.jpg)
ទិដ្ឋភាពមើលពីខាងលើខេត្តសៀមរាប។ រូបថត TEA Seiha/ទៀ សីហា
ភ្នំពេញៈ លោកនាយករដ្ឋមន្ត្រី ហ៊ុន សែន បានប្រកាសប្រសិទ្ធនាមខេត្តសៀមរាបជា «តារារះនៅទិសឧត្តរ» ខណៈខេត្តនេះកំពុងសាងសង់អាកាសយានដ្ឋានអន្តរជាតិថ្មីខ្នាតយក្ស និងជាខេត្តដែលមានហេដ្ឋារចនាសម្ព័ន្ធតភ្ជាប់ជាមួយរាជធានីភ្នំពេញ ខេត្តបន្ទាយមានជ័យ និងខេត្តបាត់ដំបង ល្អប្រសើរ ពិសេសវត្តមាននៃហេដ្ឋារចនាសម្ព័ន្ធផ្លូវទាំង ៣៨ ខ្សែក្នុងក្រុងសៀមរាប។
នៅក្នុងពិធីចុះពិនិត្យការដ្ឋានសាងសង់អាកាសយានដ្ឋានអន្តរជាតិសៀមរាបថ្មី នាថ្ងៃទី ៣ ខែមេសា ឆ្នាំ ២០២២ លោក ហ៊ុន សែន បានថ្លែងថា កម្ពុជាដល់ពេលត្រូវប្រកាសដាក់ខេត្តសៀមរាប ដែលជាខេត្តទេសចរណ៍វប្បធម៌ និងប្រវត្តិសាស្ត្រ ជា«តារារះនៅទិសឧត្តរ» មួយទៀត បន្ទាប់ពីខេត្តព្រះសីហនុ «តារារះនៅទិសនិរតី»។
លោកថ្លែងថា៖ «តារារះនៅទិសឧត្តរមួយទៀតវាល្មមដល់ពេលហើយ។ យើងនិយាយយ៉ាងដូច្នេះ គឺយើងមានវឌ្ឍនភាពច្រើនទៅលើការតភ្ជាប់រវាងទីក្រុងភ្នំពេញមកកាន់ខេត្តសៀមរាប និងពីសៀមរាបទៅកាន់ខេត្តបន្ទាយមានជ័យ ទៅបាត់ដំបង បូករួមជាមួយនឹងការដាក់ទុនយ៉ាងច្រើនចូលទៅទីរួមខេត្តសៀមរាប ការកសាងហេដ្ឋារចនាសម្ព័ន្ធទ្រទ្រង់ដ៏ល្អក្នុងទីរួមខេត្ត យើងកំពុងសង់អាកាសយានដ្ឋានអន្តរជាតិខ្នាតយក្សនៅខេត្តសៀមរាបនេះ»។
លោកនាយករដ្ឋមន្ត្រីបន្តថា ការប្រសិទ្ធនាមជាតារារះទិសឧត្តរនេះនឹងមិនគ្របដណ្តប់ និងបម្រើឱ្យការអភិវឌ្ឍសេដ្ឋកិច្ច តែនៅក្នុងខេត្តសៀមរាបនោះទេ ប៉ុន្តែវានឹងគ្របដណ្តប់ និងបម្រើឱ្យការអភិវឌ្ឍសេដ្ឋកិច្ចនៅក្នុងខេត្តជុំវិញរួមមានខេត្តឧត្តរមានជ័យ ខេត្តកំពង់ធំ និងមួយផ្នែកនៃខេត្តព្រះវិហារផងដែរ។
