.jpg)
ស្ត្រីម្នាក់កំពុងស្វែងរកទិញផលិតផលក្នុងស្រុកតាមប្រព័ន្ធអនឡាញ។ ហុង មិនា
ភ្នំពេញៈ វិស័យឯកជនបានប្រកាសស្វាគមន៍ចំពោះការដាក់ឱ្យដំណើរការនូវផ្សារតាមប្រព័ន្ធអេឡិចត្រូនិក «ខេមបូឌាត្រេដ» ដើម្បីលើកស្ទួយផលិតផលក្នុងស្រុក ជាពិសេសសហគ្រាសខ្នាតតូច និងមធ្យម (SMEs) អាចដាក់តាំងបង្ហាញលក់ផលិតផលរបស់ខ្លួនតាមប្រព័ន្ធអនឡាញនេះទៅកាន់អតិថិជនទាំងក្នុង និងក្រៅប្រទេស។
ផ្សារខេមបូឌាត្រេដ ត្រូវបានក្រសួងពាណិជ្ជកម្មប្រកាសដាក់ដំណើរការជាផ្លូវការកាលពីថ្ងៃទី ៣១ ខែមីនា។ ប្រព័ន្ធផ្សារអនឡាញនេះ គឺជាសមាសភាគមួយយ៉ាងសំខាន់ក្រោមគម្រោងអភិវឌ្ឍន៍ពាណិជ្ជកម្មតាមប្រព័ន្ធអេឡិចត្រូនិក(Go4eCAM) ដែលបានទទួលការគាំទ្រផ្នែកហិរញ្ញវត្ថុដោយកម្មវិធីពង្រឹងក្របខ័ណ្ឌសមាហរណកម្មពាណិជ្ជកម្ម (Enhanced Integrated Framework--EIF) និងរាជរដ្ឋាភិបាលកម្ពុជា សម្រាប់ការអនុវត្តក្នុងរយៈពេល ៣ ឆ្នាំ ដោយក្រសួងពាណិជ្ជកម្មរហូតដល់ខែមិថុនា ឆ្នាំ ២០២៣។ គម្រោង Go4eCAM គឺជាគំនិតផ្តួចផ្តើមពាណិជ្ជកម្មតាមប្រព័ន្ធអេឡិចត្រូនិកដ៏សំខាន់មួយ ដែលត្រូវបានអនុម័តនៅខែមករា ឆ្នាំ ២០២០ ក្នុងគោលបំណងបង្កើនឱកាសសេដ្ឋកិច្ច និងការចូលរួមក្នុងសេដ្ឋកិច្ចឌីជីថលសម្រាប់សហគ្រាសធុនតូច និងមធ្យមកម្ពុជា។ នេះបើតាម លោកស្រី តឹករ៉េត កំរង រដ្ឋលេខាធិការក្រសួងពាណិជ្ជកម្ម។
លោក តែ តាំងប៉ ប្រធានសម្ព័ន្ធសមាគមសហគ្រាសធុនតូច និងមធ្យមកម្ពុជា (FASMEC) លើកឡើងថា ការដាក់ឱ្យដំណើរការផ្សារអនឡាញ ផ្សារខេមបូឌាត្រេដ គឺជាវឌ្ឍនភាពថ្មីមួយទៀតដែលរដ្ឋាភិបាលបានជួយបង្កើតទីផ្សារសម្រាប់ផលិតករក្នុងស្រុកឱ្យមានលទ្ធភាពដាក់លក់ផលិតផលតាមអនឡាញទៅកាន់អតិថិជន។
លោកនិយាយថា៖ «ក្នុងនាមប្រធានសម្ព័ន្ធសមាគមសហគ្រាសធុនតូច និងមធ្យមកម្ពុជា ខ្ញុំស្វាគមន៍ចំពោះគំនិតផ្តួចផ្តើមនេះ ព្រោះជាការបើកផ្លូវសម្រាប់សហគ្រាសធុនតូច និងមធ្យម កាន់តែមានឱកាសក្នុងការជំរុញការលក់ផលិតផលរបស់ខ្លួនកាន់តែទូលំទូលាយជាងមុន»។
