ទីក្រុងញូវយ៉កៈ មន្ត្រីជាន់ខ្ពស់ធនាគារកណ្តាលអាមេរិកបានឱ្យដឹងកាលពីថ្ងៃសៅរ៍ថា ធនាគារកណ្តាលមួយនេះ គួរតែចាប់ផ្តើមកាត់បន្ថយតារាងតុល្យការរបស់ខ្លួននៅដើមខែក្រោយ ជាអ្វីនឹងក្លាយជាជំហានដ៏សំខាន់មួយក្នុងការជំរុញឱ្យមានការរឹតបន្តឹងរូបិយវត្ថុ។
នៅក្នុងសុន្ទរកថាមួយ នៅសាកលវិទ្យាល័យ Princeton លោក John Williams អ្នកបង្កើតគោលនយោបាយរបស់ធនាគារកណ្ដាលអាមេរិកដែលជាប្រធានធនាគារបម្រុងសហព័ន្ធនៅញូវយ៉ក បានអះអាងថា ការរឹតបន្តឹងនេះ គឺជាការបន្ទាន់ក្នុងការប្រឈមមុខនឹងហានិភ័យ «ស្រួចស្រាវ» ដែលបង្កឡើងដោយអតិផរណាកើនឡើង ហានិភ័យកាន់តែធ្ងន់ធ្ងរដោយសារតែសង្គ្រាមអ៊ុយក្រែន ការរីករាលដាលជំងឺកូវីដ ១៩ និងកង្វះកម្លាំងពលកម្ម និងការផ្គត់ផ្គង់ដែលកំពុងបន្ត។
លោកបានថ្លែងដោយសំដៅគណៈកម្មាធិការទីផ្សារបើកចំហសហព័ន្ធដែលជាស្ថាប័នបង្កើតគោលនយោបាយរូបិយវត្ថុរបស់ធនាគារកណ្ដាលអាមេរិក ដែលគ្រោងនឹងជួបប្រជុំនៅថ្ងៃទី ៣ និងទី ៤ ខែឧសភាថា៖ «ខ្ញុំរំពឹងថាដំណើរការនៃការកាត់បន្ថយទំហំនៃតារាងតុល្យការនេះអាចចាប់ផ្តើមបានភ្លាមៗនៅពេលដែលកិច្ចប្រជុំ FOMC ខែឧសភា»។
ក្នុងនាមជាប្រធានសាខាធនាគារប្រចាំញូវយ៉ករបស់ធនាគារកណ្ដាលអាមេរិកលោក Williams មានតួនាទីជាអនុប្រធាន FOMC និងជាសមាជិករូបក្នុងចំណោមសមាជិកអចិន្ត្រៃយ៍ទាំង ៨ របស់ខ្លួន។
នៅរយៈពេលជាច្រើនថ្ងៃដំបូងនៃជំងឺកូវីដ ១៩ ដោយសារតែសេដ្ឋកិច្ចរបស់ប្រទេសនេះបាត់បង់តុល្យភាព ធនាគារកណ្តាលអាមេរិក បានដាក់ឱ្យដំណើរការកម្មវិធីទិញមូលបត្របំណុល និងមូលបត្រដែលគាំទ្រដោយកម្ចីទិញផ្ទះ ដើម្បីរក្សាស្ថិរភាពទីផ្សារហិរញ្ញវត្ថុ។
នៅក្នុងដំណើរការនេះ ធនាគារនេះបានបង្កើនទំហំជាងទ្វេដងនៃតារាងតុល្យការរបស់ខ្លួន ដែលបានកើនឡើងដល់ ៨,៩ ពាន់ពាន់លានដុល្លារពី ៤,១ ពាន់ពាន់លានដុល្លារកាលពីខែកុម្ភៈ ឆ្នាំ ២០២០។
កាលពីខែមុន ធនាគារកណ្តាលអាមេរិក បានបញ្ឈប់ការទិញបែបនេះ ដែលបង្ហាញការអនុវត្ត ១ ជំហានថយក្រោយជាធម្មតាលើកដំបូង។
ឥឡូវនេះ ដើម្បីកាត់បន្ថយតារាងតុល្យការរបស់ខ្លួន ធនាគារកណ្តាលអាមេរិក នឹងអនុញ្ញាតឱ្យផលបត្ររបស់ខ្លួនធ្លាក់ចុះជាលំដាប់ជាពិសេស ដោយមិនជំនួសទាំងស្រុងនូវមូលបត្រទាំងនោះដែលដល់រយៈពេលកំណត់នោះទេ។
កាលពី ២ សប្តាហ៍កន្លងទៅ គណៈកម្មាធិការបង្កើតគោលនយោបាយរូបិយវត្ថុរបស់ធនាគារកណ្ដាលអាមេរិកបានចាត់វិធានការដំឡើងអត្រាការប្រាក់ ១ ភាគ ៤ ដោយដាក់វាក្នុងចន្លោះពី ០,២៥ ភាគរយ ទៅ ០,៥០ ភាគរយ។
ក្រុមសេដ្ឋកិច្ចវិទូ ជាច្រើនមើលឃើញថា ការសម្រេចចិត្តដើម្បីកាត់បន្ថយតារាងតុល្យការរបស់ធនាគារកណ្ដាលអាមេរិកថាគ្រាន់តែជាវិធានការរូបិយវត្ថុដ៏សំខាន់មួយ ដូចជាការដំឡើងអត្រាការប្រាក់។
លោក Jerome Powell ប្រធានធនាគារកណ្តាលបានឱ្យដឹងក្នុងសន្និសីទសារព័ត៌មានមួយកាលពីថ្ងៃទី ១៦ ខែមីនាថា ការកាត់បន្ថយតារាងតុល្យការអាចត្រូវបានសម្រេចនៅក្នុងកិច្ចប្រជុំ FOMC នៅពេលខាងមុខ ប៉ុន្តែលោកមិនបញ្ជាក់អំពីពេលវេលានោះទេ៕ LA