ភ្នំពេញៈ ធនាគារអេស៊ីលីដា ភីអិលស៊ី បានចុះហត្ថលេខាលើអនុស្សរណៈនៃការយោគយល់ (MoU) ជាមួយធនាគារអភិវឌ្ឍន៍ជនបទ និងកសិកម្ម (ធ.អ.ជ.ក.) ស្តីពីកិច្ចសហប្រតិបត្តិការលើការអនុវត្តគម្រោងផ្តល់ឥណទានគាំទ្រការពង្រីកការដាំដុះបន្លែ ផ្លែឈើ ការចិញ្ចឹមសត្វ វារីវប្បកម្ម និងកែច្នៃផលិតផលកសិកម្ម ព្រមទាំងឥណទានគាំទ្រដល់តួអង្គក្នុងខ្សែចង្វាក់ផលិតកម្មក្នុងវិស័យមៀនប៉ៃលិន ស្វាយ និងស្វាយចន្ទី។
ពិធីចុះ MoU នេះត្រូវបានធ្វើឡើងរវាងលោក អ៊ិន ចាន់នី ប្រធាននាយកប្រតិបត្តិធនាគារអេស៊ីលីដា និងលោក កៅ ថាច អគ្គនាយកធនាគារអភិវឌ្ឍន៍ជនបទ និងកសិកម្ម កាលពីថ្ងៃទី ២៩ ខែមីនា ឆ្នាំ ២០២២។
លោក អ៊ិន ចាន់នី បានលើកឡើងថា នេះជាមោទនភាពបំផុតដែលធនាគារអេស៊ីលីដា ភីអិលស៊ី បានចូលរួមចំណែកក្នុងការគាំទ្រគោលនយោបាយរបស់រាជរដ្ឋាភិបាលកម្ពុជាក្នុងការពង្រឹងវិស័យកសិកម្ម តាមរយៈការជំរុញឱ្យមានស្ថិរភាពខ្សែចង្វាក់ផ្គត់ផ្គង់នៅក្នុងទីផ្សារសម្រាប់គាំទ្រការស្តារកំណើនសេដ្ឋកិច្ចឡើងវិញក្រោយវិបត្តិជំងឺកូវីដ ១៩។
MoU មានចក្ខុវិស័យរួមក្នុងការលើកកម្ពស់វិស័យកសិកម្ម តាមរយៈការផ្តល់ឥណទានរួមគ្នាលើវិស័យសំខាន់ៗចំនួន ៦ រួមមាន ការចិញ្ចឹមសត្វ វារីវប្បកម្ម ការដាំដុះបន្លែ-ផ្លែឈើ និងការកែច្នៃផលិតផលកសិកម្ម ព្រមទាំងឥណទានគាំទ្រដល់តួអង្គក្នុងខ្សែចង្វាក់ផលិតកម្មក្នុងវិស័យមៀនប៉ៃលិន ស្វាយ និងស្វាយចន្ទី ក្រោមប្រភពទុនរួមគ្នា (៥០ ភាគរយ-៥០ ភាគរយ) រវាងធ.អ.ជ.ក. និង អេស៊ីលីដា ដោយឈរលើមូលដ្ឋាន «មកមុនផ្តល់មុន» ឬ First Come, First Served។ ការពង្រីកឥណទានលើវិស័យទាំង ៦ នឹងដើរតួនាទីយ៉ាងសំខាន់ក្នុងការបង្កើនផលិតកម្មក្នុងស្រុក ជាពិសេសនៅទីជនបទ។
លោក កៅ ថាច បាននិយាយថា នេះជាសក្ខីភាពនៃការអនុវត្តកម្មវិធីហិរញ្ញប្បទានពិសេសរបស់រដ្ឋាភិបាលដំណាក់កាលទី ២ ដែល ធ.អ.ជ.ក និងធនាគារ អេស៊ីលីដា បានសហការគ្នាអនុវត្តយន្តការសហហិរញ្ញប្បទានចែករំលែកហានិភ័យសំដៅផ្តល់ឥណទានគាំទ្រដល់វិស័យកសិកម្ម។
លោកថ្លែងថា៖ «យន្តការនេះជាការដាក់មូលនិធិជាកញ្ចប់រួមក្នុងគោលបំណងពង្រីកវិសាលភាព និងទំហំឥណទានដែលបង្ហាញពីការរួមចំណែករបស់ធនាគារអេស៊ីលីដា បន្ថែមលើហិរញ្ញប្បទានរបស់រដ្ឋាភិបាលដែលមានក្នុងកម្មវិធីនេះ ហើយក៏ជាយន្តការថ្មីដែលវិស័យឯកជនបានរួមចំណែកជាមួយរាជរដ្ឋាភិបាលក្នុងការអនុវត្តកម្មវិធីពិសេសនេះផងដែរ»។
