្រាលីដ៏ធំបំផុតនៅក្នុងប្រទេសកម្ពុជាដែលមានថវិកា ១៤០ លានដុល្លារសម្រាប់រយៈពេល ១៥ ឆ្នាំ។
កម្ពុជារំពឹងថា នឹងទទួលបានផលប្រយោជន៍ជាចំណូលដុលជាមធ្យម ១៨៥ លានដុល្លារក្នុង ១ ឆ្នាំ ដែលក្នុងនោះចំណូលថវិកាជាតិពីសួយសារ និងសារពើពន្ធផ្សេងៗប្រមាណ ៤០ លានដុល្លារក្នុង ១ ឆ្នាំពីក្រុមហ៊ុនរុករករ៉ែ Emerald Resources របស់អូស្ត្រាលីនេះ ខណៈនៅក្នុងឆ្នាំ ២០២២ ក្រុមហ៊ុនរុករករ៉ែមាសចំនួន ៤ បន្ថែមទៀតនឹងចាប់ផ្តើមធ្វើអាជីវកម្មចម្រាញ់រ៉ែមាសជាផ្លូវការរបស់ខ្លួន ដោយក្នុងនោះ ៣ ក្រុមហ៊ុនត្រូវបានវិនិយោគដោយក្រុមហ៊ុនមកពីប្រទេសចិន មានទីតាំងនៅខេត្តព្រះវិហារ ក្រចេះ និងមណ្ឌលគិរី និងមួយទៀតជាក្រុមហ៊ុនមកពីប្រទេសឥណ្ឌា ដែលមានទីតាំងនៅខេត្តរតនគិរី៕ LA
វីដេអូ៖