.jpg)
សំណង់ធំៗជាច្រើនបានលេចឡើងជាបន្តបន្ទាប់នៅកម្ពុជា។ រូបថត រ៉ាស់ហ៊ីម
ភ្នំពេញៈ ជាមួយនឹងការបន្ធូរបន្ថយការរឹតបន្តឹងលើការធ្វើដំណើរដោយសារអត្រានៃការចាក់វ៉ាក់សាំងខ្ពស់នៅកម្ពុជា ទោះបីតម្រូវការសកលធ្លាក់ចុះក៏ដោយ ធនាគារពិភពលោក (WB) នៅតែរក្សាការព្យាករសេដ្ឋកិច្ចសម្រាប់ប្រទេសកម្ពុជា គឺ ៤,៥ ភាគរយក្រោមសេណារីយោមូលដ្ឋាន ប៉ុន្តែកំណើននេះនឹងធ្លាក់មកត្រឹម ៣,៨ ភាគរយក្រោមសេណារីយោធ្លាក់ចុះដោយសារតែការចុះខ្សោយស្ថានភាពសេដ្ឋកិច្ចក្នុងស្រុកដែលបណ្តាលមកពីការកើនឡើងអតិផរណា ខណៈពេលលក្ខខណ្ឌខាងក្រៅកាន់តែអាក្រក់ខ្លាំងដែលបណ្តាលមកពីការធ្លាក់ចុះគួរឱ្យកត់សម្គាល់នៃតម្រូវការខាងក្រៅ។ ធនាគារពិភពលោកបានចេញផ្សាយរបាយការណ៍បច្ចុប្បន្នភាពសេដ្ឋកិច្ចអាស៊ីបូព៌ា និងប៉ាស៊ីហ្វិករបស់ខ្លួននៅក្នុងអំឡុងសន្និសីទសារព័ត៌មានអាស៊ីបូព៌ា និងប៉ាស៊ីហ្វិកនាថ្ងៃទី ៥ ខែមេសា ឆ្នាំ ២០២២ ថា ការស្ទុះងើបឡើងវិញរបស់កម្ពុជាត្រូវបានគេរំពឹងថា នឹងរក្សាបាននៅក្នុងកម្រិតព្យាករណ៍លើកមុន ដែលជំរុញដោយសកម្មភាពសេដ្ឋកិច្ចក្នុងស្រុក និង ការនាំចេញទំនិញកសិកម្ម។
ធនាគារពិភពលោកបានចង្អុលបង្ហាញទៀតថា ផលិតកម្មដែលនាំមុខ គឺការនាំចេញរបស់កម្ពុជាត្រូវគេរំពឹងថា នឹងប្រឈមនឹងឧបសគ្គមួយចំនួនក្នុងរយៈពេលជាច្រើនខែខាងមុខនេះ ជាមួយនឹងបរិយាកាសខាងក្រៅមិនសូវអំណោយផលដែលកំពុងត្រូវបានផ្លាស់ប្តូរដោយការធ្លាក់ចុះនៅអាមេរិក និងការធ្លាក់ចុះជារចនាសម្ព័ន្ធនៅក្នុងប្រទេសចិន។
ធនាគារនេះបានបន្ថែមថា ការឡើងថ្លៃថាមពល និងអាហារដោយសារតែផលវិបាកសេដ្ឋកិច្ចនៃសង្គ្រាមនៅប្រទេសអ៊ុយក្រែនត្រូវបានគេរំពឹងថានឹងថមថយល្បឿននៃការកាត់បន្ថយ ភាពក្រីក្រ ដោយសារវាដាក់សម្ពាធលើការចំណាយរបស់គ្រួសារ។
លោក Aaditya Mattoo ប្រធានសេដ្ឋវិទូបានឆ្លើយតបប្រាប់ភ្នំពេញ-ប៉ុស្តិ៍ក្នុងសន្និសីទសារព័ត៌មានជុំវិញការកើនឡើងតម្លៃប្រេងពិភពលោកនាពេលបច្ចុប្បន្នដែលនឹងមានផលប៉ះពាល់អវិជ្ជមានលើការកើនឡើងអតិផរណារបស់ប្រទេសកម្ពុជា។
លោកបាននិយាយថា កម្ពុជាគឺជាប្រទេសមួយដែលពឹងផ្អែកយ៉ាងខ្លាំងលើការនាំចូលឧស្ម័នធម្មជាតិ (LNG) ជិត ១០ ភាគរយនៃផលិតផលក្នុងស្រុកសរុប (GDP) គឺការនាំចូលប្រេង។ ដូច្នេះហានិភ័យភ្លាមៗមួយដែលកើនឡើងលើតម្លៃនឹងបន្ត ហើយវានឹងធ្វើឱ្យប៉ះពាល់ដល់សកម្មភាពសេដ្ឋកិច្ច និងរឹតត្បិតអតិថិជន។ លោកនិយាយថា៖ «សម្រាប់ហេតុផលនោះវាចាំបាច់ត្រូវតែជាបញ្ហាប្រឈមដ៏សំខាន់មួយសម្រាប់ទាំងចក្ខុវិស័យកំណើន និងការកាត់បន្ថយភាពក្រីក្រ»។
