ភ្នំពេញៈ ក្រសួងទេសចរណ៍កម្ពុជា និងស្ថានទូតឥណ្ឌាប្រចាំកម្ពុជាបានចុះអនុស្សរណៈយោគយល់គ្នា (MoU) ចំនួន ២ ក្នុងការលើកកម្ពស់លើវិស័យទេសចរណ៍ និងកិច្ចសហប្រតិបត្តិការឌីជីថលក្នុងវិស័យនេះរវាងប្រទេសទាំង ២។
អនុស្សរណៈសម្រាប់គម្រោងផលប៉ះពាល់រហ័ស (QIP) ស្តីពី «ការអភិវឌ្ឍកម្មវិធីទូរស័ព្ទដើម្បីលើកកម្ពស់សហគមន៍ទេសចរណ៍ និងអេកូទេសចរណ៍» និង «ការលើកកម្ពស់សកម្មភាពអេកូទេសចរណ៍នៅក្នុងសហគមន៍អេកូទេសចរណ៍ផាត់សណ្តាយ ខេត្តកំពង់ធំ ត្រូវបានចុះហត្ថលេខានៅថ្ងៃទី ១ ខែមេសា រវាងលោកស្រី Devyani Khobragade ឯកអគ្គរដ្ឋទូតប្រទេសឥណ្ឌាប្រចាំនៅកម្ពុជា និងលោក ថោង រដ្ឋសកិ្ដអគ្គនាយកនៃកិច្ចសហប្រតិបត្តិការអន្តរជាតិ និងអភិវឌ្ឍន៍ទេសចរណ៍ក្រសួងទេសចរណ៍។
យោងតាមសេចក្តីប្រកាសព័ត៌មានបានពីស្ថានទូតឥណ្ឌាប្រចាំកម្ពុជា គម្រោងស្តីពីអេកូទេសចរណ៍ផាត់សណ្ដាយ នឹងពង្រឹងការរស់រានរបស់សហគមន៍អេកូទេសចរណ៍ផាត់សណ្ដាយ។ ការណ៍នេះក៏នឹងលើកទឹកចិត្តសហគមន៍មូលដ្ឋានកុំឱ្យជាប់ពាក់ព័ន្ធនឹងសកម្មភាពខុសច្បាប់ ដូចជាការនេសាទនៅតំបន់ហាមឃាត់ និងការកាប់បំផ្លាញព្រៃឈើ។ គម្រោងនេះក៏នឹងបង្កើនការចូលរួមរបស់ស្ត្រីក្នុងកម្លាំងការងារផងដែរ ហើយគម្រោងស្ដីពីអភិវឌ្ឍន៍កម្មវិធីទូរស័ព្ទមានគោលបំណងអភិវឌ្ឍកម្មវិធីទូរស័ព្ទចល័តជាកម្លាំងជំរុញមួយ ដែលនឹងក្លាយជាវេទិការួមមួយក្នុងការលើកកម្ពស់ទេសចរណ៍ និងសហគមន៍អេកូទេសចរណ៍ទូទាំងប្រទេស។
លោក ថោង ខុន រដ្ឋមន្ត្រីក្រសួងទេសចរណ៍បានឱ្យដឹងថា គម្រោងនេះ គឺជាជំហានវិជ្ជមានមួយឆ្ពោះទៅរកការជួយសម្រួលការមកដល់នៃភ្ញៀវទេសចរនៅកម្ពុជា។ លោកបានជំរុញឱ្យមានភ្ញៀវទេសចរឥណ្ឌាមកកម្ពុជាកាន់តែច្រើន។
លោកត្រូវបានដកស្រង់សម្ដីដោយលើកឡើងថា៖ «សម្រាប់ការចាប់ផ្តើមប្រតិបត្តិការជើងហោះហើរលក្ខណៈជួល (Charter Flight) រវាងប្រទេសទាំង ២ ក្រសួងទេសចរណ៍នឹងគាំទ្រជាចាំបាច់»។
