The Phnom Penh Post Search

Search form




Logo of Phnom Penh Post newspaper Phnom Penh Post - ភ្ញៀវទេសចរ​អន្តរជាតិ​មក​កម្ពុជា​កើនឡើង​ជាង ១១៤​ ភាគរយ

ភ្ញៀវទេសចរ​អន្តរជាតិ​មក​កម្ពុជា​កើនឡើង​ជាង ១១៤​ ភាគរយ

Content image - Phnom Penh Post
ភ្ញៀវទេសចរ​ដើរ​កម្សាន្ត​នៅ​ប្រាសាទអង្គរវត្ត ខេត្ត​សៀមរាប​។ ហុង មិនា

ភ្ញៀវទេសចរ​អន្តរជាតិ​មក​កម្ពុជា​កើនឡើង​ជាង ១១៤​ ភាគរយ

ភ្នំពេញៈ ប្រទេស​កម្ពុជា​ទទួលបាន​ភ្ញៀវទេសចរ​អន្តរជាតិ ១៥១ ៦៨០ ​នាក់​នៅ​ត្រីមាស​ទី​ ១ ឆ្នាំ​ ២០២២ កើនឡើង​ ១១៤​ ភាគរយ​បើ​ធៀប​នឹង​រយៈពេល​ដូចគ្នា​ក្នុង​ឆ្នាំ ​២០២១ ដែល​នេះ​ជា​សញ្ញា​វិជ្ជមាន​មួយ​សម្រាប់​វិស័យ​ទេសចរណ៍ បន្ទាប់ពី​ទទួលរង​ផល​ប៉ះពាល់​យ៉ាងធ្ងន់ធ្ងរ​ពី​ការរីក​រាលដាល​ជំងឺ​កូវីដ​ ១៩ ជាង​ ២​ ឆ្នាំ​មកនេះ​។

នៅក្នុង​សន្និសីទ​សារព័ត៌មាន កាលពីថ្ងៃ​ទី​ ៣០ ខែមីនា ឆ្នាំ​ ២០២២ លោក គង់ សុភា​រក្ស ប្រធាន​នាយកដ្ឋាន​គ្រប់គ្រង​ស្ថិតិ​ទេសចរណ៍​នៃ​ក្រសួង​ទេសចរណ៍ បាន​ប្រាប់ថា​ក្នុង​ត្រីមាស​ទី​១ ចាប់ពី​ខែមករា ដល់​ខែមីនា ឆ្នាំ​ ២០២២ កម្ពុជា​ទទួលបាន​ទេសចរ​អន្តរជាតិ​សរុប ១៥១ ៦៨០ ​នាក់ កើន ១១៤ ​ភាគរយ​បើ​ធៀប​នឹង​ត្រីមាស​ទី​ ១ ឆ្នាំ​ ២០២១​។ ក្នុងនោះ​ភ្ញៀវ​មក​តាមផ្លូវ​អាកា​សមាន​ចំនួន ៨៦ ៥៨៨ ​នាក់​កើន ១៥៨,២ ​ភាគរយ​, តាមផ្លូវ​គោក ៦៣ ០៤៨​ នាក់ កើន ៦៨,៧ ​ភាគរយ និង​តាម​ផ្លូវទឹក ២ ០៤៤ ​នាក់​។

លោក​ថ្លែងថា​៖ «​ចំពោះ​ស្ថានភាព​ជើងហោះហើរ​មាន​ចំនួន ១ ១៨១ ​ជើង ក្នុងនោះ​រួមមាន ទីក្រុង​ភ្នំពេញ ចំនួន ១ ០១២​ ជើង​, ខេត្តសៀមរាប ១៤៤ ​ជើង និង​ខេត្ត​ព្រះសីហនុ ៥៥ ​ជើង​»​។

ជាមួយ​គ្នានេះដែរ លោក ថោង ខុន រដ្ឋមន្ត្រី​ក្រសួង​ទេសចរណ៍​បាន​ថ្លែងថា ក្នុងឱកាស​បុណ្យចូលឆ្នាំ​ប្រពៃណី​ខ្មែរ​ខាងមុខ​នឹង​មាន​ភ្ញៀវទេសចរ​ដើរ​កម្សាន្ត​ច្រើន ទោះបី​សាំង​ឡើងថ្លៃ​ក៏ដោយ​ពលរដ្ឋ​នឹង​សន្សំសំចៃ ដោយ​ប្ដូរ​ឥរិយាបថ​ក្នុងការ​ប្រើប្រាស់​រថយន្ដ​ដើរ​កម្សាន្ត​ជា​ក្រុម ដើម្បី​កាត់​បន្ថយថ្លៃ​ធ្វើដំណើរ​។ ជាក់ស្ដែង​គិត​ត្រឹម​ថ្ងៃនេះ មាន​ការកក់​សណ្ឋាគារ​ជាច្រើន​មាន​ក្នុង​ខេត្តសៀមរាប​, មណ្ឌលគិរី​, ក្រុងព្រះសីហនុ និង​តំបន់ឆ្នេរ​ជាដើម​។

