ទីក្រុងរីហ្គា ប្រទេសឡេតូនីៈ ប្រធានប្រតិបត្តិករសន្និធិឧស្ម័នធម្មជាតិរបស់ប្រទេសឡេតូនី ដែលស្ថិតក្នុងតំបន់បាល់ទិកបានឱ្យដឹងកាលពីថ្ងៃសៅរ៍ថា បណ្ដារដ្ឋបាល់ទិកលែងនាំចូលឧស្ម័នធម្មជាតិពីប្រទេសរុស្ស៊ីដែលលើកទ័ពលុកលុយចូលប្រទេសអ៊ុយក្រែនទៀតហើយ។
លោក UldisBariss អគ្គនាយកក្រុមហ៊ុន Conexus Baltic Grid បានថ្លែងថា៖ «ប្រសិនបើនៅតែមានការសង្ស័យអំពីថាតើអាចមានការជឿទុកចិត្តណាមួយលើការដឹកជញ្ជូនពីប្រទេសរុស្ស៊ីឬយ៉ាងណានោះ ព្រឹត្តិការណ៍បច្ចុប្បន្នបង្ហាញពួកយើងយ៉ាងច្បាស់ថាមិនមានការជឿទុកចិត្តទៀតទេ»។
លោកបានប្រាប់វិទ្យុប្រទេសឡេតូនីថា៖ «ចាប់តាំងពីថ្ងៃទី ១ ខែមេសា ឧស្ម័នធម្មជាតិរបស់ប្រទេសរុស្ស៊ីលែងហូរទៅប្រទេសឡេតូនី អេស្តូនី និងលីទុយអានី ទៀតហើយ»។
លោកបានបន្ថែមថា ទីផ្សារឧស្ម័នតំបន់បាល់ទិកបច្ចុប្បន្នកំពុងត្រូវបានបម្រើដោយឧស្ម័នបម្រុងទុកនៅក្រោមដីក្នុងប្រទេសឡេតូនី។
វិធានការនេះធ្វើឡើងនៅពេលដែលប្រធានាធិបតីរុស្ស៊ីលោក វ្ល៉ាឌីមៀរ ពូទីន បានព្យាយាមប្រើប្រាស់ឋានៈរបស់ប្រទេសរុស្ស៊ីជាមហាអំណាចថាមពល។
ជាមួយនឹងសេដ្ឋកិច្ចរបស់លោកបានជាប់គាំងដោយសារទណ្ឌកម្មអន្តរជាតិដែលមិនធ្លាប់មាន លោក ពូទីន បានព្រមានបណ្ដាប្រទេសជាសមាជិកសហភាពអឺរ៉ុបថា ពួកគេចាំបាច់ត្រូវបង្កើតគណនីប្រាក់រូប្លិ៍ ដើម្បីទូទាត់ថ្លៃឧស្ម័នដែលនាំចូលពីប្រទេសរុស្ស៊ី។
លោក ពូទីន បានឱ្យដឹងកាលពីថ្ងៃព្រហស្បតិ៍ថា កិច្ចសន្យាដែលមានស្រាប់នឹងត្រូវបញ្ឈប់ប្រសិនបើការទូទាត់មិនត្រូវបានធ្វើឡើងជាប្រាក់រូប្លិ៍នោះ។
ខណៈពេលដែលអាមេរិកបានហាមឃាត់ការនាំចូលប្រេង និងឧស្ម័នពីប្រទេសរុស្ស៊ី សហភាពអឺរ៉ុបដែលបានទទួលប្រហែល ៤០ ភាគរយនៃការផ្គត់ផ្គង់ឧស្ម័នរបស់ខ្លួនពីប្រទេសរុស្ស៊ីកាលពីឆ្នាំ ២០២១ បានរក្សាទុកការដឹកជញ្ជូនពីទីក្រុងម៉ូស្គូ។
លោក Gitanas Nauseda ប្រធានាធិបតីលីទុយអានី បានអំពាវនាវឱ្យបណ្ដាប្រទេសផ្សេងទៀត នៅសហភាពអឺរ៉ុបធ្វើតាមគំរូបណ្ដាប្រទេសបាល់ទិក។
លោកបានថ្លែងនៅលើ Twitter ថា៖ «ចាប់ពីខែនេះតទៅ មិនមានឧស្ម័នប្រទេសរុស្ស៊ីទៀតទេនៅក្នុងប្រទេសលីទុយអានី»។
លោកបានបន្ថែមថា៖ «ឆ្នាំមុន ប្រទេសរបស់ខ្ញុំបានធ្វើការសម្រេចចិត្តថា ថ្ងៃនេះអនុញ្ញាតឱ្យយើងមិនរងផលប៉ះពាល់ដោយសារការផ្ដាច់ទំនាក់ទំនងថាមពលជាមួយប្រទេសឈ្លានពាន»។
លោកបញ្ជាក់ថា៖ «បើយើងអាចធ្វើបាន បណ្ដាប្រទេសផ្សេងទៀតនៅ អឺរ៉ុបក៏អាចធ្វើបានផងដែរ»៕ LA