ទីក្រុងកូឡុំបូៈ ប្រធានាធិបតីប្រទេសស្រីលង្កានឹងតែងតាំងគណៈរដ្ឋមន្ត្រីថ្មីនៅថ្ងៃចន្ទ ខណៈដែលកងកម្លាំងសន្តិសុខបានទប់ទល់នឹងអំពើហិង្សាដែល អាចកើតមានជាមួយនឹងក្រុមអ្នកតវ៉ាប្រឆាំងជាច្រើន រំពឹងទុកថា ប្រឆាំងនឹងការខ្វះស្បៀងអាហារប្រេងឥន្ធនៈ និងថ្នាំពេទ្យដែលកាន់តែអាក្រក់ខ្លាំងឡើង។
រដ្ឋមន្ត្រីចំនួន ២៦ រូបនៅក្នុងគណៈរដ្ឋមន្ត្រីសមាជិកទាំងអស់ លើកលែងតែលោកប្រធានាធិបតី Gotabaya Rajapaksa និងលោកនាយករដ្ឋមន្ត្រី Mahinda Rajapaksa ដែលជាបងប្រុសរបស់លោកបានដាក់លិខិតលាលែងពីតំណែង នៅក្នុងកិច្ចប្រជុំកាលពីយប់ថ្ងៃអាទិត្យ។
វិធានការផ្លាស់ប្ដូរនេះបានជម្រះផ្លូវសម្រាប់លោកប្រធានាធិបតីក្នុងការតែងតាំងគណៈរដ្ឋមន្ត្រីថ្មីនៅថ្ងៃចន្ទ ប្រហែលជារួមបញ្ចូលទាំងមនុស្សមួយចំនួនដែលបានលាលែងពីតំណែង ខណៈដែលក្រុមនយោបាយដែលកំពុងកាន់អំណាចស្វែងរកការពង្រឹងតំណែងរបស់ខ្លួនក្នុងគ្រាដែលមានវិបត្តិសេដ្ឋកិច្ចនេះ។
ប្រទេសនេះកំពុងជួបប្រទះកង្វះស្បៀងអាហារ ឥន្ធនៈ និងសម្ភារសំខាន់ៗផ្សេងទៀត ដែលមិនធ្លាប់មាន រួមជាមួយនឹងអតិផរណាកម្រិតខ្ពស់បំផុតមិនធ្លាប់មាន និងការដាច់ចរន្តអគ្គិសនីដែលមិនមានសញ្ញានៃការបញ្ចប់វិបត្តិសេដ្ឋកិច្ចនេះបានទេ។
ស្ថានភាពនេះត្រូវបានរដ្ឋាភិបាលទទួលស្គាល់ថា ជាវិបត្តិសេដ្ឋកិច្ចដ៏អាក្រក់បំផុតចាប់តាំងពីការទទួលបានឯករាជ្យពីចក្រភពអង់គ្លេសកាលពីឆ្នាំ ១៩៤៨ ហើយប្រទេសនេះបានប្រកាសថា ខ្លួននឹងស្វែងរកជំនួយសង្គ្រោះពីរូបិយវត្ថុអន្តរជាតិ (IMF)។
មន្ត្រីសន្តិសុខជាន់ខ្ពស់ ១ រូបបាននិយាយថា កងកម្លាំងយោធា និងនគរបាល ត្រូវបានដាក់ឱ្យស្ថិតក្នុងស្ថានភាពប្រុងប្រយ័ត្នខ្ពស់ ខណៈដែលបម្រាមគោចររយៈពេល ៣៦ ម៉ោងបានបញ្ចប់កាលពីព្រឹកព្រលឹមថ្ងៃចន្ទ បើទោះបីជាមានរបាយការណ៍ស៊ើបការណ៍ព្រមានអំពីភាពចលាចលបន្ថែមទៀតក្ដី។
លោកបានថ្លែងថា៖ «ការចង្អុលបង្ហាញ គឺថាយើងអាចរំពឹងថានឹងមានបាតុកម្មបន្ថែមទៀត»។ លោកបានបញ្ជាក់ជាថ្មីថា យោធាត្រូវបានផ្តល់សិទ្ធិអំណាចក្នុងការឃុំខ្លួនជនសង្ស័យ ស្ថិតនៅក្រោមស្ថានភាពអាសន្នដែលបានប្រកាសកាលពីថ្ងៃសុក្រ។
