.jpg)
ការថតរូបអនុស្សាវរីយ៍រវាងថ្នាក់ដឹកនាំ CCC ជាមួយភាគីអូស្ត្រាលី។ រូបថត សហការី
ភ្នំពេញៈ ប្រធានសភាពាណិជ្ជកម្មកម្ពុជា (CCC) លោក គិត ម៉េង បានស្នើឱ្យប្រទេសអូស្ត្រាលីជួយផ្តល់បច្ចេកទេសក្នុងវិស័យកសិកម្ម និងជំរុញការវិនិយោគនៅកម្ពុជាបន្ថែមទៀត ដើម្បីពង្រឹងទំនាក់ទំនងធុរកិច្ច ការវិនិយោគ និងសេដ្ឋកិច្ចរវាងប្រទេសទាំង ២ ឱ្យកាន់តែរឹងមាំ។
ចំណុចទាំងនេះត្រូវបានលើកឡើងក្នុងជំនួបពិភាក្សារវាងលោក គិត ម៉េង ជាមួយលោក Pablo Kang អគ្គរដ្ឋទូតប្រទេសអូស្ត្រាលីប្រចាំនៅកម្ពុជា និងលោកស្រី Rebecca Ball ស្នងការពាណិជ្ជកម្មអូស្ត្រាលីប្រចាំកម្ពុជា និងប្រទេសវៀតណាម កាលពីថ្ងៃទី ១ ខែមេសា។
លោក គិត ម៉េង បានលើកឡើងថា កម្ពុជា និងអូស្ត្រាលី គឺជាប្រទេសមានទំនាក់ទំនងការទូតផ្លូវការជាមួយនឹងគ្នារយៈពេល ៧០ ឆ្នាំមកហើយ ខណៈបច្ចុប្បន្នអូស្ត្រាលីកំពុងដើរតួនាទីសំខាន់ក្នុងការជួយជំរុញកំណើនសេដ្ឋកិច្ចកម្ពុជា តាមរយៈការអភិវឌ្ឍវិស័យកសិកម្ម និងការបណ្តាក់ទុនលើវិស័យមួយចំនួន ពិសេសវិស័យធនធានរ៉ែ និងថាមពល។ លោកបន្តថា ទោះបីការវិនិយោគរបស់អូស្ត្រាលីនៅកម្ពុជាមានខ្លះហើយក៏ដោយ ក៏កម្ពុជានៅតែត្រូវការការបណ្តាក់ទុនពីវិនិយោគិនអូស្ត្រាលីបន្ថែមទៀត។
លោកបានថ្លែងថា៖ «ខ្ញុំសូមស្នើឱ្យអូស្ត្រាលីជួយជំរុញវិស័យកសិកម្មនៅកម្ពុជាទាំងបច្ចេកទេសដាំដុះ ប្រមូលផល កែច្នៃ និងទីផ្សារ ព្រោះអូស្ត្រាលីជាប្រទេសដែលមានបច្ចេកវិទ្យា និងជំនាញខាងវិស័យកសិកម្ម។ ក្រៅពីនេះខ្ញុំក៏ស្វាគមន៍ចំពោះការវិនិយោគរបស់អូស្ត្រាលីក្នុងវិស័យរ៉ែ ថាមពល និងកម្មន្តសាលផងដែរ»។
តាមរយៈជំនួបនោះលោក គិត ម៉េង ក៏បានស្នើឱ្យរៀបចំព្រឹត្តិការណ៍ជំរុញធុរកិច្ច និងវិនិយោគរវាងប្រទេសទាំង ២ ផងដែរ។