សហស្ថាបនិករបស់ផ្សារអនឡាញ Smile Shop លោក ម៉ាក ចំរើន បានប្រាប់ថា ផ្សារខេមបូឌាត្រេដ នឹងជួយលើកស្ទួយ SMEs ឱ្យមានលទ្ធភាពច្រើនជាងមុនក្នុងការដាក់តាំងបង្ហាញផលិតផលរបស់ខ្លួន។
លោកថ្លែងថា៖ «វាជាគំនិតផ្តួចផ្តើមថ្មីដែលគាំទ្រទៅដល់សហគ្រាសធុនតូច និងមធ្យមតាមប្រព័ន្ធអនឡាញឱ្យកាន់តែទូលំទូលាយសម្រាប់ SME មួយចំនួនដែលមិនមានលទ្ធភាពក្នុងការបង្កើត E-commerce ដោយខ្លួនឯង។ នេះជាចំណុចចាប់ផ្តើមដ៏ល្អ»។
លោកក៏បានស្នើឱ្យក្រសួងពិចារណាក្នុងការសហការជាមួយបណ្តាផ្សារអនឡាញក្នុងស្រុកដែលមានស្រាប់ ដើម្បីពង្រីកទីផ្សារអនឡាញនេះកាន់តែធំ និងមាននិរន្តរភាព។
លោក Ratnakar Adhikari នាយកប្រតិបត្តិនៃកម្មវិធីពង្រឹងក្របខ័ណ្ឌសមាហរណកម្មពាណិជ្ជកម្ម (EIF) កន្លងមកបាននិយាយថា៖ «កម្ពុជាគឺជាប្រទេសគំរូមួយដែលបានអនុវត្តគម្រោងពាណិជ្ជកម្មពីកម្មវិធីពង្រឹងក្របខ័ណ្ឌសមាហរណកម្មពាណិជ្ជកម្ម (EIF) ដោយមានការចូលរួមយ៉ាងសកម្មពីដៃគូក្នុងប្រទេស និងបានឈរលើគោលការណ៍ជាមូលដ្ឋានភាពជាម្ចាស់ការ»។
លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានបញ្ជាក់ថា ផ្សារខេមបូឌាត្រេដនឹងដើរតួនាទីយ៉ាងសំខាន់ក្នុងការជំរុញការធ្វើពិពិធកម្មសេដ្ឋកិច្ច និងនាំចេញផលិតផលខ្មែរទាំងទីផ្សារក្នុងស្រុក និងអន្តរជាតិ ដែលនេះគឺស្របទៅតាមចក្ខុវិស័យវែងឆ្ងាយក្នុងការចាប់យកកាលានុវត្តភាពពីបដិវត្តន៍ឧស្សាហកម្ម ៤.០ របស់រាជរដ្ឋាភិបាលកម្ពុជា។ ការអភិវឌ្ឍបច្ចេកវិទ្យាឌីជីថល ក៏ជាការឆ្លើយតបនឹងគោលនយោបាយអភិវឌ្ឍន៍ ឧស្សាហកម្មកម្ពុជាក្នុងការធ្វើពិពិធកម្មសេដ្ឋកិច្ច តាមរយៈការលើកកម្ពស់សមត្ថភាពរបស់សហគ្រាសធុនតូច និងមធ្យមក្នុងស្រុកឱ្យផ្សារភ្ជាប់ទៅខ្សែចង្វាក់ក់តម្លៃតំបន់ និងសកលលោកផងដែរ។
លោកបន្តថា បរិបទបដិវត្តន៍ឧស្សាហកម្ម ៤.០ និងបច្ចេកវិទ្យាឌីជីថលគឺជាគន្លឹះសំខាន់ក្នុងការជំរុញភាពប្រកួតប្រជែងរបស់សហគ្រាសពាណិជ្ជកម្ម និងដំណើរការអាជីវកម្ម ដែលរួមចំណែកដល់ការលើកកម្ពស់ផលិតភាព បង្កើនការនាំចេញ បង្កើតការងារ និងជំរុញកំណើនសេដ្ឋកិច្ចជាតិ៕