លោកបញ្ជាក់ថា ក្នុងអំឡុងពេលស្ថានភាពសេដ្ឋកិច្ចជាតិប្រឈមនឹងវិបត្តិជំងឺកូវីដ ១៩ និងស្ថិតក្នុងដំណាក់កាលស្តារសេដ្ឋកិច្ច ធ.អ.ជ.ក នៅតែបន្តគាំទ្រការផ្តល់ឥណទានកសិកម្មយ៉ាងសកម្មក្នុងគោលដៅរក្សាលំនឹងអាជីវកម្ម SMEs ក្នុងវិស័យកសិកម្ម តាមរយៈប្រភពទុនកម្មវិធីហិរញ្ញប្បទានពិសេសរបស់រាជរដ្ឋាភិបាល ដំណាក់កាលទី ១ គាំទ្រដល់ការដាំបន្លែ ផ្លែឈើ ការចិញ្ចឹមសត្វ វារីវប្បកម្ម និងការកែច្នៃផលិតផលកសិកម្ម ដើម្បីបន្តជួយគាំទ្រផ្តល់ឥណទានកសិកម្មនៅក្នុងអត្រាការប្រាក់សម្បទានដល់សហគ្រាសធុនតូច និងមធ្យមក្នុងវិស័យកសិកម្ម។
កម្ពុជាបាននាំចេញកសិផលទៅក្រៅប្រទេសជាង ១,៨ លានតោននារយៈពេល ២ ខែ ដើមឆ្នាំ ២០២២ កើនឡើងជិត ១០ ភាគរយ ស្មើនឹងជិត ១៦ ម៉ឺនតោនបើធៀបនឹងរយៈពេលដូចគ្នាឆ្នាំ ២០២១។ នេះបើតាមរបាយការណ៍ក្រសួងកសិកម្ម។
បើតាមក្រសួងកសិកម្ម ការដាំមៀនប៉ៃលិនកំពុងកើនឡើងគួរឱ្យកត់សម្គាល់ដោយមានផ្ទៃដីដាំជាង ១៣ ៦០៨ ហិកតានៅទូទាំងប្រទេស ហើយភាគច្រើនដាំនៅក្នុងខេត្តបាត់ដំបង ប៉ៃលិន និងបន្ទាយមានជ័យ។ មៀនប៉ៃលិននេះផ្តល់ផលជាមធ្យមពី ៧-៣០ តោនក្នុង ១ ហិកតាអាស្រ័យលើការថែទាំ។ សម្រាប់ផលិតផលគ្រាប់ស្វាយចន្ទីកាលពីឆ្នាំ ២០២១ កម្ពុជាបាននាំចេញក្នុងទឹកប្រាក់សរុប ១ ៦០៤,៨៧ លានដុល្លារកើនឡើង ២៣៣,៣២ ភាគរយបើធៀបនឹងឆ្នាំ ២០២០ ដែលមាន ៤៨១,៤៨ លានដុល្លារ។
កាលពីថ្ងៃទី ១៤ ខែកុម្ភៈ ឆ្នាំ ២០២២ រដ្ឋាភិបាលតាមរយៈក្រសួងសេដ្ឋកិច្ច និងហិរញ្ញវត្ថុ បានប្រកាសដាក់ឱ្យប្រើប្រាស់ជាផ្លូវការនូវកញ្ចប់ថវិកាកម្មវិធីហិរញ្ញប្បទានពិសេសដែលមានទឹកប្រាក់ចំនួន ៥០ លានដុល្លារ ដំណាក់កាលទី ២ ដល់ ធ.អ.ជ.ក សម្រាប់ប្រើប្រាស់លើការផ្តល់ហិរញ្ញប្បទានផ្ទាល់ និងសម្រាប់កម្មវិធីសហហិរញ្ញប្បទានចែករំលែកហានិភ័យជាមួយគ្រឹះស្ថានធនាគារ និងហិរញ្ញវត្ថុសំដៅគាំទ្រដល់ការដាំដុះបន្លែ-ផ្លែឈើ ការចិញ្ចឹមសត្វ វារីវប្បកម្ម និងការកែច្នៃផលិតផលកសិកម្មព្រមទាំងឥណទានគាំទ្រដល់តួអង្គក្នុងខ្សែចង្វាក់ផលិតកម្មមៀនប៉ៃលិន ស្វាយ និងស្វាយចន្ទី៕ LA