អគ្គរដ្ឋទូតអូស្ត្រាលីប្រចាំនៅកម្ពុជា លោក Pablo Kang បាននិយាយថា រដ្ឋាភិបាលអូស្ត្រាលីតែងតែជួយគាំទ្រដល់វិស័យកសិកម្មកម្ពុជា និងបានអភិវឌ្ឍកម្មវិធីថ្មីៗ ដើម្បីជួយគាំទ្រដល់ខ្សែចង្វាក់ផ្គត់ផ្គង់ក្នុងវិស័យកសិកម្មនៅកម្ពុជា ពិសេសការបង្កើតសួនកសិឧស្សាហកម្ម ការជំរុញស្តង់ដាផលិតផល ភូតគាមអនាម័យ ការធ្វើពិពិធកម្មកសិកម្ម និងប្រព័ន្ធស្រោចស្រព ជាដើម។
លោកបានលើកឡើងទៀតថា៖ «សក្តានុពលនៃការវិនិយោគទៅលើថាមពលកកើតឡើងវិញ និងការធ្វើអាជីវកម្មរ៉ែមាសរបស់ក្រុមហ៊ុនអូស្ត្រាលីនៅខេត្តមណ្ឌលគិរី គឺជាគំរូមួយនៃការវិនិយោគរបស់អូស្ត្រាលីនៅកម្ពុជា»។
លោកស្រី Rebecca Ball ស្នងការពាណិជ្ជកម្មអូស្ត្រាលីប្រចាំកម្ពុជា និងប្រទេសវៀតណាម ក៏បានបង្ហាញពីបំណងបង្កើនកិច្ចសហការជាមួយនឹងសភាពាណិជ្ជកម្មកម្ពុជា និងធ្វើការស្វែងយល់ពីក្រុមហ៊ុនដែលជាសមាជិកសភាពាណិជ្ជកម្មកម្ពុជា ដើម្បីពិនិត្យលទ្ធភាពសហការរួមគ្នាជាមួយក្រុមហ៊ុនមកពីប្រទេសអូស្ត្រាលី។
អគ្គនាយកសភាពាណិជ្ជកម្មកម្ពុជា លោក ងួន ម៉េងតិច បានប្រាប់ភ្នំពេញ-ប៉ុស្តិ៍ក្នុងថ្ងៃទី ៤ ខែមេសា ថា អូស្ត្រាលីជាប្រទេសអភិវឌ្ឍន៍ដែលមានជំនាញ និងបទពិសោធច្រើនលើផ្នែកកសិកម្ម និងធនធានរ៉ែ ដូច្នេះបើវិនិយោគិនប្រទេសអូស្ត្រាលីចូលមកវិនិយោគនឹងអាចជួយឱ្យកម្ពុជាទទួលបានអត្ថប្រយោជន៍ច្រើន។
លោកបានថ្លែងថា៖ «អូស្ត្រាលីជាប្រទេសដែលមានជំនាញលើវិស័យកសិកម្ម និងរ៉ែ ហេតុនេះកម្ពុជាពិតជាត្រូវការការចូលរួមរបស់អូស្ត្រាលីទាំងផ្នែកបច្ចេកទេស និងការវិនិយោគ»។
បើយោងតាមលោក ម៉េងតិច សភាពាណិជ្ជកម្មកម្ពុជា កំពុងមានផែនការជាច្រើនដើម្បីណែនាំដល់វិនិយោគិនអូស្រា្តលីចូលមកសិក្សា និងវិនិយោគលើផ្នែកកសិកម្ម និងរ៉ែ នៅកម្ពុជា។
ទិន្នន័យក្រសួងពាណិជ្ជកម្ម បង្ហាញថា ទោះបីវិបត្តិជំងឺកូវីដ ១៩ នៅបន្តរីករាលដាលក៏ទំនាក់ទំនងពាណិជ្ជកម្មរវាងប្រទេសទាំង ២ នៅតែរក្សាបានភាពវិជ្ជមាន ដោយនៅក្នុងឆ្នាំ ២០២១ ការផ្លាស់ប្តូរពាណិជ្ជកម្មរវាងប្រទេសទាំង ២ មានទឹកប្រាក់ចំនួន ៣២៤ លានដុលា្លរកើនទ្បើង ៥២ ភាគរយបើធៀបនឹងឆ្នាំ ២០២០៕ LA