លោកប្រធានាធិបតី Gotabaya Rajapaksa បានដាក់ប្រទេសស្ថិតក្នុងភាពអាសន្នរយៈពេល ១ ថ្ងៃ បន្ទាប់ពីហ្វូងមនុស្សព្យាយាមសម្រុកចូលផ្ទះរបស់លោកនៅទីក្រុងកូឡុំបូ។
ពេញ ១ ល្ងាចថ្ងៃអាទិត្យមនុស្សរាប់រយនាក់បានបញ្ចេញសំឡេងរំខាន ប៉ុន្តែដោយសន្តិវិធីនៅក្នុងទីក្រុងនានាទូទាំងប្រទេសដីកោះមួយនេះ ដែលមានមនុស្ស ២២ លាននាក់បានបរិហារការដោះស្រាយវិបត្តិរបស់លោក Rajapaksa។
ក្រុមអ្នកតវ៉ាប្រឆាំង បានស្រែកនៅជាយទីក្រុង Rajagiriya ថា៖ «Gotaត្រឡប់ទៅផ្ទះវិញ» នៅក្បែរសភាជាតិ ខណៈដែលនៅទីក្រុង Negombo នៅក្បែរព្រលានយន្តហោះអន្តរជាតិដ៏សំខាន់ប្រជាជនបានស្រែកថា «Gota បរាជ័យ! បរាជ័យ!បរាជ័យ!»។
បម្រាមគោចរពេញ ១ ថ្ងៃកាលពីថ្ងៃអាទិត្យបានរារាំងក្រុមអ្នកតវ៉ាប្រឆាំងទ្រង់ទ្រាយធំដែលត្រូវបានរៀបចំតាមរយៈប្រព័ន្ធផ្សព្វផ្សាយសង្គមដូចជា Facebook Twitter និង WhatsApp ដែលបណ្ដាញទាំងនេះ ត្រូវបានរារាំងដោយរដ្ឋាភិបាល។
វេទិកាទាំងនោះត្រូវបានដោះសោហើយការត្រួតពិនិត្យផ្នែកខ្លះនៃអ៊ីនធឺណិតបានបញ្ចប់បន្ទាប់ពី ១៥ ម៉ោង ខណៈដែលគណៈកម្មាធិការសិទ្ធិមនុស្សប្រទេសស្រីលង្កាបានសម្រេចថា ការហាមនេះគឺខុសច្បាប់។
ក្រុមសកម្មជនបានឱ្យដឹងថាពួកគេនឹងធ្វើបាតុកម្មកាន់តែធំជាងនេះនៅក្នុងទីក្រុងសំខាន់ៗមួយចំនួននៅថ្ងៃចន្ទ ដើម្បីបង្ខំឱ្យលោកប្រធានាធិបតី Rajapaksa និងក្រុមគ្រួសាររបស់គាត់ចុះចេញពីតំណែង។
សមាជិកក្រុមដែលមានអំណាចតិចតួច បានប្រកាសថា ខ្លួននឹងចាកចេញពីរដ្ឋបាលនេះ នៅសប្តាហ៍នេះដែលជាវិធានការមួយដែលនឹងធ្វើឱ្យសំឡេងភាគច្រើនរបស់លោក Rajapaksa ចុះខ្សោយនៅក្នុងសភា។
ក្រុមសេដ្ឋវិទូឱ្យដឹងថា វិបត្តិរបស់ប្រទេសស្រីលង្កាកាន់តែធ្ងន់ធ្ងរឡើងដោយសារការគ្រប់គ្រងមិនត្រឹមត្រូវរបស់រដ្ឋាភិបាល ការខ្ចីប្រាក់កើនឡើងរយៈពេលជាច្រើនឆ្នាំ និងការកាត់បន្ថយពន្ធដែលមិនសមហេតុផល៕ LA