.jpg)
ក្រុមកម្មការិនីដេរសម្លៀកបំពាក់ក្នុងរោងចក្រមួយនៅក្រុងភ្នំពេញ។ ហុង មិនា
ភ្នំពេញៈ គម្រោងវិនិយោគចំនួន ៤១ ដែលមានតម្លៃសរុប ២ ៣៩២,៥៨ លានដុល្លារ និងបង្កើតការងារបាន ៤០ ១៤៧ កន្លែងត្រូវបានក្រុមប្រឹក្សាអភិវឌ្ឍន៍កម្ពុជា (CDC) អនុម័តក្នុងត្រីមាសទី ១ ឆ្នាំ ២០២២ ដែលភាគច្រើនស្ថិតក្នុងវិស័យវាយនភណ្ឌ។ នេះបើយោងតាមការគណនារបស់ភ្នំពេញប៉ុស្តិ៍។
បើយោងតាមសេចក្តីប្រកាសព័ត៌មាននៅលើបណ្តាញសង្គមរបស់ CDC គម្រោងដែលត្រូវបានអនុម័តក្នុងត្រីមាសទី ១ ឆ្នាំ ២០២២ មានដូចជា រោងចក្រកាត់ដេរសម្លៀកបំពាក់ ផលិតផលធ្វើដំណើរ ស្បែកជើង រោងចក្រកែច្នៃវេចខ្ចប់ផ្លែឈើ រោងចក្រផលិតសម្បកកង់យានយន្ត សណ្ឋាគារ មន្ទីរពេទ្យ រោងចក្រដំឡើងរថយន្ត និងមជ្ឈមណ្ឌលពាណិជ្ជកម្មជាដើម។
អនុប្រធានសភាពាណិជ្ជកម្មកម្ពុជា លោក លឹម ហេង បានប្រាប់ភ្នំពេញ-ប៉ុស្តិ៍ក្នុងថ្ងៃទី ៣ ខែមេសាថា ទោះបីជាវិបត្តិនៃការឆ្លងរាលដាលជំងឺកូវីដ ១៩ នៅលើពិភពលោកបានអូសបន្លាយចាប់តាំងពីចុងឆ្នាំ ២០១៩ រហូតមកដល់បច្ចុប្បន្នក៏ដោយ ក៏ចំនួនគម្រោងវិនិយោគដែលបានមកដាក់ពាក្យសុំវិនិយោគនៅកម្ពុជា មិនបានធ្លាក់ចុះនោះទេ ពិសេសចាប់ពីចុងឆ្នាំ ២០២១ មក។ លោកបានបន្តថា កំណើនចំនួនគម្រោងស្នើសុំវិនិយោគ និងការអនុម័តពី CDC គឺដោយសារមានកត្តារួមផ្សំមួយចំនួនដូចជា ការសម្រេចបានជាបន្តបន្ទាប់នៃកិច្ចព្រមព្រៀងពាណិជ្ជកម្មសេរីកម្ពុជាជាលក្ខណៈទ្វេភាគី និងពហុភាគីជាមួយនឹងប្រទេសជាច្រើនលើពិភពលោក, ការដាក់ចេញគោលនយោបាយទាក់ទាញអ្នកវិនិយោគរបស់កម្ពុជា, ការគ្រប់គ្រងដោយប្រសិទ្ធភាពនៃជំងឺកូវីដ ១៩ និងការបើកទទួលវិនិយោគិនបរទេសបានឆាប់រហ័សជាងគេក្នុងតំបន់។
លោកបាននិយាយថា៖ «លក្ខណពិសេសនៃទីតាំងភូមិសាស្ត្រ និងយុទ្ធសាស្ត្រទាំងអស់ខាងលើបានធ្វើឱ្យកម្ពុជាក្លាយជាប្រទេសដែលកំពុងតែទាក់ទាញនូវចំណាប់អារម្មណ៍អ្នកវិនិយោគ និងភ្ញៀវទេសចរជាច្រើនឱ្យចូលមកប្រទេសកម្ពុជា»។
ជាមួយនឹងសុទិដ្ឋិនិយមខាងលើ លោក លឹម ហេង បានប្រាប់ទៀតថា៖ «អ្វីដែលពិសេសសម្រាប់រយៈពេលចុងក្រោយនេះ គឺខ្ញុំសង្កេតឃើញថា គម្រោងដែល CDC អនុម័ត គឺមានលក្ខណៈចម្រុះគួរឱ្យកត់សម្គាល់ ដែលមានទាំងឧស្សាហកម្មធុនស្រាល មធ្យម និងធ្ងន់»។
