ភ្នំពេញៈ កម្ពុជាបាននាំចេញកសិផលទៅទីផ្សារអន្តរជាតិចំនួនជាង ៣,៤ លានតោនក្នុងត្រីមាសទី ១ ឆ្នាំ ២០២២ កើនជាង ១១ ភាគរយបើធៀបនឹងរយៈពេលដូចគ្នានៃឆ្នាំ ២០២១ ខណៈតាមការប៉ានស្មានអាចមានតម្លៃជាង ១,២ ពាន់លានដុល្លារ។ នេះបើយោងតាមរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ។
ទិន្នន័យលទ្ធផលនៃការនាំចេញកសិផលក្នុងត្រីមាសទី ១ ឆ្នាំ ២០២២ របស់អគ្គនាយកដ្ឋានកសិកម្ម ផ្អែកលើប្រព័ន្ធទិន្នន័យគ្រឹះភូតគាមអនាម័យជាតិ បង្ហាញថា កម្ពុជាបាននាំចេញកសិផលទៅក្រៅប្រទេសក្នុងបរិមាណសរុប ៣ ៤៣៤ ០៧០,៦៣ តោន ទៅទីផ្សារគោលដៅ ៥៧ ប្រទេស ដោយមានកំណើន ៣៤៤ ៨៦០,៧១ តោន ស្មើ ១១,១៦ ភាគរយបើធៀបនឹងរយៈពេលដូចគ្នាឆ្នាំ ២០២១ ដែលទទួលបានត្រឹម ៣ ០៨៩ ២០៩,៩២ តោន។
ចំណែកទឹកប្រាក់ដែលទទួលបានតាមការប៉ាន់ស្មានដោយផ្អែកតាមវិក្កយបត្ររបស់អ្នកនាំចេញមានចំនួន ១ ២៦៨,៦ លានដុល្លារ។
កសិផលសំខាន់ៗនាំចេញរួមមាន អង្ករ ស្រូវ ចំណិតដំឡូងមីក្រៀម ដំឡូងមីស្រស់ ម្សៅដំឡូងមី គ្រាប់ស្វាយចន្ទីឆៅ និងកែច្នៃ គ្រាប់សណ្តែកបាយ គ្រាប់ពោត ផ្លែចេកស្រស់ ផ្លែក្រូចត្លុង ផ្លែស្វាយស្រស់ និងកែច្នៃ ម្រេចស្រស់ និងកែច្នៃ ថ្នាំជក់ បន្លែចម្រុះ ម្ទេសស្រស់ និងក្រៀម ជាដើម។
រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន បានប្រាប់ភ្នំពេញប៉ុស្តិ៍នាថ្ងៃទី ៣ ខែមេសា ថា វិស័យកសិកម្មនៅកម្ពុជាកំពុងបន្តរីកចម្រើនជាបន្តបន្ទាប់ ដោយទិន្នផលដែលប្រមូលបានក្នុងរយៈពេលប៉ុន្មានឆ្នាំចុងក្រោយនេះមិនត្រឹមតែជួយកាត់បន្ថយការនាំចូលពីប្រទេសជិតខាងនោះទេ ប៉ុន្តែថែមទាំងធ្វើឱ្យបរិមាណនាំចេញទៅលក់នៅទីផ្សារអន្តរជាតិមានចំនួនកាន់តែច្រើនផងដែរ។ លោកបន្តថា កំណើនទិន្នផលកសិកម្មជាបន្តបន្ទាប់នេះ គឺបណ្តាលមកពីកត្តាសំខាន់ៗមួយចំនួនដូចជា សមត្ថភាពនៃការផលិតកំពុងកើនឡើងតាមរយៈការធ្វើកសិកម្មតាមបែបឆ្លាតវៃ ដោយផ្លាស់ប្តូរទម្លាប់ពីការធ្វើកសិកម្មបែបប្រពៃណីទៅជាកសិកម្មបែបទំនើប, សមិទ្ធផលនៃការកសាងប្រព័ន្ធហេដ្ឋារចនាសម្ព័ន្ធ (ប្រព័ន្ធផ្លូវថ្នល់ដឹកជញ្ជូន កំពង់ផែ អគ្គិសនី ប្រព័ន្ធស្រោចស្រព រោងចក្រកែច្នៃ និងវេចខ្ចប់), និងការពង្រីកទីផ្សារអន្តរជាតិថ្មីៗសម្រាប់នាំចេញ។
