.jpg)
លោក Ebrahim Raisi ប្រធានាធិបតីនៃប្រទេសអុីរ៉ង់។ AFP
ទីក្រុងតេអេរ៉ង់ៈ សមត្ថភាពផលិតប្រេងរបស់ប្រទេសអ៊ីរ៉ង់បានវិលត្រឡប់ទៅដល់កម្រិតដូចមុននឹងការដាក់ទណ្ឌកម្មឡើងវិញក្នុងឆ្នាំ ២០១៨ នៅពេលដែលសហរដ្ឋអាមេរិកបានដកខ្លួន ជាឯកតោភាគីចេញពីកិច្ចព្រមព្រៀងនុយក្លេអ៊ែរ។
លោក Mohsen Khojastehmehr នាយកប្រតិបត្តិនៃក្រុមហ៊ុនប្រេងជាតិអ៊ីរ៉ង់ (NIOC) បានដកស្រង់សម្តីដោយទីភ្នាក់ងារសារព័ត៌មានរដ្ឋ IRNA កាលពីថ្ងៃអាទិត្យថា៖ «ការផលិតប្រេងបានឈានដល់តួលេខមុនការដាក់ទណ្ឌកម្ម ទោះបីជាមានសម្ពាធសេដ្ឋកិច្ចក៏ដោយ»។
បច្ចុប្បន្នអ៊ីរ៉ង់កំពុងចូលរួមក្នុងការចរចាដើម្បីស្តារឡើងវិញនូវកិច្ចព្រមព្រៀងនុយក្លេអ៊ែរឆ្នាំ ២០១៥ ដែលនឹងផ្តល់ឱ្យប្រទេសនេះនូវការបន្ធូរបន្ថយទណ្ឌកម្មដែលខ្លួនត្រូវការជាច្រើន ស្ដារការនាំចេញប្រេងរបស់អ៊ីរ៉ង់ជាថ្នូរនឹងការហាមឃាត់សំខាន់ៗលើកម្មវិធីនុយក្លេអ៊ែររបស់ខ្លួន។
សហរដ្ឋអាមេរិក ក្រោមការដឹកនាំរបស់លោកប្រធានាធិបតី Donald Trump បានដកខ្លួនឯកតោភាគីចេញពីកិច្ចព្រមព្រៀងក្នុងឆ្នាំ ២០១៨ និងបានដាក់ទណ្ឌកម្មយ៉ាងតឹងរ៉ឹងឡើងវិញ ដែលជំរុញឱ្យអ៊ីរ៉ង់ចាប់ផ្តើមវិលត្រឡប់មកវិញលើការប្តេជ្ញាចិត្តរបស់ខ្លួនក្រោមកិច្ចព្រមព្រៀងនៅឆ្នាំបន្តបន្ទាប់។
លោក Khojastehmehr បាននិយាយថា ទិន្នផលត្រូវបានស្ដារឡើងវិញដល់កម្រិតមុនទណ្ឌកម្ម ៣,៨ លានបារ៉ែលក្នុង ១ ថ្ងៃ (bpd) បន្ទាប់ពីវាបានធ្លាក់ចុះយ៉ាងខ្លាំងបន្ទាប់ពីការដាក់ទណ្ឌកម្មឡើងវិញនោះ។
មន្ត្រីរូបនេះបានបន្តថា៖ «ឥឡូវនេះយើងស្ថិតក្នុងស្ថានភាពមួយដើម្បីបង្កើនការនាំចេញទ្វេដងរបស់យើង។ បើនិយាយពីសន្តិសុខថាមពល សាធារណរដ្ឋអ៊ីស្លាមមានសមត្ថភាពសម្រេចបានប្រកបដោយស្ថិរភាពនៅលើឆាកអន្តរជាតិ»។
លោកបានបន្ថែមថា រដ្ឋាភិបាលរបស់លោកប្រធានាធិបតី Ebrahim Raisi បានបណ្តាក់ទុនចំនួន ៥០០ លានដុល្លារដើម្បីស្តារគ្រឿងបរិក្ខារ និងបង្កើនផលិតកម្មដល់កម្រិតមុនការដាក់ទណ្ឌកម្មក្នុងរយៈពេល ៦ ខែ។
លោក Javad Owji រដ្ឋមន្ត្រីប្រេងបាននិយាយកាលពីថ្ងៃសុក្រថា ប្រាក់ចំណូលប្រេងសម្រាប់ឆ្នាំប្រតិទិនចុងក្រោយរបស់អ៊ីរ៉ង់ដែលបានឈានដល់ការបិទនៅថ្ងៃទី ២០ ខែមីនាបានចុះបញ្ជី ១៨ ពាន់លានដុល្លារប្រហែល ២,៥ ដងច្រើនជាងឆ្នាំមុន។
នៅក្នុងរបាយការណ៍ប្រចាំខែ ក្រុមប្រទេសផលិតប្រេង OPEC បានប៉ាន់ប្រមាណថា អ៊ីរ៉ង់ផលិតប្រេងបាន ២,៥៤ bpd ក្នុងខែកុម្ភៈ៕ RR