លោកពន្យល់ថា ការវិនិយោគដែលមានលក្ខណៈចម្រុះបែបនេះនឹងជួយធ្វើឱ្យសេដ្ឋកិច្ចកម្ពុជាមានលំនឹងកាន់តែខ្លាំង ព្រោះបើទីផ្សារនាំចេញផ្នែកណាមួយមានបញ្ហា គឺវាមិនអាចធ្វើឱ្យសេដ្ឋកិច្ចជាតិជាប់គាំងនោះទេ។
បើយោងតាម លោក លឹម ហេង ការចូលជាធរមានជាបន្តបន្ទាប់នៃកិច្ចព្រមព្រៀងសេរីពាណិជ្ជកម្មដែលកម្ពុជាបានធ្វើជាមួយប្រទេសជាច្រើននៅលើពិភពលោក និងកំណើនវិនិយោគដែលមានលក្ខណៈចម្រុះក៏កំពុងជួយកាត់បន្ថយការពឹងផ្អែកទាំងស្រុងរបស់កម្ពុជាលើប្រព័ន្ធអនុគ្រោះពន្ធដែលកម្ពុជាអាចនឹងបាត់បង់នាពេលខាងមុខដូចជា EBA និង GSP ផងដែរ។
អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា លោក ហុង វណ្ណៈ បាននិយាយថា ការខិតខំប្រឹងប្រែងរបស់ក្រសួងស្ថាប័នពាក់ព័ន្ធ ជាពិសេសក្រសួងពាណិជ្ជកម្មក្នុងការចរចាបង្កើតកិច្ចព្រមព្រៀងពាណិជ្ជកម្មសេរីជាច្រើន និងការសហការរវាងក្រុមប្រឹក្សាអភិវឌ្ឍន៍កម្ពុជា និងវិស័យឯកជនក្នុងស្រុកក្នុងការកៀរគរវិនិយោគពីក្រៅប្រទេសបានជំរុញឱ្យមានគម្រោងវិនិយោគថ្មីជាច្រើននៅដើមឆ្នាំ ២០២២ នេះ។
លោកបន្ថែមថា វាជាចំណុចចាប់ផ្តើមដ៏ល្អក្នុងឆ្នាំ ២០២២ នេះ ទោះបីជំងឺកូវីដ ១៩ នៅបន្តយាយីក៏ដោយ។ ម្យ៉ាងវិញទៀត មានកត្តាធំៗមួយចំនួន ដែលជំរុញឱ្យការបោះទុនវិនិយោគបន្តមានភាពវិជ្ជមាន រួមមាន ស្ថិរភាពនយោបាយ ការគ្រប់គ្រងម៉ាក្រូសេដ្ឋកិច្ចរបស់កម្ពុជាបានល្អប្រសើរ ការសម្រួលដល់អ្នកវិនិយោគ តាមរយៈច្បាប់វិនិយោគថ្មី រួមទាំងកិច្ចព្រមព្រៀងពាណិជ្ជកម្មសេរីទ្វេភាគី និងតំបន់ និងគោលនយោបាយស្រោចវ៉ាក់សាំងរបស់រាជរដ្ឋាភិបាល បានផ្តល់ទំនុកចិត្តដល់វិនិយោគិនទាំងនោះ។
ទិន្នន័យពីធនាគារនៃកម្ពុជាបានឱ្យដឹងថា គិតត្រឹមចុងត្រីមាសទី ១ ឆ្នាំ ២០២១ ការវិនិយោគផ្ទាល់ពីបរទេសនៅកម្ពុជាមានទឹកប្រាក់សរុប ៣៩ ពាន់លានដុល្លារ ក្នុងនោះប្រទេសចិន មានចំណែក ៤៤,២ ភាគរយ, កូរ៉េ ១០,៦ ភាគរយ, វៀតណាម ៦,៣ ភាគរយ, សិង្ហបុរី ៦,២ ភាគរយ, ជប៉ុន ៥,៨ ភាគរយ និងប្រទេសមួយចំនួនទៀតដូចជា ម៉ាឡេស៊ី, ថៃ, អង់គ្លេស, កាណាដា និងអាមេរិក ជាដើម៕ LA