លោកបញ្ជាក់ទៀតថា ខេត្តសៀមរាបនឹងមានទីក្រុងរណបថ្មីមួយស្ថិតនៅជុំវិញអាកាសយានដ្ឋានអន្តរជាតិសៀមរាបថ្មីនៃស្រុកសូទ្រនិគម ដែលនឹងប្រមូលផ្តុំទៅដោយអគារសំណង់ផ្សេងៗ ពិសេសវានឹងក្លាយទៅជាតំបន់លំនៅឋាន ដែលមានការអភិវឌ្ឍរីកចម្រើននៅពេលខាងមុខ។ ដូច្នេះការវិនិយោគលើអាកាសយានដ្ឋានអន្តរជាតិមិនត្រឹមតែផ្តល់ផលប្រយោជន៍ដល់ក្រុមហ៊ុនប៉ុណ្ណោះទេ ប៉ុន្តែវានឹងផ្តល់ផលប្រយោជន៍ដល់ប្រជាពលរដ្ឋនៅខេត្តសៀមរាប និងប្រទេសជាតិតាមរយៈកំណើនទេសចរណ៍។
លោក លី សំរិទ្ធ អ្នកនាំពាក្យរដ្ឋបាលខេត្តសៀមរាបបានប្រាប់ភ្នំពេញប៉ុស្តិ៍ថា ការប្រសិទ្ធនាមជា «តារារះនៅទិសឧត្តរ» របស់លោកនាយករដ្ឋមន្ត្រីគឺដោយសារសៀមរាបមានការអភិវឌ្ឍច្រើន និងមួយវិញទៀតវានឹងក្លាយជាកាតាលីករជួយជំរុញល្បឿនការអភិវឌ្ឍសង្គមសេដ្ឋកិច្ចក្នុងខេត្តកាន់តែលឿន និងជួយទាក់ទាញភ្ញៀវទេសចរ និងធុរកិច្ចឱ្យមកបណ្តាក់ទុនក្នុងខេត្តបានកាន់តែច្រើន។
លោកប្រាប់ថា៖ «ការប្រសិទ្ធនាមរបស់សម្តេចតេជោឱ្យខេត្តសៀមរាបជា «តារារះនៅទិសឧត្តរ» នឹងជួយជំរុញកំណើនការអភិវឌ្ឍឱ្យកាន់តែលឿន ដូចជាយើងមានព្រលានយន្តហោះថ្មីវានឹងធ្វើឱ្យមានកំណើនទេសចរ ធុរកិច្ច អាជីវកម្ម និងសេវាកម្មក៏កើន។ ហ្នឹងហើយដែលថា រះបន្ទាប់ពីការអភិវឌ្ឍ ហើយនៅពេលដែលរះហើយ នឹងទាក់ទាញការអភិវឌ្ឍនៅក្នុងខេត្តកាន់តែខ្លាំងថែមទៀត»។
បើតាមលោក លី សំរិទ្ធ នៅពេលខេត្តសៀមរាបមានការរីកចម្រើន និងអភិវឌ្ឍ ប្រជាជនទូទាំងប្រទេស ពិសេសនៅក្នុងខេត្តសៀមរាបនឹងទទួលបានផលប្រយោជន៍ជាច្រើនពីការរីកចម្រើនទាំងអស់នេះ។
រដ្ឋាភិបាលកម្ពុជាបានប្រើប្រាស់ថវិកាផ្ទាល់ខ្លួនប្រមាណ ១៥០ លានដុល្លារក្នុងការធ្វើឱ្យប្រសើរឡើងនូវផ្លូវចំនួន ៣៨ ខ្សែក្នុងក្រុងសៀមរាបសំដៅបង្កើនសោភណភាពខេត្តក្នុងការទាក់ទាញភ្ញៀវទេសចរ។
អាកាសយានដ្ឋានអន្តរជាតិសៀមរាបថ្មីមានទីតាំងនៅក្នុងឃុំតាយ៉ក ស្រុកសូទ្រនិគម និងត្រូវបានសាងសង់ឡើងលំដាប់ 4E លើផ្ទៃដី ៧៥០ ហិកតាជាមួយទុនវិនិយោគប្រមាណជិត ៩០០ លានដុល្លារ។ បច្ចុប្បន្ន គម្រោងនេះសម្រេចបាន ២២ ភាគរយ ដោយគ្រោងនឹងដាក់ឱ្យចុះចតសាកល្បងនៅអំឡុងខែតុលា ឆ្នាំ ២០២៣៕ LA
វីដេអូ៖
