ទីក្រុង ហ្វ្រេងហ្វឺតៈ ទីភ្នាក់ងារស្ថិតិផ្លូវការបានឱ្យដឹងកាលពីថ្ងៃចន្ទថា ការនាំចេញរបស់ប្រទេសអាល្លឺម៉ង់បានកើនឡើងខ្ពស់កាលពីខែកុម្ភៈ ដោយព្រមានថា ជម្លោះប្រទេសអ៊ុយក្រែន និងការដាក់ទណ្ឌកម្មប្រឆាំងនឹងប្រទេសរុស្ស៊ីទំនងជានឹងធ្វើឱ្យមានបញ្ហាក្នុងរយៈពេលជាច្រើនខែខាងមុខ។
ទីភ្នាក់ងារស្ថិតិ Destatis បានឱ្យដឹងថា ការនាំចេញបានកើនឡើងខ្ពស់ជាងការរំពឹងទុកចំនួន ៦,៤ ភាគរយកាលពីខែមុន ដែលកើនឡើងដល់តម្លៃ ១២៤,៧ ពាន់លានអឺរ៉ូ (១៣៧,៥ ពាន់លានដុល្លារ) ដែលបានជំរុញដោយតម្រូវការខ្លាំងពីបណ្តាប្រទេសសហភាពអឺរ៉ុប។
ក្រុមអ្នកវិភាគដែលត្រូវបានស្ទង់មតិដោយក្រុមហ៊ុន FactSet បានព្យាករកំណើន ២ ភាគរយ។
ការនាំចូលបានកើនឡើង ៤,៥ ភាគរយ ធៀបនឹងរយៈពេលដូចគ្នាកាលពីខែមុន ដែលមានទឹកប្រាក់សរុបចំនួន ១១៣,១ ពាន់លានអឺរ៉ូ។
ប៉ុន្តែពាណិជ្ជកម្មជាមួយប្រទេសរុស្ស៊ីបានធ្លាក់ចុះគួរឱ្យកត់សម្គាល់ ដោយការនាំចេញបានធ្លាក់ចុះ ៦,៣ ភាគរយ និងការនាំចូល ៧,៣ ភាគរយ ដែលបង្ហាញពីផលប៉ះពាល់លើកដំបូង ដោយសារតែទណ្ឌកម្មរបស់ប្រទេសលោកខាងលិចដែលបានដាក់លើប្រទេសរុស្ស៊ី បន្ទាប់ពីការឈ្លានពានអ៊ុយក្រែនកាលពីថ្ងៃទី ២៤ ខែកុម្ភៈ។
ទីភ្នាក់ងារស្ថិតិ Destatis បានឱ្យដឹងថា៖ «គេរំពឹងថាគិតត្រឹមខែមីនា តួលេខពាណិជ្ជកម្មបរទេសនឹងបង្ហាញលម្អិតអំពីទំហំនៃការដាក់ទណ្ឌកម្ម វិធានការបន្ថែមក្នុងការរឹតបន្តឹងការនាំចេញ និងឥរិយាបថដែលមិនដាក់ទណ្ឌកម្មរបស់អ្នកចូលរួមទីផ្សារនឹងធ្វើឱ្យប៉ះពាល់ដល់ពាណិជ្ជកម្មរបស់ប្រទេសអាល្លឺម៉ង់ជាមួយសហព័ន្ធរុស្ស៊ីបន្ថែមទៀត»។
សេដ្ឋកិច្ចអាល្លឺម៉ង់កំពុងប្រឈមមុខនឹងការធ្លាក់ចុះ ដោយសារសង្គ្រាមប្រទេសអ៊ុយក្រែន ដែលបានបន្ថែមភាពតានតឹងមួយកម្រិតទៀតដល់ខ្សែចង្វាក់ផ្គត់ផ្គង់ពិភពលោក និងបានបង្កឱ្យតម្លៃថាមពលកើនឡើងខ្ពស់។
ក្រុមហ៊ុនផលិតរថយន្តឈានមុខគេរបស់ប្រទេសអាល្លឺម៉ង់ដូចជា ក្រុមហ៊ុន Volkswagen ក្រុមហ៊ុន BMW និងក្រុមហ៊ុន Mercedes-Benz ត្រូវបានបង្ខំចិត្តកាត់បន្ថយការផលិតនៅតាមរោងចក្រមួយចំនួនរួចហើយ ដើម្បីរង់ចាំគ្រឿងបន្លាស់រថយន្តសំខាន់ៗពីរោងចក្រប្រទេសអ៊ុយក្រែន។
ក្រុមហ៊ុនអាល្លឺម៉ង់ធំៗបានផ្អាកអាជីវកម្មនៅរុស្ស៊ី ឬបញ្ឈប់ការនាំចេញទៅកាន់ប្រទេសនេះផងដែរ៕ LA