លោក​បញ្ជាក់ថា​៖ «​ដំណើរ​កម្សាន្ត​របស់​ភ្ញៀវទេសចរ​នៅតែមាន ជាក់ស្ដែង​បន្ទប់​ស្នាក់​នៅតាម​សណ្ឋាគារ ផ្ទះសំណាក់​ក្នុង​ខេត្តសៀមរាប ខេត្ត​ព្រះសីហនុ និង​តំបន់ឆ្នេរ គិត​ត្រឹម​ពេលនេះ​មានការ​កក់​ស្នាក់នៅ​ជា​បន្ដបន្ទាប់​។ ខ្ញុំ​សង្ឃឹមថា ប្រជាពលរដ្ឋ​នឹង​សប្បាយរីករាយ​ត្រៀមខ្លួន​ដើរលេង​ក្នុង​ពិធីបុណ្យ​ចូលឆ្នាំ​ខ្មែរ​ខាងមុខ​។ ក្នុងនោះ​ក្រសួង​ក៏មាន​ការណែនាំ​ស្ដីពី​ការត្រៀម​រៀបចំ​ទទួលភ្ញៀវ​ទេសចរ​ជាតិ និង​អន្ដរជាតិ ដោយ​នឹង​រៀបចំ​កន្លែង​កម្សាន្ត​ជូន​បងប្អូន​ឱ្យមាន​សុវត្ថិភាព​, អនាម័យ​, គុណភាព​, សេវាកម្ម​ឱ្យបាន​ល្អ និង​ជាពិសេស​បំផុត​គឺ​ធ្វើយ៉ាងណា ដើម្បី​កុំឱ្យ​មានការ​ឡើងថ្លៃ​លើ​ផ្នែក​សេវាកម្ម និង​ម្ហូបអាហារ​»​។

លោក កន ចាន់សត្យា អ្នកគ្រប់គ្រង​ទូទៅ​នៃ​សណ្ឋាគារ Lynnaya Angkor River Resort and Spa បាន​ប្រាប់​ភ្នំពេញ​ប៉ុស្តិ៍​នៅ​ថ្ងៃទី​ ៣១ ខែមីនា​នេះ​ថា សណ្ឋាគារ​ចាប់ផ្តើម​ទទួល​បាន​ការកក់​ពី​អតិថិជន​ជា​បណ្តើរៗ​ហើយ តែ​មិនទាន់​ពេញ​នៅឡើយ​ទេ ដោយ​ការកក់​អាច​នឹងមាន​ច្រើន​នៅពេល​កៀក​បុណ្យចូលឆ្នាំ​ខ្មែរ​។ លោក​បាន​បន្ថែមថា អតិថិជន ដែល​បាន​កក់​គឺ​សុទ្ធតែជា​ភ្ញៀវ​ជាតិ ដោយឡែក​ភ្ញៀវ​អន្តរជាតិ​មិនទាន់មាន​នៅឡើយ​ទេ​។

លោក​បាន​បញ្ជាក់ថា​៖ «​នៅក្នុង​ពិធី​បុណ្យចូលឆ្នាំ​ខ្មែរ​ឆ្នាំនេះ ថ្វី​ដ្បិត​ស្ថានភាព​ជំងឺ​កូវីដ​ ១៩ នៅតែ​បន្ត​កើតមាន​ ប៉ុន្តែ​អាច​នឹងមាន​ភ្ញៀវ​មក​កម្សាន្ត​នៅ​ខេត្តសៀមរាប​ច្រើន ដោយសារ​អាជ្ញាធរ​ខេត្ត​បាន​រៀបចំ​កែលម្អ​ហេដ្ឋារចនាសម្ព័ន្ធ​ជាច្រើន​ទាំង​ក្នុង​ក្រុង និង​តាម​រមណីយដ្ឋាន ហើយ​អាជីវកម្ម​ទេសចរណ៍​នានា​ក្នុង​ខេត្ត​បាន​អនុវត្ត​វិធានការ​ការពារ​តាម​ក្រសួង​សុខាភិបាល និង​ស្តង់ដា SOP របស់​ក្រសួង​ទេសចរណ៍ យ៉ាង​ត្រឹមត្រូវ​ដែល​អាច​ផ្តល់​ទំនុកចិត្ត​ដល់​អ្នកទេសចរ​បាន​។ ទោះយ៉ាងណា​ការចំណាយ​របស់​ភ្ញៀវ​ក្នុងស្រុក​នៅមានកម្រិត​ខុសពី​ភ្ញៀវ​បរទេស ដែល​មាន​ការចំណាយ​លើ​ការស្នាក់នៅ​»​។