លោកថ្លែងថា៖ «ការនាំចេញកសិផលរបស់យើងនៅក្នុងឆ្នាំ ២០២២ នេះនឹងកើនឡើងច្រើនថែមទៀតធៀបនឹងឆ្នាំ ២០២១ ខណៈកាលពីឆ្នាំ ២០២១ ការនាំចេញកសិផលកម្ពុជាទៅកាន់ទីផ្សារអន្តរជាតិមានទឹកប្រាក់ជាង ៤ ពាន់លានដុល្លារ និងឆ្នាំ ២០២០ មានជាង ៣ ពាន់លានដុល្លារ»។
លោកបានបន្ថែមថា កំណើនទិន្នផល និងប្រាក់ចំណូលពីការនាំចេញកសិផលមិនត្រឹមតែចូលរួមចំណែកជំរុញកំណើនសេដ្ឋកិច្ចប៉ុណ្ណោះទេ ប៉ុន្តែថែមទាំងជួយបង្កើតការងារ ប្រាក់ចំណូលដល់ប្រជាកសិករ និងអ្នកវិនិយោគផងដែរ។
អនុប្រធានសមាគមសុវត្ថិភាពបន្លែ ត្រី សាច់ លោក សុខ យ៉ន បាននិយាយថា បញ្ហាទីផ្សារ បច្ចេកទេសដាំដុះ និងការពង្រីកផ្ទៃដីកសិកម្មបានធ្វើឱ្យទិន្នផលកសិផលកម្ពុជាក្នុងរយៈពេល ២-៣ ឆ្នាំចុងក្រោយនេះកើនជាបន្តបន្ទាប់ ពិសេសផលិតផលដែលមានទីផ្សារនៅក្រៅប្រទេស។ កំណើនទិន្នផលមិនត្រឹមតែជួយឱ្យកម្ពុជាមានឯករាជភាពប៉ុណ្ណោះទេ ប៉ុន្តែថែមទាំងធ្វើឱ្យទីផ្សារផលិតផលកសិផលកម្ពុជាត្រូវគេទទួលស្គាល់លើឆាកអន្តរជាតិកាន់តែច្រើនផងដែរ។
លោកប្រាប់ថា៖ «ការពង្រីកបានទីផ្សារនាំចេញជាបន្តបន្ទាប់ ពិសេសប្រទេសចិនបានធ្វើឱ្យការដាំដុះរបស់ប្រជាកសិករខ្មែរ រួមទាំងការវិនិយោគរបស់វិនិយោគិនក្នុងស្រុក និងបរទេសដើម្បីនាំចេញមានចំនួនកាន់តែច្រើនផងដែរ»។
ទោះយ៉ាងណាលោកបញ្ជាក់ថា កម្ពុជាក៏ត្រូវតែខិតខំសម្រិតសម្រាំងពូជ គុណភាពផលិតផល និងការវេចខ្ចប់ឱ្យមានលក្ខណៈស្តង់ដា ដើម្បីបង្កើតសក្តានុពលនាំចេញផងដែរ។
កាលពីឆ្នាំ ២០២១ កម្ពុជាបាននាំចេញកសិផលទៅក្រៅប្រទេស (៦៨ ប្រទេស) សរុប ៧ ៩៨៤ ២៥១,៨៣ តោនកើនឡើង ៦៣,៨៣ ភាគរយ បើធៀបនឹងឆ្នាំ ២០២០។ ទឹកប្រាក់ទទួលបានមានប្រមាណ ៤,៩៦ ពាន់លានដុល្លារ។ នេះបើតាមក្រសួងកសិកម្ម រុក្ខាប្រមាញ់ និងនេសាទ៕ LA
វីដេអូ៖