លោករដ្ឋមន្ត្រីក៏បានស្វែងរកជំនួយពីរដ្ឋាភិបាលឥណ្ឌា ក្នុងការរៀបចំឱ្យមានដំណើរការនៃអរិយធម៌ឡើងវិញ ដោយបញ្ជាក់ថា គម្រោងទាំងនេះនឹងនាំឱ្យមានការកើនឡើងចំនួនភ្ញៀវទេសចរ ហើយវានឹងផ្តល់អត្ថប្រយោជន៍យ៉ាងច្រើនដល់វិស័យទេសចរណ៍នៅកម្ពុជា។
លោកស្រី Devyani Khobragade ឯកអគ្គរដ្ឋទូតឥណ្ឌាបានបញ្ជាក់ថា គម្រោងទាំងនេះគឺជាផ្នែកមួយនៃគំនិតផ្តួចផ្តើមអភិវឌ្ឍន៍របស់រដ្ឋាភិបាលឥណ្ឌា និងផ្តល់សិទ្ធិអំណាចដល់ជីវភាពរស់នៅរបស់ប្រជាជនកម្ពុជា។ គម្រោងទាំងនេះនឹងត្រូវបញ្ចប់ក្នុងរយៈពេល ១ ឆ្នាំ។
លោកស្រីថ្លែងថា៖ «គម្រោងទាំងនេះនឹងនាំទៅដល់ការពង្រឹងទំនាក់ទំនងទ្វេភាគីជារួម និងសុឆន្ទៈរវាងប្រជាជនឥណ្ឌា និងកម្ពុជា។ ប្រទេសទាំង ២ ចាំបាច់ត្រូវតែធ្វើការឆ្ពោះទៅរកការសម្រេចបាននូវការតភ្ជាប់ជើងហោះហើរត្រង់ឱ្យបាន»។
លោកស្រីបានបញ្ជាក់ថា ភាគីទាំងសងខាងគួរតែខិតខំ ដើម្បីចាប់ផ្តើមជើងហោះហើរលក្ខណៈជួល ដែលអាចគ្របដណ្តប់តំបន់ទេសចរណ៍ព្រះពុទ្ធសាសនានៅឥណ្ឌា និងខេត្តសៀមរាបនៅកម្ពុជា។ ទាក់ទិននឹងដំណើរនៃអរិយធម៌នេះ លោកស្រីបានស្នើដល់លោករដ្ឋមន្ត្រីជួយចែករំលែកបន្ថែមទៀតមុននឹងទទួលយកសំណើនេះ។
គំនិតផ្តួចផ្តើមនេះគឺជាផ្នែកមួយនៃគម្រោងផលប៉ះពាល់រហ័ស (QIP) របស់រដ្ឋាភិបាលឥណ្ឌា ស្ថិតក្រោមក្របខ័ណ្ឌនៃកិច្ចសហប្រតិបត្តិការមេគង្គ Ganga។
ស្ថិតក្រោមគម្រោង QIP រដ្ឋាភិបាលឥណ្ឌាអនុវត្តគម្រោងចំនួន ១០ ជារៀងរាល់ឆ្នាំក្នុងប្រទេសកម្ពុជា ដោយផ្តល់មូលនិធិរហូតដល់ ៥០ ០០០ ដុល្លារអាមេរិកក្នុង ១ គម្រោង។
យោងតាមក្រសួងទេសចរណ៍ ចាប់តាំងពីឆ្នាំ ២០១៥ ដល់ឆ្នាំ ២០១៦ រដ្ឋាភិបាលប្រទេសឥណ្ឌាបានអនុម័តគម្រោងចំនួន ៤៦ លើវិស័យព័ត៌មានវិទ្យា ក្នុងវិស័យកសិកម្ម សុខាភិបាល អនាម័យ ការផ្តល់សិទ្ធិអំណាចដល់ស្ត្រី សុខុមាលភាពកុមារ ការអភិវឌ្ឍជនបទ ហេដ្ឋារចនាសម្ព័ន្ធសង្គម (រួមទាំងការកសាងសមត្ថភាព) បរិស្ថាន។ល។ ក្នុងចំណោមគម្រោងចំនួន ៤៦ នោះ គម្រោងចំនួន ២១ ត្រូវបានអនុវត្តបញ្ចប់រួចរាល់ហើយ ដោយឡែក ២៥ គម្រោងដែលនៅសេសសល់ គឺស្ថិតក្នុងដំណាក់កាលផ្សេងៗនៃការអនុវត្តបន្ត៕LA