ម្ចាស់ផ្ទះ​សំណាក់ The Freedom លោក ឈីន ចាន់រ៉ា បាន​ឱ្យដឹង​ដែរ​ថា ជាទូទៅ​រាល់ពេល​មាន​ពិធី​បុណ្យជាតិ​ធំៗ​បែបនេះ ភ្ញៀវទេសចរ តែងតែ​កក់​មុន​ត្រឹម ២ ​ទៅ​ ៣ ​ថ្ងៃ​។ លោក​បន្ថែមថា ជាទូទៅ​តម្លៃ​ការ​ស្នាក់​នៅពេល​បុណ្យទាន​តែង​ឡើងថ្លៃ​ខ្លះ ប៉ុន្តែ​សម្រាប់​ផ្ទះសំណាក់​របស់លោក​ឡើង​ថ្លៃ​តិចតួច​ប៉ុណ្ណោះ ដែល​ភ្ញៀវទេសចរ​អាចមាន​លទ្ធភាព​ក្នុងការ​ស្នាក់​នៅបាន​។

លោក​និយាយថា​៖ «​បើទោះបី​វិបត្តិ​កូវីដ​ ១៩ ធូរស្រាល ប៉ុន្តែ​អាជីវកម្ម​ផ្ទះសំណាក់ ឬ​សណ្ឋាគារ មាន​សង្ឃឹម​តែ​ពេល​មាន​បុណ្យទាន​ធំៗ​ប៉ុណ្ណោះ ព្រោះ​មាន​ភ្ញៀវ​ក្នុងស្រុក​ចេញ​ដើរ​ច្រើន​ដែល​ជួយ​ឱ្យ​ម្ចាស់​អាជីវកម្ម​អាច​បន្ត​រស់រាន​នៅក្នុង​អំឡុងពេល​ដ៏លំបាក​នេះ​។ ខ្ញុំ​យល់ថា ទោះបី​ប្រទេស​យើង​បើក​វិញ​ក៏ដោយ បើ​ប្រទេស​ផ្សេង​នៅ​រឹតបន្តឹង​យើង​មិន​អាចមាន​ភ្ញៀវ​អន្តរជាតិ​មក​បានដែរ​»​។

យោងតាម​តារាង​សូចនាករ​គន្លឹះ​ទេសចរណ៍ និង​ស្ថិតិ​ទេសចរ​ផ្លូវការ​ក្រសួងទេសចរណ៍​ក្នុង​ឆ្នាំ​ ២០២១ កម្ពុជា​ទទួល​បាន​ភ្ញៀវទេសចរ​អន្តរជាតិ​សរុប ១៩៦ ៤៩៥ ​នាក់ ថយចុះ ៨៥ ​ភាគរយ​ធៀប​ឆ្នាំ ​២០២០ ខណៈ​ចំណូល​បាន​ពី​ទេសចរ​អន្តរជាតិ មាន ១៨៤ ​លាន​ដុល្លារ ធ្លាក់ចុះ ៨២ ​ភាគរយ​ពី​ចំនួន ១ ០២៣​ លាន​ដុល្លារ​កាលពី​ឆ្នាំ​ ២០២០​។ ក្នុង​ឆ្នាំ​ ២០២១ វិស័យ​ទេសចរណ៍​បានរួម​ចំណែក​ក្នុង​ផលិតផល​ក្នុងស្រុក ១,៨​ ភាគរយ ធ្លាក់​ពី ៣ ​ភាគរយ​កាលពី​ឆ្នាំ​ ២០២០៕ LA

វីដេអូ៖

អត្ថបទគួរចាប់អារម្មណ៍