ទន្ទឹមនឹងនោះ លោកបានពន្យល់ថា កម្ពុជា គឺជាប្រទេសមួយដែលមានតម្រូវការហិរញ្ញប្បទានពីខាងក្រៅយ៉ាងសំខាន់ ហើយមានហានិភ័យក្នុងទិដ្ឋភាពផ្សេងទៀតនៃវិបត្តិនេះ ជាឧទាហរណ៍ អត្រាការប្រាក់ខ្ពស់ និងឱនភាពគណនីចរន្តធំជារួម «ហានិភ័យហិរញ្ញប្បទានដែលអាចធ្វើឱ្យមានការភ្ញាក់ផ្អើលផងដែរ នឹងអាចក្លាយជាបញ្ហាកាន់តែធំ»។
លោកបន្តថា៖ «អតិផរណានៅពេលនេះមានតិចជាង ៤ ភាគរយ ប៉ុន្តែក៏មានហានិភ័យផងដែរចំពោះអតិផរណាកាន់តែខ្ពស់ដែលអាចកាត់បន្ថយស្ថិរភាពសេដ្ឋកិច្ចដែលកម្ពុជាបានគ្រប់គ្រងរហូតមកដល់ពេលនេះ»។
លោក Aaditya បានលើកឡើងថា៖ «វាគឺជាដំណឹងដ៏ល្អ ២ ដែលខ្ញុំចង់និយាយថា កម្ពុជាបានឃើញការងើបឡើងវិញនៃការនាំចេញ ហើយកម្ពុជាក៏បានគ្រប់គ្រងជំងឺកូវីដ ១៩ បានល្អគួរឱ្យកត់សម្គាល់ទាំងការចាក់វ៉ាក់សាំង ដូច្នេះហើយការកាត់បន្ថយការរឹតបន្តឹងជំងឺកូវីដ ១៩ គឺអាចជួយជំរុញសកម្មភាពសេដ្ឋកិច្ច»។
កាលពីដើមខែកុម្ភៈ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន បានព្យាករថា កំណើនសេដ្ឋកិច្ចរបស់កម្ពុជានឹងមានក្នុងអត្រា ៥,៦ ភាគរយសម្រាប់ឆ្នាំ ២០២២ ដែលឆ្លុះបញ្ចាំងពីវឌ្ឍនភាពជាតិឆ្ពោះទៅរកភាពស៊ាំក្នុងសហគមន៍ប្រឆាំងនឹងជំងឺកូវីដ ១៩ ដែលបានគាំទ្រដោយអត្រានៃការចាក់វ៉ាក់សាំងដែលជាប់ចំណាត់ថ្នាក់ក្នុងចំណោមប្រទេសល្អបំផុតនៅលើពិភពលោក និងដែលបានជំរុញទឹកចិត្តរដ្ឋាភិបាលក្នុងការអនុញ្ញាតឱ្យមានការស្តារឡើងវិញពេញលេញនៃសកម្មភាពសេដ្ឋកិច្ច និងសង្គម។
លោក ព័ន្ធមុនីរ័ត្ន បានបញ្ជាក់ថា សម្រាប់ប្រទេសកម្ពុជា និងបណ្ដាប្រទេសផ្សេងទៀតនៅលើពិភពលោកទាំងមូលឆ្នាំ ២០២០ និងឆ្នាំ ២០២១ គឺជាឆ្នាំដ៏លំបាកដែលត្រូវបានបង្ហាញដោយការរីករាលដាលនៃជំងឺកូវីដ ១៩ និងផលវិបាកសេដ្ឋកិច្ចសង្គម។
លោកថ្លែងថា៖ «ភាពជោគជ័យនៃយុទ្ធនាការចាក់វ៉ាក់សាំងថ្នាក់ជាតិ និងការគ្រប់គ្រងការរីករាលដាលជំងឺកូវីដ-១៩ នៅកម្ពុជា អាចឱ្យយើងបិទព្រឹត្តិការណ៍សហគមន៍ «ថ្ងៃទី ២០ ខែកុម្ភៈ ឆ្នាំ ២០២១» បើកប្រទេសឡើងវិញ និងបន្តសកម្មភាពសេដ្ឋកិច្ចសង្គមឡើងវិញយ៉ាងពេញលេញ»។
លោក ព័ន្ធមុនីរ័ត្ន បានលើកឡើងទៀតថា៖ «សម្រាប់ឆ្នាំ ២០២២ នេះសេដ្ឋកិច្ចកម្ពុជាត្រូវបានព្យាករថានឹងបន្តកើនឡើងក្នុងរង្វង់ ៥,៦ ភាគរយដែលបានជំរុញដោយកំណើនការរំពឹងទុកអំពីការកើនឡើងតម្រូវការជាសកល និងទំនុកចិត្តនៅក្នុងចំណោមវិនិយោគិនបរទេស»៕ LA
